TIKKI disukkun tu si Lisa aha do na mambahen ibana tertarik tu hasittongan, didok ibana, “Haburjuon ni akka dongan do na paling berkesan di au.” * Songon i do tong si Anna. Didok ibana, “Dang holan ajaran ni Saksi Jahowa na mambahen au tertarik. Alai haburjuon ni akka Saksi i do na paling berkesan di au.” Saonari nungnga tardidi be nasida na dua gabe Saksi Jahowa. Lomo do roha ni nasida manjaha dohot mangarimangi isi ni Bibel. Alai, anggo na paling berkesan di nasida, i ma haburjuon ni akka dongan di huria.

Songon dia do carana patuduhon haburjuon tu na asing? Boi do tapatudu i sian pakkataion dohot tindakanta. Di artikel on naeng tabahas ma songon dia mangulahon i jala boasa porlu tapatudu i.

Di Poda bindu 31 didok do molo istri na marbisuk i ‘toktong burju’ tikki makkatai. (Poda 31:26) Jolo dipikkirhon ibana do aha na lao didokkon jala songon dia pasahatton i. Alai dang holan istri, suami pe ikkon diulahon do i. Songon i nang akka natua-tua. Ikkon denggan do nasida makkatai tu gellengna. Biasana molo kasar nasida makkatai, gabe dang olo gellengna i mangoloi. Sebalikna molo lambok halak i makkatai, gabe ummura ma gellengna i mangoloi nasida.

Nang pe dang natua-tua hita, alai ikkon lambok do hita tikki makkatai. Songon dia carana? Songon na dipaboa di kalimat na parjolo di Poda 31:26, ikkon “marbisuk do [hita] tikki makkatai”. Lapatanna ikkon jolo tapikkirhon do aha na naeng tadokkon jala songon dia carana pasahatton i. Tasukkun ma diritta, ‘Gabe lam tenang do perasaanna mambege hatakkon manang gabe muruk?’ (Poda 15:1) Alani i sebelum tadokkon hatatta, ikkon jolo tapikkiri do i.

Didok di bukku Poda, “Dos songon podang na manikkam do akka hata na asal dipandok.” (Poda 12:18) Taingot ma, berpengaruh do hata dohot caratta makkatai tu perasaan ni halak. Alani i, hati-hati ma hita tikki makkatai. Halak na ‘toktong patuduhon haburjuon’, dang kasar makkatai jala dang olo mandok hata na mambahen haccit roha ni na asing. (Eps. 4:31, 32) Sebalikna toktong do positif cara marpikkirna jala lambok tikki makkatai. Dibahen Jahowa do contoh na denggan taringot i tikki dipatogu ibana si Elia. Tikki makkatai suru-suruan na mewakili Jahowa tu si Elia, ‘nanget jala lambok do soarana’. (1 Raj. 19:12) Alai unang ma holan sian pakkataion tapatudu haburjuonta. Ikkon tarida do i sian tindakanta. Songon dia ma carana?

Molo tapatudu haburjuon sian pakkataion dohot tindakanta, na maniru Jahowa do hita disi. (Eps. 4:32; 5:1, 2) Si Lisa na dipaboa nakkin manceritahon haburjuon na dipatudu akka Saksi tu ibana. Didok ibana, “Hea do keluarganami, ikkon hatop pinda jabu. Pittor ro ma dua  pasang Saksi Jahowa na sengaja cuti lao mangurupi hami. Hape tikki i, dang marsiajar Bibel dope au.” Haburjuon na dipatudu akka Saksi i mambahen si Lisa gabe olo marsiajar Bibel.

Si Anna na dipaboa nakkin pe terkesan do tu haburjuon na dipatudu akka Saksi Jahowa. Didok ibana, “Ala godang huida jolma na jahat di portibi on, gabe maol do au porsea tu halak. Jadi tikki pajuppang au dohot Saksi Jahowa, dang porsea au tu nasida. Sukkun-sukkun do rohakku, ‘Alani aha do halak i burju tu au?’ Alai ala sai torus do burju guru studikku tu au, gabe porsea ma au tu ibana jala lam serius ma au marsiajar Bibel.”

Jadi, balga do pengaruh ni haburjuon na dipatudu akka donganta tu si Lisa dohot si Anna. Alani i do nasida olo marsiajar Bibel, gabe porsea tu Jahowa dohot tu akka naposona.

Adong do memang halak na sopan jala mura tersenyum ala songon i cara ni nasida dipagodang-godang. Jala songon i  do budaya di tempat tinggalna. Denggan do i. Alai molo holan alani i do hita patuduhon haburjuon, dang na maniru Debata hita disi. Boasa tadok songon i?​—Bandingkon tu Ulaon ni Apostel 28:2.

Lao maniru haburjuon ni Jahowa, ikkon diurupi tondi parbadia ni Debata do hita. Alana sada sian parbue ni tondi do haburjuon i. (Gal. 5:22, 23) Molo taulahon i berarti na holong do rohatta tu Debata. Asing ni i, lomo do rohatta maniru Jesus, gabe parduli ma hita tu na asing. Jadi alasanta patuduhon haburjuon, ala holong rohatta tu Jahowa dohot tu akka dongan. Molo sian ias ni roha do hita patuduhon haburjuon, boi ma tabahen las roha ni Jahowa.

Mura do patuduhon haburjuon tu halak na tatanda manang tu halak na tong burju tu hita. (2 Sam. 2:6) Jala i do sada carana mandok mauliate tu nasida. (Kol. 3:15) Alai songon dia molo hita merasa dang layak sasahalak manjalo haburjuonta?

Dibahen Jahowa do teladan na massai denggan taringot patuduhon haburjuon tu sude jolma, dang soal nasida layak mandapot i manang na dang. Di Akka Bukku Junani Kristen, jotjot do dipakke hata “asi ni roha na massai balga” lao manggombarhon haburjuon ni Jahowa. Hata on patuduhon molo Jahowa marasi ni roha tu sasahalak, dang ala na layak ibana mandapot asi ni rohana i, alai ala burju situtu do Jahowa. Songon dia do Jahowa patuduhon i tu hita?

Pikkirhon ma on: Ala massai burju Jahowa, diparade Ibana do kebutuhan ni sude halak. (Mat. 5:45) Bahkan sebelum tatanda pe Jahowa, nungnga dipatudu Ibana asi ni rohana tu hita. (Eps. 2:4, 5, 8) Misalna rade do Jahowa mangalehon Anakna lao manobus sude jolma. Didok si Paulus, diulahon Jahowa pe i ala ‘balga situtu do asi ni rohana’ tu hita. (Eps. 1:7) Asing ni i nang pe mardosa hita jala sipata tabahen haccit roha ni Jahowa, torus do diajar-ajari Ibana hita jala dilehon petunjuk. Songon “gerimis” do akka petunjukna i. (5 Mus. 32:2) Dang tarbalos hita haburjuon ni Jahowa i. Jala sasittongna, molo dang dipatudu Jahowa asi ni rohana na massai balga i tu hita, dang adong harapanta di ari naeng ro.​—Bandingkon tu 1 Petrus 1:13.

Pasti mandok mauliate do hita ala dipatudu Jahowa asi ni rohana na massai balga i tu hita. Alani i, berupaya ma hita maniru Ibana. Tapatudu ma haburjuon tu sude halak, unang ma holan tu piga-piga halak. Jala tapatudu ma i ganup ari. (1 Tes. 5:15) Molo torus hita patuduhon haburjuon, gabe songon api unggun ma hita di tikki ngali ari. Gabe boi ma tapatogu keluargatta, akka dongan sahaporseaon, dongan sakarejo, dongan sasikkola, dohot na asing.

Tapikkirhon ma akka ise do anggota keluargatta manang donganta di huria na boi tapatogu sian pakkataion dohot tindakanta. Adong do ra akka dongan na porlu diurupi paiasson jabuna manang diurupi belanja. Asing ni i tikki marbarita na uli hita jala taida adong halak na porlu diurupi, sai rade ma hita mangurupi nasida.

Sai anggiat ma torus tatiru Jahowa. ‘Toktong ma tapatudu haburjuon’ sian pakkataion dohot tindakanta.