Porsea do hita halak na mate boi mulak mangolu muse? Disurat si Paulus do: ”Anggo holan di tano on hita mangkirim di Kristus i, jolma na dumangol do hita sian saluhutna. Alai nunga hehe Kristus i sian na mate, Ibana do parjolo ni angka na monding i.” (1 Korint 15:19, 20) Si Paulus porsea na tutu do masa haheheon i. Haporseaonna i dipatogu marhite haheheon ni Jesus. * (Ulaon ni Apostel 17:31) I do alana si Paulus mandok Jesus na ”parjolo”—ala ibana do na parjolo dipahehe tu hangoluan na salelenglelengna. Antong molo Jesus do na parjolo, adong dope na asing na laho dipahehe.

Di artikel on diulas ma boasa boi hita porsea tu haheheon. Debata na sintong do Jahowa. ”Debata . . . na so margabus.” (Titus 1:2) Ndang hea margabus Jahowa jala ndang ulahononNa i. Ninna rohamu, bahenonNa do janji na so boi pasautonNa? Daong!

Boasa ingkon paheheon ni Jahowa halak naung mate? Alani holong ni rohaNa. Disungkun si Job do tu Debata: ”Ia dung mate baoa i, tung tagamon ma ulahanna mangolu? Disi Ho joujou di ahu, pintor alusanku do Ho, halungunhononmu tahe jadijadian ni tanganmu.” (Job 14:14, 15) Porsea do si Job na sihol roha ni Jahowa tu halak naung mate. Muba do Debata? ”Ai ndang mubauba anggo ahu”, ninna Jahowa. (Maleaki 3:6) Sai hot do sangkap ni Jahowa asa martua jolma, pasohothon sahit dohot pahehehon halak na mate. Dos songon sahalak natuatua na masihol tu anakna naung mate, songon i ma nang Debata. Alai, molo Debata margogo do pahehehon halak na mate.—Psalmen 135:6.

 Dilehon Jahowa do huaso tu Jesus laho mangapul roha ni na marhabot ni roha. Songon dia do pangkilalaan ni Jesus tu haheheon? Andorang so dipahehe si Lasarus, lungun do rohana marnida iboto dohot aleale ni si Lasarus, jala ”tariluilu ma mata ni Jesus.” (Johannes 11:35) Dipahehe Jesus do muse anak ni sahalak ina na mabalu di huta Nain. Dung i, ”mangkuling ma rohaNa; asi ma rohaNa marnidasa, gabe ninna ma tu ibana: ’Unang tangis ho inang!’ Jala dipahehe Jesus ma anakna i.” (Lukas 7:13) Mansai lungun do roha ni Jesus marnida hamatean dohot halak na marhabot ni roha. Las ma rohanta tingki ndang adong be hamatean di tano on sogot!

Hea do hamu marhabot ni roha? Dihilala hamu do ra, ndang adong na boi paluahon halak sian hamatean. Alai, boi do hita malua sian i, marhite Jesus Anak ni Debata. Ingot ma lomo do roha ni Debata malua hita sian i. Lomo do rohaNa asa jumpang hita dohot halak na tahaholongi naung mate. Jala rap mangolu salelenglelengna!

Si Lionel na dipaboa di artikel na parjolo mandok: ”Songgot rohangku tingki huparsiajari taringot haheheon. Mulana ndang porsea ahu disi, jala ndang porsea ahu tu halak na paboahon i. Alai, dung huida sandiri di Bibel, huboto ma hasintongan do i! Sihol situtu rohangku boi jumpang dohot ompungku.”

Lomo do rohamu, asa mandapot godang hatorangan? Las roha ni Sitindangi Ni Jahowa patuduhon tu hamu, taringot haporseaon ni nasida tu haheheon sian Bibelmuna sandiri. *