DI TAON 1970 dapot ni angka arkeolog ma gulungan najolo di Engedi di Israel, di sabola barat ni pantai Laut Mati. Gulungan on didapot tingki manggali sinagoga naung hancur ditutung hira-hira taon 500 dohot 550 M. Ala naung buruk gulungan on, boi do gabe sega molo di bungka. Alani i, gabe ndang boi be diboto isi ni gulungan i. Alai baru-baru on, ala adong alat 3 Dimensi, gabe “boi dijaha” gulungan i nang pe ndang dibungka. Alani alat i, gabe boi ma dijaha isi ni gulungan i.

Aha ma isi ni gulungan i? Ayat ni Bibel. Disurat do di gulungan i bagian parjolo sian buku 3 Musa. Jala disurat do disi goar ni Debata di bahasa Heber mamangke huruf Tetragramaton. Ra, gulungan i disurat hira-hira taon 50 M dohot 400 M. On gabe gulungan ni Bibel di bahasa Heber na umtua dungkon gulungan Laut Mati. Sahalak baoa na margoar si Gil Zohar manurat taringot gulungan i di The Jerusalem Post. Didok ibana, “Andorang so boi dope dijaha gulungan Engedi i, adong ma hira-hira 1.000 taon lelengna dung disurat Gulungan Laut Mati di taon 100 SM sahat tu disurat Kodeks Aleppo taon 930 M.” Angka pakar paboahon, isi ni gulungan i patuduhon salinan ni halak Masoret taringot Patik “ndang muba isina nang pe naung marribu taon. Jala ndang adong na sala sian salinan na dibahen nasida”.