Rimangi ma situasi on: Ndang gok dope sampulu minut si Karen mangihuthon acara ni na poso, dibege ibana ma suara ni donganna sian pudina.

Diida si Karen ma si Jessica mamboan dua botol bir. Diboto ibana do i alkohol. Dilehon si Jessica ma sabotol tu si Karen, jala didok ma, ”Inum ma, nga cukup be umurmu laho marsonangsonang!”

Ndang olo hian si Karen. Alai, ala donganna do si Jessica, ndang olo si Karen gabe halak na so tabo didongani. Asing ni i, burju do si Jessica. Minum pe ibana, tontu ndang na pola sala i. Di bagasan roha ni si Karen, ”Holan minum bir do, asing do na minum sian marnarkoba.”

Molo hamu gabe si Karen, aha do na laho ulahononmuna?

Asa boi mambahen haputusan na marbisuk di situasi sisongon i, porlu do jati diri. Jati diri, i ma pangantusionta na paboahon ise hita na sasintongna jala aha na porlu taulahon. Marhite pangantusion i, boi ma hamu mangorom diri jala ndang paloashon halak mangelaela hamu.​—1 Korint 9:26, 27.

Songon dia do hamu boi tongtong patuduhon haboion i? Alusi ma sungkunsungkun na laho taulas on.

Gabe tamba ma habaranionmu molo diboto hamu na adong haboion dohot parangemuna na denggan.

SITIRUON SIAN BIBEL: Si Paulus manurat, ”Nang pe hurang malo ahu di hata, nda tung anggo di parbinotoan.” (2 Korint 11:6) Ala marparbinotoan si Paulus di Hata ni Debata, barani ma ibana nang pe adong paraloan. Ibana ndang paloashon elaela mambahen moru habaranionna.​—2 Korint 10:10; 11:5.

SUNGKUN MA DIRIMU: Di toru on, surat ma taringot haboionmu.

Patorang ma parangemuna na denggan. (Umpamana, diparrohahon hamu do na asing? burju do hamu? haposan do hamu? digohi hamu do janjimu?)

Songon rante na boi putus ala nunga tasikon, songon i ma jati dirimuna. Boi do i sega molo ndang dipadenggan hamu hahuranganmu.

SITIRUON SIAN BIBEL: Diboto si Paulus do hahuranganna. Didok ibana, ”Ai dihalashon jolma parbagasan na di ahu do nian patik ni Debata. Alai huida do patik na asing di bagasan angka ruas ni dagingku, na marmusu dompak patik na di bagasan rohangku; gabe dipatunduk do ahu tu gomgoman ni patik ni dosa, na di bagasan ruas ni dagingku.”​—Rom 7:22, 23.

SUNGKUN MA DIRIMU: Na dia do hahuranganku na ingkon hupadenggan?

Olo do hamu martaksi jala manuru supirna marputarputar asa habis miakna? Ulaon na so marlapatan do i!

Aha parsiajaranna? Molo adong tujuanmuna di parngoluon, ndang marisuang angka ulaonmuna. Ingkon botoonmuna do siulahononmu jala cara mangulahon i.

SITIRUON SIAN BIBEL: Si Paulus manurat, ”Ndada songon na so martujuan parlojongonku”. (1 Korint 9:26) Asa unang marisuang parngoluonta, songon si Paulus ma hita na mambahen tujuan di ngoluna.​—Pilippi 3:12-14.

SUNGKUN MA DIRIMU: Di toru on, surat ma tolu tujuan na laho ulahononmu di bagasan sataon.

Molo ndang adong haporseaon, gabe halak na so martujuan ma hamu. Songon bunglon na mangganti warnana, olo do ra hamu mangganti parangemuna asa sarupa songon angka donganmu. On ma na patuduhon ndang adong jati dirimuna.

Alai, molo hombar do ulaonmuna tu jati dirimuna, on patuduhon na tongtong do hamu mampartahanhon jati diri, ndang soal aha na diulahon halak.

SITIRUON SIAN BIBEL: Tingki poso dope si Daniel, ”nunga marsangkap hian [ibana] di bagasan rohana” laho mangoloi uhum ni Debata, nang pe dao ibana sian keluargana. (Daniel 1:8) Ala mangulahon i, tongtong do togu jati dirina. Hombar do ulaon ni si Daniel tu haporseaonna.

SUNGKUN MA DIRIMU: Aha do na dihaporseai hamu? Umpamana: Porsea do hamu tu Debata? Boasa porsea hamu? Aha do na paposhon rohamu na tutu adong Debata?

Porsea do hamu molo standar moral ni Debata denggan tu parngoluonmuna? Boasa porsea hamu?

Alani i, gabe halak na songon dia do hamu? Songon bulungbulung na madabu ala diombus alogo, manang songon hau na boi martahan nang pe ro udan habahaba? Patogu ma jati dirimuna, asa boi hamu songon hau i. Jala boi ma hamu mangalusi sungkunsungkun, Ise do ahu na sasintongna?