1. Aha do na mambahen hita maol unduk?

 HEA DO maol dihilala hamu unduk? Raja Daud hea do makkilala songon i. Jadi dipangido ibana ma di tangiangna tu Debata, “Bahen ma asa rade rohakku mangoloi Ho.” (Ps. 51:12) Holong do roha ni si Daud tu Jahowa. Alai sipata olo do maol ibana unduk, jala hita pe olo do songon i. Boasa? Na parjolo, alana hita jolma na mardosa. Na paduahon, torus do Sibolis mambahen hita asa unang unduk songon ibana. (2 Kor. 11:3) Na patoluhon, alana hita mangolu di tonga-tonga ni “akka halak na so mangoloi Debata”. (Eps. 2:2) Jadi ikkon berjuang do hita mangalo hagaleotta, Sibolis, dohot portibi on. Jala ikkon unduk do tu Jahowa dohot tu akka halak na dilehon Ibana hak lao mambahen aturan tu hita.

2. Aha do lapatanna “mangoloi”? (Jakobus 3:17)

² Jaha Jakobus 3:17. Panurat ni Bibel i ma si Jakobus mandok, halak na marbisuk rade “mangoloi”. Lapatanna, ikkon rade ma hita mangoloi akka halak na dilehon Jahowa hak lao mambahen aturan tu hita. Alai taingot ma, dang lomo roha ni Jahowa molo taoloi halak na mangorai hita mangulahon parettana.—Ul. 4:​18-20.

3. Boasa ikkon unduk hita tu natua-tuatta, tu pamaretta, dohot akka sintua?

³ Olo do tahilala ummura mangoloi paretta ni Jahowa sian mangoloi paretta ni jolma. Alana taboto, sempurna do Jahowa jala sai sittong do patikna. (Ps. 19:7) Alai molo natua-tuatta, pamaretta, dohot akka sintua dang sempurna nasida. Nang pe songon i, nungnga dilehon Jahowa hak tu nasida lao mambahen aturan tu hita. (Poda 6:20; 1 Tes. 5:12;  1 Ptr. 2:​13, 14) Jadi molo taoloi nasida, sasittongna na mangoloi Jahowa do hita disi. Saonari tabahas ma songon dia caratta mangoloi nasida nang pe sipata dang sai setuju hita tu aturan na dibahen nasida.

4. Boasa godang akka na poso na so mangoloi natua-tuana?

⁴ Godang do na poso saonari na so “mangoloi natorasna”. (2 Tim. 3:​1, 2) Boasa songon i? Adong na makkilala dang sadalan pangalaho ni natua-tuana tu na diajarhon nasida. Na asing mandok, nasehat ni natua-tuana nungnga ketinggalan jaman manang pakakuhu. Hamu akka na poso, hea do hamu makkilala songon i? Maol do dihilala hamu mangulahon paretta ni Jahowa na mandok, “Oloi hamu ma natua-tuamuna hombar tu lomo ni roha ni Tuhan, ai sittong do i.” (Eps. 6:1) Aha do na boi mangurupi hamu mangulahon i?

5. Boasa gabe sitiruon na denggan Jesus taringot mangoloi natua-tua? (Lukas 2:​46-52)

⁵ Boi do hamu marsiajar sian Jesus. Ibana do teladan na dumenggan taringot patuduhon unduk ni roha. (1 Ptr. 2:​21-24) Jolma na sempurna do Jesus, alai dang sempurna natua-tuana. Hea do nasida mambahen kesalahan jala dang diattusi nasida situasi ni Jesus. Nang pe songon i, tetap do dihormati Jesus nasida. (2 Mus. 20:12) On ma na masa tikki marumur 12 taon Jesus. (Jaha Lukas 2:​46-52.) Lao do Jesus tu Jerusalem rap dohot natua-tuana. Alai tikki di pardalanan lao mulak, dang rap Jesus dohot nasida. Sasittongna, tanggung jawab ni si Josep dohot si Maria do mamastihon sude gellengna asa rap dohot nasida tikki di pardalanan lao mulak sian Jerusalem. Alai dung juppang ni nasida Jesus, disalahon si Maria do ibana ala tinggal dope di Jerusalem. Sasittongna, boi do Jesus makkilala dang adil pambahenan ni natua-tuana i. Alai tikki disukkun Jesus, lambok do ibana mangalusi. Memang dang diattusi si Josep dohot si Maria ‘lapatan ni hata ni Jesus i’. Alai “toktong do dioloi [Jesus] nasida”.

6-7. Aha do na porlu diingot akka na poso asa lam mura mangoloi natua-tuana?

⁶ Hamu akka na poso, hea do maol dihilala hamu mangoloi natua-tuamuna tarlumobi tikki dibahen nasida hasalaan, manang tikki dang diattusi nasida songon dia perasaanmuna? Molo hea, aha do na porlu diingot hamu? Parjolo, pikkirhon ma songon dia perasaan ni Jahowa. Didok do di Bibel, oloi hamu ma natua-tuamuna “ai i do na dihalomohon Debata”. (Kol. 3:20) Sipata, olo do dang diattusi natua-tuamuna songon dia perasaanmuna. Manang olo do dibahen nasida peraturan na so mura dioloi hamu. Diboto Jahowa do i sude. Alai molo tetap do hamu unduk tu nasida, gabe las ma roha ni Jahowa tu hamu.

⁷ Na paduahon, pikkirhon ma boha perasaan ni natua-tuamuna. Molo dioloi hamu nasida, gabe las ma roha ni nasida. Jala gabe lam porsea ma nasida tu hamu. (Poda 23:​22-25) Asing ni i, boi ma gabe lam kompak hamu tu nasida. Si Alexandre sian Belgia mandok, “Tikki mulai huulahon aha na dipangido natua-tuakku, gabe lam kompak ma hami jala lam marlas ni roha.” b Na patoluhon, molo dioloi hamu natua-tuamuna, parohon manfaat do i tu hamu di ari na naeng ro. Si Paulo na tinggal di Brasil mandok, “Ala marsiajar au mangoloi natua-tuakku, gabe lam mura ma au mangoloi Jahowa dohot halak na asing  na dilehon Ibana hak lao mambahen aturan tu au.” Dipaboa do di Bibel aha manfaatna molo dioloi hamu natua-tuamuna. Didok, “Asa denggan ngolum jala ganjang umurmu di tano on.”—Eps. 6:​2, 3.

8. Aha do na mambahen godang akka na poso olo unduk tu natua-tuana?

⁸ Godang do akka na poso naung makkilala manfaatna ala unduk nasida. Songon i ma na dihilala si Luiza na sian Brasil. Mulana maol do diattusi ibana boasa dang diloas dope ibana mar-HP. Alana akka donganna na saumuran nungnga mar-HP. Alai gabe disadari ibana ma ujungna aha na nidok ni natua-tuana i sasittongna lao manjaga ibana do i. Diboto ibana ma aturan ni natua-tuana i sasittongna dang na mambatasi ibana. Gariada i do na dihaporluhon ibana. Si Elizabeth sahalak na poso borua na sian Amerika Serikat, olo do sipata maol dihilala ibana mangoloi natua-tuana. Didok ibana, “Tikki maol huattusi boasa dibahen natua-tuakku sada aturan, huingot ma muse manfaat na hea hurasahon ala huoloi aturan ni nasida. Gabe lam denggan do ngolukku.” Si Monica na tinggal di Armenia mandok, umlas do rohana molo dioloi ibana paretta ni natua-tuana.

9. Songon dia do pandangan ni godangan halak taringot hukum ni pamaretta?

⁹ Godang halak setuju porlu do adong “pamaretta”, jala ikkon taoloi do aturan na dibahen nasida. (Rom 13:1) Alai molo dihilala nasida dang adil pamaretta jala pagodangku aturan na dibahen pamaretta i, dang porlu nasida mangihutton i. Misalna, taringot manggarar pajak. Di sada negara di Eropa godang halak mandok, “Molo dang adil pamaretta, marhak do hita dang manggarar pajak.” I do alana di negara i, akka rakyatna dang mambayar sude pajak na dipangido pamaretta sian nasida.

10. Boasa ikkon unduk hita tu peraturan ni pamaretta nang pe dang lomo rohatta?

¹⁰ Memang didok Bibel do, susa do hita dibahen pamarettaon ni jolma na dirajai Sibolis on. Jala taboto do na lao dihancurhon nama i satokkin nai. (Ps. 110:​5, 6; Pjm. 8:9; Luk. 4:​5, 6) Alai nang pe songon i, didok Bibel do tu hita sude “manang ise na mangalo tu pamaretta na mangalo aturan ni Debata do i”. Alana diloas Jahowa dope pamaretta mambahen aturan tu hita asa taratur sude. Jala dipangido Jahowa do asa unduk hita tu nasida. I do alana, talehon ma tu pamaretta “aha na gabe hak ni nasida”, termasuk ma i manggarar pajak, patuduhon hormat tu nasida, jala unduk tu peraturan na dibahen nasida. (Rom 13:​1-7) Olo do ra tahilala aturan na dibahen pamaretta i dang adil, mambahen hita repot, manang rugi. Alai taoloi ma Jahowa, unduk ma hita tu pamaretta saleleng dang maralo i tu paretta ni Jahowa.—Ul. 5:29.

11-12. Songon na disurat di Lukas 2:​1-6, aha do na diulahon si Josep dohot si Maria? Jala aha do hasilna? (Ida gambar.)

 ¹¹ Marsiajar ma hita sian teladan ni si Josep dohot si Maria na rade mangoloi aturan ni pamaretta nang pe maol di nasida. (Jaha Lukas 2:​1-6.) Sada tikki dibahen Kesar Agustus ma aturan asa mulak sude jolma tu huta hatubuanna be lao mandaftarhon diri. Alani i, borhat ma si Josep dohot si Maria tu Betlehem na daona hira-hira 150 kilometer mangalewati luat na mardolok-dolok. Pasti dang mura on di nasida tarlumobi tu si Maria, alana di tikki i nungnga hamil sia bulan ibana. Khawatir do ra nasida taringot keselamatan ni si Maria dohot poso-poso na di bortianna. Songon dia ma annon molo tubu poso-posona i di pardalanan? Hape poso-poso na di bortianna i Messias na dijanjihon Debata. Sasittongna boi do i gabe alasan ni nasida asa unang mangoloi aturan ni pamaretta.

¹² Nang pe godang na dikhawatirhon si Josep dohot si Maria, alai tetap do nasida unduk tu peraturan ni pamaretta. Dipasu-pasu Jahowa do ala unduk nasida. Selamat do nasida sahat tu Betlehem. Sehat do poso-poso na ditubuhon si Maria, jala gabe saut do surirang ni Bibel taringot Messias!—Mik. 5:2.

13. Molo unduk hita tu pamaretta, aha do pengaruhna tu akka dongan?

¹³ Molo taoloi aturan ni pamaretta, parohon laba do i tu diritta sandiri dohot tu na asing. Alana gabe dang hona hukum hita songon na dihilala akka halak na so mangoloi aturan ni pamaretta. (Rom 13:4) Molo taoloi pamaretta, gabe boi ma diida nasida warga negara na burju do Saksi Jahowa i. Taparrohahon ma sada pengalaman di Nigeria marpulu taon na salpu. Adong ma akka tentara na masuk tu Bale Harajaon saleleng acara parpunguan, lao manakkup halak na protes tu aturan ni pamaretta taringot pajak. Alai adong ma sada petugas na mandok tu akka tentara i asa lao sian i. Didok ibana, “Molo Saksi Jahowa on, torus do nasida manggarar pajak.” Jadi, molo dioloi hamu aturan ni pamaretta  gabe denggan ma pandangan ni akka halak taringot Saksi Jahowa. Jala boi ma i melindungi akka dongan.—Mat. 5:16.

14. Aha do na mangurupi sahalak donganta borua asa rade “mangoloi” pamaretta?

¹⁴ Nang pe songon i, olo dope maol tahilala unduk tu pamaretta. Donganta si Joanna na sian Amerika Serikat mandok, “Maol hian do huhilala unduk tu pamaretta ala hea do nasida mambahen na so adil tu keluargakku.” Alai nang pe songon i, berupaya do si Joanna manguba cara marpikkirna. Na parjolo, dang olo be ibana manjaha akka komentar negatif taringot pamaretta na dibahen di media sosial. (Poda 20:3) Na paduahon, martangiang ma ibana tu Jahowa asa diurupi marhaposan tu Ibana, dang tu pamarettaon ni jolma. (Ps. 9:​9, 10) Na patoluhon, dijaha ibana ma akka artikel sian publikasitta na mambahas taringot penting ni toktong netral. (Joh. 17:16) Saonari didok si Joanna, ala nga boi be ibana unduk tu pamaretta jala mangargai nasida, gabe las ma rohana jala “dame pakkilalaanna”.

15. Boasa sipata maol tahilala mangihutton petunjuk sian organisasi ni Jahowa?

¹⁵ Dipangido Jahowa do hita asa ‘mangoloi akka na manguluhon hita’ di huria. (Heb. 13:17) Sempurna do Jesus Pamimpinta. Alai molo akka donganta bawa na dipillit ibana manguluhon huria, dang sempurna nasida. Alani i, olo do ra maol tahilala mangoloi nasida, tarlumobi molo dipangido hita mangulahon na so sesuai tu lomo ni rohatta. I ma na masa tu Apostel Petrus. Diparettahon sada suru-suruan do ibana mangallang jagal ni binatang na ramun menurut Patik ni si Musa. Mulana dang olo si Petrus mangihutton petunjuk i, sappe tolu hali do ditolak ibana i! (Ul. 10:​9-16) Alana dang masuk akkal petunjuk na baru i di si Petrus. Imbar hian do i sian na somal diulahon ibana saleleng ngoluna. Jadi, haru si Petrus maol mangihutton petunjuk sian suru-suruan na sempurna, tarlumobi ma hita! Maol do ra tahilala mangoloi petunjuk sian akka dongan na so sempurna.

16. Nang pe dang masuk akkal dihilala si Paulus petunjuk na dilehon tu ibana, alai aha do na diulahon ibana? (Ulaon ni Apostel 21:​23, 24, 26)

¹⁶ Rade do Apostel Paulus mangihutton petunjuk, nang pe dihilala ibana hira na so masuk akkal petunjuk i. Sada tikki, hea ma dibege halak Kristen Jahudi barita na mandok, molo si Paulus mangajarhon tu akka halak asa manimbil nasida sian “patik ni si Musa”. (Ul. 21:21) Jadi dipangido akka sintua na di Jerusalem ma asa diboan si Paulus opat bawa tu bagas joro lao mambahen ulaon paiasson diri. Tujuanna, asa boi diida akka dongan na diihutton si Paulus do Patik. Sasittongna dang sala si Paulus disi, ala diboto si Paulus do halak Kristen dang porlu be mangihutton Patik ni si Musa. Alai pittor dioloi si Paulus do petunjuk i. “Marsogotna i, ditogihon si Paulus ma siopat halak i asa dibahen nasida ulaon paiasson diri.” (Jaha Ulaon 21:​23, 24, 26.) Ala dioloi si Paulus do petunjuk i, gabe toktong ma nasida marsada.—Rom 14:​19, 21.

17. Aha do na boi diparsiajari hamu sian pengalaman ni si Stephanie?

¹⁷ Parrohahon ma pengalaman ni donganta borua na margoar si Stephanie. Mulana maol do dijalo ibana keputusan na dibahen kantor cabang. Las do rohana dohot suamina melayani di kelompok bahasa asing. Alai dukkon i, ditutup kantor cabang do kelompok i jala ditugasson ma nasida mulak tu huria na mamakke bahasa ni nasida. Didok si Stephanie, “Dang lomo rohakku tu keputusan i. Jala dihilala hami dang dihaporluhon huria i bantuannami.” Nang pe songon i, diputusson  si Stephanie ma lao mendukung keputusan i. Didok ibana, “Ujungna boi ma huida na marbisuk do keputusan ni akka dongan i. Di hurianami na baru, godang do akka dongan na sahalakna di hasittongan. Jadi hami ma na gabe keluarga ni nasida, jala boi hami marsipatoguan. Dung i, boi ma au memandu parsiajaran Bibel dohot sahalak donganta borua naung leleng dang aktif. Jala saonari lam godang do tikkikku lao pelajaran pribadi.” Didok ibana muse, “Saonari nga ias be panggora ni rohakku, alana nungnga huulahon nasa tolaphu lao mangihutton petunjuk sian organisasi.”

18. Aha do manfaatna molo olo hita unduk?

¹⁸ Boi do hita marsiajar gabe halak na unduk. Songon Jesus, ‘marsiajar do ibana mangoloi Debata sian sitaonon na masa tu ibana’. (Heb. 5:8) Dos songon Jesus, hita pe marsiajar do asa unduk tikki masa sitaonon tu hita. Misalna, tikki masa pandemi COVID-19, dipangido do tu hita asa unang tu Bale Harajaon be marpungu. Jala diorai do hita marbarita sian jabu tu jabu. Maol do dihilala hamu mangoloi petunjuk i? Alai ala olo do hamu unduk, gabe selamat ma hamu, toktong marsada dohot akka dongan sahaporseaon, jala gabe las ma roha ni Jahowa tu hamu. Saonari, nungnga lam rade be hita lao mangihutton petunjuk saleleng hasusaan bolon. Molo unduk hita tu akka petunjuk i, gabe selamat ma hita!—Job 36:11.

19. Aha do na mambahen hamu unduk tu Jahowa?

¹⁹ Nungnga marsiajar be hita godang manfaat na tadapot molo olo hita unduk. Alai olo pe hita unduk tu Jahowa, ala na holong do rohatta tu Ibana. Jala lomo rohatta mambahen las rohana. (1 Joh 5:3) Dang boi tarbalosta sude na dibahen Jahowa tu hita. (Ps. 116:12) Alai boi do hita mangoloi Ibana dohot akka halak naung dilehon Ibana hak lao mambahen aturan tu hita. Molo unduk hita tu nasida on patuduhon na marbisuk do hita. Jala molo marbisuk hita, gabe las ma roha ni Jahowa.—Poda 27:11.