Tutu, adong do surusuruan na jahat. Sian dia do haroroan ni nasida? Taingot ma, dilehon Debata do silehonlehon tu surusuruan, i ma hak laho mamillit. Dung ditompa si Adam dohot si Hawa, adong ma sada sian surusuruan i na so denggan mamangke hakna laho mamillit. Dijujui ma si Adam dohot si Hawa asa mangalo tu Debata, jala marhasil do ibana. (1 Musa 3:1-7; Pangungkapon 12:9) Ndang tangkas dipaboa di Bibel ise do goarna manang aha do jabatanna di surgo. Alai dung dialo Debata, di Bibel digoari do ibana Setan, lapatanna ”Pangalo”, jala Sibolis lapatanna ”Pargabus”.​—Mateus 4:8-11.

Alai, ndang holan ibana na mangalo tu Debata. Di tingki ni si Noak, adong do pigapiga surusuruan na ”manadingkon inganannasida hian”, i ma surgo. Tuat ma nasida tu tano on jala manuman gabe jolma laho mangulahon sangkap dohot ulaon na rorang. Imbar situtu do on tu sangkap ni Debata taringot tu surusuruan.​—Judas 6; 1 Musa 6:1-4; 1 Petrus 3:19, 20.

Aha do muse na masa tu angka surusuruan on? Tingki Debata parohon aek na sumar laho mangaripashon parjahat sian portibi on, mulak ma muse nasida mardaging tondi. Alai, ndang diloas Debata be nasida mulak tu ”panggomgomionna” hian. Gariada, dipatutoru Debata ma nasida jala dibahen tu ”lung haholomon”, na digoari Tartarus. (Judas 6; 2 Petrus 2:4, Terjemahan Dunia Baru) Diloas angka begu i do nasida dirajai Setan, i ma ”induk ni angka sibolis”, na ’pasumansuman dirina songon suruan hatiuron’.​—Mateus 12:24; 2 Korint 11:14.

Dipaboa do di Bibel taringot tu Harajaon Mesianik ni Debata, i ma sada pamarentaon di surgo naung mamarenta sian taon 1914. * Dungkon i, dipabali ma Sibolis dohot angka begu sian surgo tu tano on. Tarrimas jala lomo situtu do rohanasida mangaliluhon angka jolma, i do umbahen lam godang hajahaton dohot angka na rorang di tano on.​—Pangungkapon 12:9-12.

Alai, godang ni hajahaton dohot na rorang di tano on patuduhon, na laho sae nama tingki ni nasida mangarajai portibi on. Ndang sadia leleng nai, dipaso Debata ma angka ulaon ni nasida i. Dung mamarenta Harajaon ni Debata di Paradeiso di tano on saleleng saribu taon, dilehon ma tingki na parpudi sahali tu nasida laho mangunjuni angka jolma. Dung i, diripashon ma nasida salelenglelengna.​—Mateus 25:41; Pangungkapon 20:1-3, 7-10.