Saonari on mura do hita mandapot informasi, termasuk ma i informasi na boi mangurupi hita asa tetap aman dohot sehat. Alai tikki mangalului informasi, parrohahon hamu ma na tolu on:

•   Barita lao mangoto-otoi

•   Laporan na so sittong

•    Teori konspirasi manang teori na so adong buktina

 Misalna saleleng pandemi COVID-19, dipaboa sekretaris-jenderal PBB do na massai godang informasi na sala jala na berbahaya saonari on. Didok, “Lam godang do saran taringot kesehatan, alai godang do i na berbahaya. Jala godang do na muncul saonari akka penipuan na berkaitan tu perawatan kesehatan. Massai godang do barita na so sittong tabege di TV dohot di radio. Godang do teori konspirasi manang teori na so adong buktina na dipaboa di Internet. Nungnga terbiasa be akka halak paboahon na sogo rohana tu sada kelompok, ujungna adong ma kelompok na diparoa-roa.”

 Memang sian najolo nungnga adong halak na paboahon informasi na sala. Alai tarlumobi di tikkitta on nungnga didok di Bibel, “Lam tu jahatna ma akka parjahat dohot panipu, mangaliluhon do nasida jala laos dililuhon.” (2 Timoteus 3:1, 13) Mura do boi tadapot informasi na sala di Internet, dung i pittor tapaboa ma muse tu na asing ala tarippu sittong. Hasilna gabe akka barita na marisi informasi na sala ma na masuk tu email, tu media sosial dohot tu perangkatta.

 Attong songon dia do carana asa unang tartipu hita tu informasi na sala manang tu teori konspirasi? Parrohahon ma piga-piga prinsip ni Bibel na mangihut.

•   Unang ma pittor porsea tu sude na dibege manang na diida hamu

   Didok di Bibel: “Dihaporseai halak na so marpengalaman do sude hata, alai dipikkiri halak na marbisuk do ganup lakkana.”—Poda 14:15.

   Boi do hita mura tartipu molo dang hati-hati. Misalna, adong do sada gambar na dibahen keteranganna manang jotjot do dibahen adong sada video singkat lao dibahen menghibur, biasana digoari do on meme. Jotjot do akka gambar dohot video sisongon on disebarhon melalui Internet manang melalui media sosial. Jadi gambar dohot video boi do mura diubah manang dibahen sesuai tu lomo ni rohatta, hape gambar dohot video i dang lengkap sudena. Jadi boi do sebenarna halak na adong di video manang na di gambar i dang tutu mangulahon songon na disurat manang na dibahen di video i. Alani i boi ma gabe sala pandangan ni halak na mangida gambar manang video i.

   “Menurut akka peneliti, informasi na sala di media sosial jotjot do dibahen dalam bentuk gambar manang video naung diubah, songon meme.”—Axios Media.

   Pikkirhon ma: ‘Tutu do boi dihaporseai barita on manang holan meme do on?’

•   Lului ma sian ise sumber ni barita i jala pareso ma isina

   Didok di Bibel: “Uji hamu ma sasude, pastihon hamu ma dia na sittong.”—1 Tessalonik 5:21.

   Sebelum porsea hita tu sada barita manang sebelum takirim tu halak na asing, nang pe barita i nungnga viral jolo tapastihon ma jo tutu do i manang na dang. Songon dia ma carana?

   Pareso ma tutu do boi dihaporseai sumber ni barita i manang na dang. Alana boi do perusahaan layanan berita dohot organisasi na asing dang paboahon sude informasi ni sada barita, lao mendukung politik manang kepentingan ni nasida sandiri. Alani i molo dapotmuna sada barita, bandikkon ma barita i tu barita na sian sumber na asing. Sipata olo do dang sengaja donganmuna makkirim sada email manang memposting sada barita di media sosial ala dirippu nasida do barita i sittong, hape sala do. Jadi unang ma pittor porsea hamu tu sada barita sebelum dipastihon hamu molo barita i ro sian sumber na boi dihaporseai.

   Pastihon ma molo isi ni barita i memang sittong jala sesuai tu faktana. Coba ma parrohahon tanggalna, pareso ma tutu do akka informasi na dipaboa i boi dihaporseai jala adong do bukti na mendukung informasi i. Apalagi molo sada informasi na rumit dibahen terlalu sederhana ikkon hati-hati do hita. Ala boi do godang perincian na penting na so dipaboa di barita i, manang ikkon hati-hati do hita tu barita na sengaja dibahen lao memancing reaksitta.

   “Mamastihon sada informasi na tajalo i sittong manang na dang boi ma i disarupahon songon penting ni na manussi tangan.”—Si Sridhar Dharmapuri, Petugas Senior PBB di Bidang Keamanan Makanan dan Nutrisi.

   Pikkirhon ma: ‘Tutu do informasi na di barita on sesuai tu na sasittongna? Holan pandapot ni sasahalak do on manang holan cerita ni sada pihak?’

•   Porsea ma hamu tu barita na sesuai tu faktana dang ala sesuai tu na diharappon hamu

   Didok di Bibel: “Manang ise na mangasahon pikkiranna sandiri, halak na oto do i.”—Poda 28:26.

   Biasana pittor langsung porsea do hita molo adong informasi na sesuai tu na taharappon. Jala perusahaan Internet jotjot do mangirim tu hamu informasi berdasarkan aha na dihalomohon hamu jala aha na sering dilului hamu di tikki naung salpu. Alai ingot ma, informasi na tahalomohon i belum tentu selalu sittong.

   “Sebenarna dilehon do tu jolma kesanggupan lao marpikkir dohot mampartimbangkon sada informasi dohot denggan. Alai jotjot do cara berpikirta terpengaruh tu keinginanta, harapanta, dohot kekhawatiranta. Akibatna, gabe ummura ma hita porsea tu sada informasi na sesuai tu harapanta.”—Si Peter Ditto, psikolog sosial.

   Pikkirhon ma: ‘Ala na sesuai tu harapanku do umbahen na porsea au tu barita on?’

•   Unang ma dohot hamu pararatton informasi na sala

   Didok di Bibel: “Unang dohot hamu pararatton barita na so sittong.”—2 Musa 23:1.

   Ingot ma, informasi na dikirim hamu tu halak na asing boi berpengaruh tu pikkiran dohot tu tindakan ni nasida. Bahkan informasi na so sengaja takirim pe boi do massai berbahaya akibatna.

   “On ma na uppetting diulahon sebelum dikirim hamu sada informasi tu na asing. Pikkirhon ma on parjolo, ‘Nungnga yakin au na sittong informasi na lao hubagihon on?’ Molo sude halak mangulahon i, pasti pittor drastis do moru jumlah ni informasi na sala di Internet.”—Si Peter Adams, wakil presiden senior di News Literacy Project.

   Pikkirhon ma: ‘Sittong do informasi na lao hubagihon on?’