1, 2. Aha do didok halak taringot Debata?

GODANG do na mandok ndang diparrohahon Debata aha na diulahon dohot na masa tu jolma. Umpamana, tingki masa udan habahaba di Filipina bulan November 2013, didok sahalak walikota ma, ”Nunga laho Debata tu inganan na asing.”

² Na deba mandok ndang diida Debata aha na diulahon nasida. (Jes. 26:10, 11; 3 Joh. 11) Adong do halak na marpingkiran sisongon on di tingki ni si Paulus. Didok si Paulus ma, ”Diparhamaol nasida na mananda Debata.” Diulahon nasida do na so uhum, hajahaton, roha pangahution dohot late ni roha.—Rom 1:28, 29.

3. (a) Aha do na ingkon tasungkun tu dirinta? (b) Di Bibel, dipatudos tu dia do ”tangan” ni Debata?

³ Molo hita songon dia? Taboto do molo Jahowa mangida sude na taulahon. Alai, pos do rohanta na diparrohahon Jahowa hita? Tahilala do pangurupion ni Jahowa? Di Bibel, ”tangan” ni Debata jotjot do dipatudos tu huasoNa. Dipangke Jahowa do huasoNa laho mangurupi naposoNa dohot manaluhon musuNa. (Jaha 5 Musa 26:8.) Jesus  mandok, adong do halak na boi mangida Debata. (Mat. 5:8) Parsidohot do hita songon nasida? Songon dia do hita boi mangida Debata? Taparsiajari ma sian Bibel halak na porsea dohot na so porsea tu huaso ni Debata. Taparsiajari ma muse songon dia haporseaon mangurupi hita asa mangkilala huaso ni Debata.

4. Boasa musu ni halak Israel ndang porsea tu huaso ni Debata?

⁴ Di tingki naung salpu, godang do halak na mangida dohot manangihon songon dia Debata mangurupi halak Israel. Marhite tanda halongangan, Jahowa paluahon halak Israel sian Mesir jala manaluhon angka raja di Tano Kanaan. (Jos. 9:3, 9, 10) Nang pe naung ditangihon jala diida angka raja songon dia Jahowa paluahon naposoNa alai, ”marluhut ma nasida, marsatahi laho marmusu dompak si Josua dohot dompak Israel”. (Jos. 9:1, 2) Tingki marporang nasida tu halak Israel, diida nasida ma huaso ni Debata. ”Hot ma mataniari i, jala bulan pe ndang mardalan paima ditaluhon bangso i sude musuna.” (Jos. 10:13, Bibel siganup ari) Nang pe songon i, sai dialo nasida do halak Israel ala tongtong do diloas Debata ”tangkang” roha ni nasida. (Jos. 11:20) Gabe talu ma nasida ala ndang porsea na diurupi Jahowa do halak Israel.

5. Aha do na so dihaporseai Raja Ahab?

⁵ Dipatudu Debata do huasoNa tu Raja Ahab na jahat. Didok si Elia ma tu ibana, ”Ndang jadi ro nambur manang udan, manang piga taon on, molo so jolo ahu mandokkon!” (1 Raj. 17:1) Alai, ndang porsea si Ahab boi masa on. Martangiang ma si Elia tu Jahowa jala dibahen Jahowa ma api sian langit. Diida si Ahab do na masa i. Dung i, didok si Elia ma tu si Ahab holan Jahowa do na boi parohon udan asa marujung logo ni ari. (1 Raj. 18:22-45) Nang pe diida si Ahab sude tanda halongangan on alai, tongtong do ndang porsea ibana tu huaso ni Debata. Aha do na taparsiajari sian on? Ingkon porsea do hita tu huaso ni Debata na masa di ngolunta.

6, 7. Aha do dihaporseai halak Gibeon dohot si Rahab?

⁶ Halak Gibeon marimbar do sian bangso na asing. Dihaporseai nasida do huaso ni Debata. Ndang olo nasida mamorangi halak Israel, alai dilului do dalan asa boi mardame dohot halak Israel. Boasa? Ala nunga diboto nasida sude taringot huaso ni Jahowa. (Jos. 9:3, 9, 10) On mambahen nasida porsea na Jahowa do mangurupi halak Israel.

⁷ Dihaporseai si Rahab do huaso ni Jahowa. Nang pe ndang halak Israel ibana, diboto do Jahowa na paluahon halak Israel sian Mesir. Tingki ro dua matamata tu jabuna, didok ma, ”Nunga huboto, naung dilehon Jahowa tano on tu hamu.” Pos do roha ni si Rahab, paluaon ni Jahowa do ibana dohot keluargana. Dipatudu do haporseaonna tu Jahowa nang pe on boi parohon jea tu ibana.—Jos. 2:9-13; 4:23, 24.

8. Aha do na mambahen halak Israel porsea tu huaso ni Debata?

⁸ Ndang songon Raja Ahab, dihaporseai halak Israel do na Debata parohon api sian langit. Didok nasida ma, ”Jahowa do Debata na tutu!” (1 Raj. 18:39) Tangkas ma diida nasida huaso ni Debata.

9. Aha do na mambahen porsea hita tu huaso ni Debata?

 ⁹ Dung taparsiajari halak na so porsea dohot na porsea tu huaso ni Debata, diurupi ma hita mangantusi aha lapatan ni mangida Debata manang mangida huaso ni Debata. Molo lam ditanda hamu Jahowa dohot parangeNa, gabe porsea ma hamu tu huasoNa marhite ”mata ni rohamuna”. (Eps. 1:18) On manjujui hita asa mangihuthon naposo ni Debata, na mangkilala pangurupion ni Jahowa di tingki naung salpu dohot saonari. Alai, adong do patuduhon na diurupi Debata naposoNa saonari?

10. Aha do na patuduhon diurupi Jahowa hita saonari? (Ida ma gombar di mula ni parsiajaran.)

¹⁰ Godang do na patuduhon molo Jahowa tongtong mangurupi hita saonari. Jotjot do tajaha pengalaman ni angka donganta na mangkilala huaso ni Debata, tingki ditangihon tangiang ni nasida. (Ps. 53:3) Umpamana, tingki marbarita si Allan di sada pulo di Filipina, pajumpang ma ibana dohot sada borua na tumatangis. Didok ibana ma, ”Sian na sogot nunga martangiang borua on tu Jahowa, asa boi pajumpang dohot Sitindangi.” Tingki anak boru dope, marsiajar Bibel do ibana dohot Sitindangi, alai dung muli, maringanan ma ibana di pulo on jala ndang marsiajar Bibel be. Hatop do ditangihon Debata tangiangna, gabe las ma rohana. Di bagasan sataon, tardidi ma ibana gabe Sitindangi.

11, 12. (a) Songon dia do Jahowa mangurupi naposoNa? (b) Patorang ma songon dia Jahowa mangurupi donganta borua.

¹¹ Godang do naposo ni Jahowa mangkilala huaso ni Debata. Diurupi do nasida asa unang mangulahon hasomalan na roa songon, marisap, marnarkoba dohot manonton pornografi. Ndang margogo nasida sandiri mangulahon i. Alai, tingki dipangido pangurupion sian Jahowa, dilehon ma ”hagogoon na sumurung”, na mambahen nasida ndang be mangulahon hasomalan na roa.—2 Kor. 4:7; Ps. 37:23, 24.

¹² Diurupi Jahowa do angka naposoNa mangadopi hasusaan. Songon i ma na masa tu donganta borua, si Amy. Disuru ma ibana mangurupi pajongjongkon Bale Harajaon dohot jabu ni missionaris di sada pulo di Samudera Pasifik. Asing do hasomalan disi, sipata ndang mangolu listrik dohot aek, roa dalan, dao sian keluarga, jala tading di inganan na gelleng do ibana. Di sada tingki, muruk ma ibana tu donganta borua. Alai disolsoli ibana do i. Dung borngin, mulak ma ibana tu jabuna jala martangiang ma ibana tu Jahowa mangido pangurupion. Dung galak lampu, dijaha ibana ma Joujou Paboahon taringot wisuda ni Singkola Gilead. Diulas do di artikel i hasusaan na sarupa songon na diadopi ibana. Didok ibana ma, ”Huhilala ma Jahowa mangkatai tu ahu borngin on. Jala boi ma ahu margogo mangulahon karejokku.”—Ps. 44:26, 27; Jes. 41:10, 13.

13. Aha do na patuduhon molo Jahowa mangurupi naposoNa marbarita?

¹³ Diurupi Jahowa do naposoNa tingki mangadopi pamarenta. (Plp. 1:7) Umpamana, tingki pamarenta mangorai hita marbarita na uli, laho do hita tu pengadilan. Lobi sian 268 hali hita monang di pengadilan sian kasus na adong di liat portibi on. Nunga 24 hali hita monang sian taon 2000 di  Mahkamah Eropa untuk Hak Asasi Manusia (ECHR). On patuduhon ndang adong na boi mangambati huaso ni Jahowa!—Jes. 54:17; jaha Jesaya 59:1.

14. Aha do na patuduhon na adong Debata di tongatonga ni naposoNa?

¹⁴ Tarida ma muse huaso ni Debata sian ulaon marbarita na uli di liat portibi on. (Mat. 24:14; Ul. 1:8) Alani pangurupion ni Jahowa do, sude bangso boi marsada ni roha. Sahalak na so Sitindangi mandok, ”Tutu do Debata di tongatongamuna.” (1 Kor. 14:25) Godang do na patuduhon, molo Debata adong di tongatonga ni naposoNa. (Jaha Jesaya 66:14.) Molo hamu songon dia? Dihilala hamu do huaso ni Jahowa di ngolumuna?

15. Boasa sipata ndang tahilala huaso ni Jahowa di ngolunta?

¹⁵ Sipata, olo do lupa hita tu huaso ni Jahowa. Boasa? Tingki taadopi sitaonon na borat, boi do ndang taingot pangurupion ni Jahowa tu hita di tingki naung salpu. Masa ma on tu si Elia. Nang pe halak na barani si Elia, alai tingki marsangkap si Izebel laho mambunu ibana, pintor mabiar do ibana. Ndang diingot be, songon dia huaso ni Jahowa mangurupi ibana di tingki naung salpu. Dipatorang do di Bibel na tumagonan ma ibana mate asa unang mangadopi sitaonon. (1 Raj. 19:1-4) Sian dia do dapot ni ibana pangurupion dohot habaranion? Porlu ma ibana marpangunsandean tu Jahowa!—1 Raj. 19:14-18.

16. Aha do na mangurupi hita asa mangkilala huaso ni Debata?

¹⁶ Ala sai dipingkiri si Job sitaonon na ro tu ibana, gabe ndang diingot be huaso ni Jahowa. (Job 42:3-6) Sipata, boi do hita ndang mangkilala huaso ni Jahowa alani sitaonon na taadopi mansai borat. Aha do na mangurupi hita asa mangkilala huaso ni Debata? Tarimangi  ma poda ni Bibel na mangurupi hita mangadopi sitaonon. Dung i, tahilala ma pangurupion ni Jahowa jala tadok ma, ”Nunga nian dibege pinggolhon lingona taringot tu Ho, alai anggo nuaeng nunga dohot matangku marnida Ho.”

17, 18. (a) Songon dia do hamu boi mangkilala huaso ni Jahowa di ngolumuna? (b) Paboa ma sada pengalaman na patuduhon songon dia Jahowa mangurupi hita saonari.

¹⁷ Songon dia do hamu boi mangkilala huaso ni Jahowa di ngolumuna? Taparrohahon ma lima isara. Parjolo, ingot ma songon dia Jahowa mangurupi hamu mananda hasintongan. Na paduahon, tingki manangihon jamita di parpunguan ra, hea didok hamu, ”Pas hian ma jamita on tu ahu!” Na patoluhon, pingkiri hamu ma songon dia Jahowa mangalusi tangiangmuna. Na paopathon, ingot ma songon dia Jahowa mangurupi hamu boi mangalehon lam godang tingki laho marbarita. Na palimahon, ra hea do ditadingkon hamu sada karejo ala naeng mangalehon lam godang tingki tu Jahowa, jala dihilala hamu ma songon dia Jahowa manggohi janjiNa na mandok, ”Sandok na so tadingkononku do ho.” (Heb. 13:5) Molo togu paralealeonta tu Jahowa, mura ma hita mangkilala huasoNa di ngolunta.

¹⁸ Si Sarah, sahalak donganta borua sian Kenya mandok, ”Hutangiangkon do sahalak parsiajar Bibelhu na huhilala ndang mangargai Bibel. Martangiang ma ahu tu Jahowa asa unang marsiajar be hami. Ndang leleng dung hudok amen, ditelepon parsiajar Bibelhi ma ahu. Didok ma, asa rap hami tu parpunguan! Songgot do rohangku!” Molo tarimangi aha na diulahon Debata tu hita, tahilala ma huasoNa. Si Rhonna, sahalak donganta borua di Asia, paboahon ingkon marsiajar do hita mangarimangi songon dia Jahowa mangurupi hita di ngolunta. Didok ibana muse, ”Molo taulahon i, tahilala ma na diparrohahon Debata do hita!”

19. Aha do na ingkon taulahon asa tahilala huaso ni Debata?

¹⁹ Jesus mandok, halak na mangida Debata ingkon ”parroha na ias”. (Mat. 5:8) Aha do lapatanna? Ingkon tajaga do asa ias pingkiranta jala ndang mangulahon na sala. (Jaha 2 Korint 4:2.) Di artikel on nunga taparsiajari, ingkon togu do paralealeonta dohot Jahowa asa tahilala huasoNa. Di artikel na mangihut, taulas ma songon dia haporseaon mangurupi hita lam tangkas mangkilala huaso ni Jahowa di ngolunta.