Olo. Dang anti vaksin Saksi Jahowa. Alai keputusan masing-masing do naeng divaksin manang na dang. Godang do Saksi Jahowa na olo divaksin.

 Molo marsahit hami, dilului hami do pengobatan na terbaik. Diargai hami do kemajuan di bidang medis lao mangorui pengaruh ni sahit na posi. Jala mandok mauliate do hami tu pengorbanan dohot kerja keras ni tenaga medis, tarlumobi saleleng pandemi on.

 Olo do Saksi Jahowa mangihutton petunjuk sian dinas kesehatan. Misalna saleleng masa pandemi COVID-19, torus do Saksi Jahowa paingotton akka halak marhite situs web on asa mangihutton protokol kesehatan na dibahen pamaretta. Contohna, asa dang marpungu-pungu, asa manjaga jarak, karantina, mancuci tangan, mamakke masker, dohot na asing.—Rom 13:1, 2.

 Nungnga marpulu taon sijahaon na dibahen Saksi Jahowa paboahon informasi on:

•   Masing-masing do halak mambahen keputusan taringot perawatan kesehatan tu dirina.—Galatia 6:5.

   “Dang hea disuru di majalah on asa dijalo hamu sada jenis ubat, terapi, manang sada perawatan kesehatan. Holan informasi taringot i do na dipaboa hami. Jadi hamu sandiri do na mambahen keputusan.”—Awake! 8 Februari 1987.

   “Hamu do na mamutushon naeng divaksin do hamu dohot gellengmuna manang na dang.”—Awake! 22 Agustus 1965.

•   Olo do hami manjalo perawatan kesehatan, alana diargai hami do hangoluan.—Ulaon ni Apostel 17:28.

   “Molo adong Saksi Jahowa na marsahit, dilului nasida do bantuan medis. Diargai nasida do hangoluan jala olo do nasida mangulahon manang aha pe na so maralo tu Hata ni Debata asa boi malum.”—The Watchtower, 1 Juli 1975.

   “Olo do Saksi Jahowa mangallang ubat jala manjalo perawatan medis. Alana lomo do roha ni nasida asa tetap sehat jala ganjang umur ni nasida. Jala godang do Saksi Jahowa na dokter songon si Lukas, i ma halak Kristen di abad na parjolo. . . . Diargai Saksi Jahowa do kerja keras ni tenaga medis. Jala mandok mauliate do nasida tu tenaga medis na mangurus nasida tikki marsahit.”—Menara Pengawal 1 Februari 2011.