Si Josep, sahalak tukang sian Nasaret do bapak tiri ni Jesus. Alai, ise do bapak ni si Josep? Sian buku Mateus, taboto ma si Jakkob do bapakna. Alai, buku Lukas manurat, ”anak ni si Eli” do si Josep. Boasa marimbar hatorangan on?​—Lukas 3:23; Mateus 1:16.

Disurat do di buku Mateus, ”anak ni si Jakkob do si Josep”. Sian hata Junani, ayat on patuduhon si Jakkob do sasintongna bapak ni si Josep. Jala na disurat di buku Mateus, i ma silsilah ni si Josep sian pinompar ni raja Daud. On patuduhon, sian uhum marhak do anak tirina, i ma Jesus gabe raja.

Buku Lukas manurat, ”si Josep, i ma anak ni si Eli”. Hata ”anak ni”, boi do mangartihon ”hela ni”. Songon di Lukas 3:27, sasintongna si Jekonya do bapak ni si Sealtiel, alai didok do ibana ”anak ni si Neri”. (1 Kronika 3:17; Mateus 1:12) Si Sealtiel mangalap boru ni si Neri gabe tungganeboruna. Alani i ma, didok ibana anak manang hela ni si Neri. Dos songon i ma na mambahen si Josep didok ”anak” ni si Eli, ala ibana mangalap si Maria, boru ni si Eli. Alani i, na disurat buku Lukas, i ma silsilah ni Jesus sian ”dagingna” manang jasmani marhite omakna, si Maria. (Rom 1:3) Jadi, Bibel manurat dua hatorangan taringot silsilah ni Jesus na tangkas jala paposhon rohanta.

Di Timur Tengah najolo, imbulu ni birubiru godang do dipangke gabe bahan kain dos songon imbulu ni hambing dohot kulit ni unto. Bahan na jotjot dipangke i ma kain wol. Di Bibel dipaboa do taringot birubiru, panggustingan dohot imbulu ni birubiru. (1 Samu l 25:2; 2 Rajaraja 3:4; Job 31:20) Dipangke do rami na godang tubu di Misir dohot di Israel, bahan mambahen kain linen. (1 Musa 41:42; Josua 2:6) Ndang tubu hapas di Israel, alai dipaboa do di Bibel molo hapas dipangke mambahen kain di Persia. (Ester 1:6) Surta manang sutra, i ma bahan ni kain na arga, na diimpor angka partigatiga na ro sian Timur Jauh.—Pangungkapon 18:11, 12.

Buku Jesus and His World mandok, ”Sasintongna, warna ni kain wol i ma na bontar dohot na coklat na godang corakna.” Dung i, jotjot do muse kain wol diwarnai dohot pewarna kain. Arga do pewarna kain na violet ala dibahen sian sada ragam ni korang. Dipangke do ragam ni suasuanan, angka urat ni suansuanan, bulungbulung dohot serangga laho mambahen pewarna kain songon na rara, na hunik, na balau dohot na birong.