1. Hombar tu Kolosse 2:4, 8, songon dia do Sibolis manegai pingkiranta?

LOMO do roha ni Sibolis asa unang tasomba be Jahowa. Marsitutu do ibana manegai pingkiranta asa sarupa dohot pingkiranna. Dibahen Sibolis do cara asa taulahon angka na dihalomohon rohana marhite angka na tahalomohon.​—Jaha Kolosse 2:4, 8.

2-3. (a) Boasa ingkon manat hita tu sipaingot na disurat di Kolosse 2:8? (b) Aha do na laho taulas di parsiajaran on?

² Ingkon manat do hita asa unang dililuhon Sibolis. Ingot ma, ndang tu halak na so sisomba Jahowa disurat si Paulus sipasingot na di Kolosse 2:8. Alai tu halak Kristen naung dimiahi tondi parbadia do i disurat ibana. (Kol. 1:2, 5) I do alana ingkon manat do nasida, tarlumobi ma hita saonari. (1 Kor. 10:12) Boasa? Alana nunga didabuhon Sibolis tu tano on. Jala marsitutu do ibana laho mangaliluhon sude naposo ni Debata. (Pgk. 12:9, 12, 17) Asing ni i, “lam tu jahatna” do angka parjahat dohot panipu di tingkinta saonari.​—2 Tim. 3:1, 13.

³ Di parsiajaran on, laho taulas ma songon dia Sibolis mamangke angka “hata na so marguna” laho manegai pingkiranta. Taparsiajari ma tolu “jorat” na dibahen ibana. (Eps. 6:11) Di parsiajaran na mangihut, taulas ma muse songon dia hita boi pasidingkon sude pengaruh ni Sibolis na adong di pingkiranta. Na parjolo, taulas ma aha na boi taparsiajari sian cara ni Sibolis mangaliluhon  halak Israel dung masuk nasida tu Tano na Dijanjihon.

4-6. Hombar tu 5 Musa 11:10-15, boasa ingkon dipauba halak Israel cara ni nasida mangula dung masuk tu Tano na Dijanjihon?

⁴ Malo do Sibolis mangela-ela halak Israel asa manomba gana-ganaan. Songon dia carana? Diboto Sibolis do na dihaporluhon nasida sipanganon. Alani i, dipangke ibana ma cara i laho mangela-ela nasida. Dung masuk nasida tu Tano na Dijanjihon, ingkon diuba nasida do carana laho mangula. Tingki di Mesir, sian sunge Nil do aek na dipangke nasida tu ladang ni nasida. Alai di Tano na Dijanjihon, ndang adong sunge na balga. Ingkon aek udan do na dipangke nasida. (Jaha 5 Musa 11:10-15; Jes. 18:4, 5) Alani i, ingkon diparsiajari halak Israel do muse cara na baru laho mangula. Tontu, ndang mura mangulahon i. Alana godangan sian nasida na malo mangula, nunga mate tingki di padang pasir.

⁵ Dipaboa Jahowa do tu naposona naung muba situasi ni nasida. Dungkon i, dilehon do muse sipasingot tu nasida, alai hira na so adong do hubunganna taringot tu cara mangula. Didok, “Dibahen i ramoti hamu ma dirimuna, asa unang tarela rohamuna laos marbalik hamu, jala dioloi hamu angka debata sileban, huhut marsomba tusi.” (5 Mus. 11:16, 17) Boasa dilehon Jahowa sipasingot taringot manomba gana-ganaan, hape taringot tu cara mangula dope na baru dihatai Ibana?

⁶ Ummalo do halak na so sisomba Jahowa mangula sian halak Israel. Alani i,  diboto Jahowa do boi do gabe tarela-ela halak Israel laho mamparsiajari cara mangula sian halak na so sisomba Jahowa. Alai berbahaya do on tu halak Israel. Alana manomba Baal do angka pangula na di Kanaan. Porsea do nasida, Baal do nampuna langit dohot silehon udan. Alani i, ndang lomo roha ni Jahowa gabe dililuhon ajaran na sala angka naposona. Alai, mulak-ulak do halak Israel manomba Baal. (4 Mus. 25:3, 5; Pang. 2:13; 1 Raj. 18:18) Saonari, parrohahon ma songon dia Sibolis mangoto-otoi halak Israel.

7. Songon dia do haporseaon ni halak Israel diuji tingki di Tano na Dijanjihon?

⁷ Jorat na parjolo na dipangke Sibolis, i ma marhite angka na dihaporluhon. Porlu do aek di halak Israel asa boi mangula. Hape di Tano na Dijanjihon, ndang jotjot ro udan di bulan April sahat tu September. Asa boi nasida tongtong mangolu, ingkon godang do hasil panen ni nasida. Hape somalna, di bulan Oktober do mulai musim udan. Alani i, lomo roha ni Sibolis asa porsea halak Israel tu hasomalan na diulahon angka halak na so sisomba Jahowa, na adong di humaliang ni nasida. Asa ro udan, somal do angka halak na so sisomba Jahowa mambahen pelean tu debata ni nasida. Piga-piga halak Israel na so togu parale-aleonna tu Jahowa marpingkir, boi do nasida tongtong mangolu molo dohot nasida manomba Baal.

8. Aha do jorat na paduahon na dipangke Sibolis? Patorang ma.

⁸ Jorat na paduahon na dipangke Sibolis tu halak Israel, i ma marhite giot-giot ni daging. Angka halak na so sisomba Jahowa huhut do mangulahon seks na so patut tingki manomba debata ni nasida. Jala adong do disi angka baoa dohot borua na gabe pelacur. Didok roha ni nasida, ndang sala mangulahon seks na so patut. (5 Mus. 23:18, 19; 1 Raj. 14:24) Porsea do nasida molo diulahon i, gabe dipasu-pasu debata ni nasida do sude angka suan-suanan ni nasida. Godang do halak Israel gabe dohot mangulahon seks na so patut. Jala dohot do nasida manomba debata na asing. Sasintongna, nunga dioto-otoi Sibolis nasida.

9. Hombar tu Hosea 2:18, 19, songon dia do Sibolis mambahen halak Israel dao sian Jahowa?

⁹ Jorat na patoluhon na dipangke Sibolis tu halak Israel, i ma mambahen halak Israel dao sian Jahowa. Di tingki ni si Jeremia dipaboa Jahowa do adong angka panurirang na so sintong na mambahen naposona mangalupahon goar ni Jahowa “binahen ni Baal”. (Jer. 23:27) Ndang dipangke naposo ni Debata be goar ni Jahowa. Jala diganti nasida do i dohot goar ni Baal na lapatanna “Tuan”. On mambahen halak Israel maol mamboto dia panombaon tu Jahowa dohot tu Baal. Ujungna dipadomu nasida ma panombaon tu Baal dohot tu Jahowa.​—Jaha Hosea 2:18, 19.

10. Aha do jorat na dipangke Sibolis saonari?

¹⁰ Saonari, dipangke Sibolis dope jorat na sarupa. Dioto-otoi ibana do angka halak marhite angka na dihaporluhon, giot-giot ni daging, dohot mambahen halak dao sian Jahowa. Saonari, taulas ma songon dia Sibolis mambahen halak dao sian Jahowa.

11. Songon dia do Sibolis mambahen halak dao sian Jahowa?

 ¹¹ Mambahen halak dao sian Jahowa. Dung mate angka apostel ni Jesus, piga-piga halak Kristen na murtad paboahon ajaran na so sintong. (Ul. 20:29, 30; 2 Tes. 2:3) Ndang dipaboa nasida taringot Debata na sintong. Umpamana, dihapus nasida do goar ni Debata di Bibel. Jala diganti nasida do i gabe gelar songon ‘Tuhan’. Gabe ndang diboto angka halak na manjaha Bibel be na imbar do Jahowa sian debata na asing. (1 Kor. 8:5) Jala dipangke nasida do gelar ‘Tuhan’ tu Jahowa dohot Jesus. Alani i, gabe ndang diantusi nasida be na imbar do Jahowa dohot Jesus. (Joh. 17:3) On mambahen gabe adong ajaran debata Sitolu Sada, na so adong diajarhon di Bibel. Ujungna, gabe godang ma halak marpingkir, ndang boi ditanda nasida Debata jala ndang boi marale-ale tu Ibana. Gabus na mansai jahat do on.​—Ul. 17:27.

12. Hombar tu Rom 1:28-31, aha do na diulahon agama palsu jala aha do akibatna?

¹² Giot-giot ni daging. Di tingki ni halak Israel, dipangke Sibolis do agama palsu laho mangela-ela halak asa mangulahon seks na so patut. Saonari, sarupa dope na diulahon ibana. Dipaloas agama palsu do angka halak mangulahon seks na so patut. Didok roha ni nasida, ndang sala mangulahon i. Jala godang do naposo ni Debata ndang be mangihuthon prinsip ni Bibel. Di suratna tu halak Rom, dipaboa si Paulus do aha akibat ni ajaran ni agama palsu. (Jaha Rom 1:28-31.) “Angka ulaon na so patut”, i ma sude ulaon seks na so patut dohot ma i angka baoa na mangulahon seks dohot baoa. (Rom 1:24-27, 32; Pgk. 2:20) Alani i, mansai ringkot do di hita mangihuthon ajaran ni Bibel!

13. Aha do muse jorat na dipangke Sibolis?

¹³ Angka na tahaporluhon. Tontu, lomo do rohanta manarihon sude na porlu di hita dohot di keluarganta. Jala lomo do rohanta mamparsiajari piga-piga keterampilan asa boi mangulahon i. (1 Tim. 5:8) Somalna, angka keterampilan i boi do tadapot molo ringgas hita marsiajar tingki singkola. Alai ingkon manat do hita. Di godang negara, angka  singkola ndang holan mangajarhon keterampilan, alai diajarhon do muse ajaran ni jolma. Umpamana, dijujui do angka parsingkola asa unang porsea na tutu adong Debata jala asa unang mangihuthon prinsip ni Bibel. Didok do muse, molo sude halak na malo porsea do tu evolusi. (Rom 1:21-23) Maralo do ajaran sisongon i tu “bisuk ni Debata”.​—1 Kor. 1:19-21; 3:18-20.

14. Aha do na dijujui ajaran ni jolma?

¹⁴ Maralo do ajaran ni jolma tu na diajarhon Jahowa. Ajaran i mambahen sasahalak maol patuduhon parbue ni tondi. Alai gabe “parniulaon ni daging” do na dipatudu. (Gal. 5:19-23) Jala ajaran i manjujui halak gabe marginjang ni roha. Alani i, godang jolma saonari gabe “mangkaholongi dirina sandiri”. (2 Tim. 3:2-4) Hape lomo roha ni Jahowa asa dipatudu naposona serep ni roha. (2 Sam. 22:28) Piga-piga halak Kristen na kuliah boi do gabe marpingkiran songon halak di portibi on. Jala ndang diihuthon nasida be bisuk sian Debata. Taulas ma sada contoh.

15-16. Sian pengalaman ni sahalak donganta, aha do na boi diparsiajari hamu?

¹⁵ Sahalak donganta na dohot tu dinas sepenuh waktu saleleng 15 taon mandok, “Sahalak Sitindangi naung tardidi do ahu, jala nunga huboto sipasingot taringot bahaya ni kuliah. Alai ndang huparrohahon sipasingot i. Didok rohangku, ndang tu ahu sipasingot i.” Aha ma hasusaan na diadopi ibana? Didok ibana muse, “Dung kuliah, gabe suda do tingki dohot gogongku laho mangihuthon  angka parsiajaran. Gabe ndang adong be tingkingku laho martangiang songon na somal huulahon. Ala nunga loja, gabe ndang laho be ahu marbarita jala ndang hubahen be persiapan tu parpunguan. Alai huboto ma, gabe sega do parale-aleonku tu Jahowa alani kuliah. Ingkon hutadingkon do kuliah i. Jala marhasil do ahu mangulahon i.”

¹⁶ Aha do pengaruh ni kuliah tu donganta i? Didok ibana, “Husolsoli do ala mamillit kuliah. Tingki kuliah, diajarhon do asa holan hasalaan ni na asing na huida, tarlumobi hasalaan ni dongan sahaporseaon. Gabe hupangido do lobi sian na boi diulahon nasida jala ndang lomo be rohangku mardongan dohot nasida. Leleng do asa boi hupasiding pingkiran sisongon on. Pengalaman on mangajarhon tu ahu, gabe susa do halak molo ndang mamparrohahon sipasingot sian Debata marhite organisasina. Jahowa do na umboto taringot ahu, lobi sian diringku sandiri. Sasintongna ingkon hutangihon hian do Ibana!”

17. (a) Aha do na ingkon tongtong taingot dohot taulahon? (b) Aha do na laho taulas di parsiajaran na mangihut?

¹⁷ Marsitutu ma asa unang dililuhon Sibolis marhite “ajaran ni jolma dohot angka hata na so marguna”. Unang ma dioto-otoi Sibolis hamu. (1 Kor. 3:18; 2 Kor. 2:11) Jala sai ulahon ma aha na dihalomohon roha ni Jahowa. Tongtong ma ihuthon prinsip na diajarhon Jahowa. Jala tangihon ma sude sipasingotna. Alai, aha do na ingkon ulahononmu molo dihilala hamu nunga mangihuthon pingkiran ni angka halak di portibi on? Di parsiajaran na mangihut, laho taulas ma songon dia prinsip ni Bibel boi mangurupi hita laho pasidingkon pingkiran dohot hasomalan na so denggan na “togu dipajongjong”.​—2 Kor. 10:4, 5.