GODANG do halak mamboto taringot Jesus na dipakkuhon tu hau rap dohot dua parjahat. (Mat. 27:35-38) Alai adong do piga-piga halak na mandok, dang tutu na didok Bibel taringot bakke ni Jesus na denggan dikuburhon.​—Mrk. 15:42-46.

Didok nasida molo adong parjahat na dihukum mate, dang mungkin dipaloas halak Rom denggan dikuburhon bakkena. Sahalak jurnalis na margoar si Ariel Sabar paboahon alasanna boasa adong halak na marpikkir songon i. Di majalah Smithsonian didok ibana, “Molo adong halak na dihukum mate di hau, berarti ibana halak na jahat hian. Alani i, didok nasida do dang mungkin olo halak Rom paloasson parjahat i denggan dikuburhon.” Justru halak Rom naeng pailahon ibana. Jadi biasana dipasombu do bakke ni parjahat i di hau sappe diallangi akka binatang buas. Molo adong sisa-sisa ni bakkena i, dibolokkon ma i tu kuburan umum.

Alai penemuan arkeologi patuduhon, adong do piga-piga halak Jahudi na denggan dikuburhon. Di taon 1968 dapot ni akka arkeolog ma tengkorak ni jolma na dihukum mate di abad na parjolo. Dapot ni nasida ma i di kuburan ni halak Jahudi, di jonok ni Jerusalem. Dibahen ma akka tengkorak i di sada kotak. Di bagasan kotak i, adong do tulang tumitna. Jala di tulang tumitna i adong do bekas pamakkuan na bagasna hira-hira 11, 5 sentimeter. Didok si Ariel, “Tumit ni sahalak bawa do i, na margoar si Yehokhanan. On ma contohna, olo do sipata halak Rom paloasson asa denggan dikuburhon akka parjahat na dihukum mate di jaman ni Jesus. Jala on gabe bukti, tutu do na didok di bukku Injil taringot bakke ni Jesus.”

Memang bukti on boi do mambahen gabe sukkun-sukkun roha ni halak taringot posisi ni Jesus tikki dipakkuhon. Alai sian on taboto ma, adong do bakke ni parjahat na denggan dikuburhon, dang sude dibolokkon tu kuburan umum. On paposson rohatta na sittong do na didok Bibel taringot bakke ni Jesus.

Na paling penting, nungnga dipaboa Jahowa hian na ikkon dikuburhon do Jesus rap dohot na mora. Jala ikkon saut do hata ni Debata i.​—Jes. 53:9; 55:11.