Molo serep roha ni sasahalak, pasti sai diargai ibana do halak na asing. Dang ginjang rohana jala dang dihilala ibana na istimewa dirina. Jala molo serep do roha ni sasahalak, pasti diparrohahon ibana do halak na asing jala olo marsiajar sian nasida.

Adong na mandok, sada hagaleon do molo serep roha ni sasahalak. Alai sebenarna molo serep roha ni sasahalak, boi ma diboto ibana hasalaanna jala diakkui ibana hahuranganna. Jadi dang sada hagaleon serep ni roha i, alai sifat na denggan do i.

• Asa mura gellengmuna mardongan. Bukku The Narcis­sism Epidemic mandok, “Molo serep roha ni sasahalak, biasana ‘mura do ibana mardongan tu halak na asing’, termasuk halak na so sarupa latar belakangna tu ibana.

• Marguna do i dung balga gellengmuna. Molo diajari hamu gellengmuna asa serep rohana mulai sian dakdanak, pasti godang do manfaatna dihilala ibana di masa depan, misalna tikki mangalului karejo. Didok Dr. Leonard Sax do, “Tikki wawancara kerja, molo ginjang roha ni sahalak na poso jala dang diakkui ibana hahuranganna, pasti maol do dapotna karejo. Alai molo serep rohana jala olo do ibana diajari, pasti mura do dapotna karejo.” *

Ajari ma gellengmuna asa dang pantang so hebat ibana.

PRINSIP NI BIBEL: “Molo adong na mandok dirina penting, hape dang songon i, na manggabusi dirina do ibana disi.”​—Galatia 6:3.

• Unang ma palobihu memotivasi. Memang denggan do begeon hata na mandok “Pasti dapotmu do na pinarsita ni roham”, hape dang songon i kenyataanna. Alai molo dang patimbohu cita-cita ni gellengmuna jala boi dapotna i, pasti las do rohana.

• Unang ma palobihu mamuji. Gabe maol do gellengmuna patuduhon serep ni roha molo palobihu hamu mamuji ibana. Misalna sai didok hamu tu ibana, “Jago do ho bah.” Molo naeng dipuji hamu pe gellengmuna, akka naung diulahon ibana ma puji hamu.

• Orai ma gellengmuna palelengku marinternet. Sering do akka halak patudu-tuduhon hamoraon dohot hajagoanna di internet. Jadi molo paseringku gellengmuna mangida internet, olo do gabe maol nasida patuduhon serep ni roha.

• Ajari ma gellengmuna asa olo minta maaf. Molo marsala gellengmuna, urupi ma ibana asa menyadari kesalahanna jala olo minta maaf.

Ajari ma gellengmuna asa olo mangargai.

PRINSIP NI BIBEL: “Toktong ma hamu mandok mauliate.”​—Kolosse 3:​15.

• Mangargai toppaan ni Debata. Ikkon dipaboa hamu do tu gellengmuna porlu hian do di hita akka toppaan ni Debata. Misalna asa boi hita mangolu, ikkon adong do alogo, aek dohot sipanganon. Jadi pakke hamu ma akka contoh i lao mangajari gellengmuna asa olo mandok mauliate tu Debata na mangalehon sudena i tu nasida.

• Mangargai halak na asing. Paboa ma tu gellengmuna adong do kelebihan ni sude halak. Jadi unang ma late rohana tu halak na asing. Tumagon do ibana marsiajar sian nasida.

• Mandok mauliate. Ajari ma gellengmuna asa terbiasa ibana mandok “mauliate” sian ias ni rohana. Jala molo serep do roha ni sasahalak, pasti sering do ibana mandok mauliate tu Debata.

Ajari ma gellengmuna asa diboto nasida porlu do mangurupi halak na asing.

PRINSIP NI BIBEL: “Toruk ma rohamuna, jala sangap ma bahen tu na asing. Unang ma holan mamparrohahon na porlu di hamu, alai parrohahon ma na porlu di na asing.”​—Pilippi 2:​3, 4.

• Lehon ma tugas tu gellengmuna. Molo dang dilehon hamu tugas tu gellengmuna, sarupa ma i hira na didok hamu tu ibana, “Na asing ma ulahon. Dang penting on!” Hape uppetting do tugas di jabu sian na marmeami. Jadi paboa ma tu ibana molo diulahon ibana tugasna di jabu, pasti bermanfaat do i tu hamuna sekeluarga. Jala paboa ma pasti diargai do na diulahon ibana.

• Paboa ma tu gellengmuna penting hian do mangurupi na asing. Asa dewasa cara berpikkir ni sahalak dakdanak, porlu do ibana marsiajar mangurupi na asing. Jadi ajari ma gellengmuna asa olo mamparrohahon halak na asing. Bahas ma dohot ibana boha carana mangurupi halak na asing. Jala urupi ma ibana tikki naeng mangulahon i, dung i puji ma naung diulahon ibana i.