Fluwa klikli nga Pɔlu klɛli Korɛntifuɛ mun’n 1:1-31
1 Min Pɔlu mɔ Ɲanmiɛn klun su Klisi Zezi flɛli min kɛ n yo i akoto’m be nun kun’n,+ min nin e niaan bian Sɔstɛnin,
2 é fá fluwa nga é kó mán Ɲanmiɛn i asɔnun m’ɔ o Korɛnti lɔ’n.+ Amun mɔ Klisi Zezi dunman nun’n amun ti Ɲanmiɛn liɛ’n,+ mɔ be flɛli amun kɛ amun yo Ɲanmiɛn i sran’n, amun nin be kwlaa nga lika kwlaa nun’n, be bo e Min Zezi Klisi+ m’ɔ ti be Min nin e Min wie’n i dunman’n:
3 Maan e Si Ɲanmiɛn nin e Min Zezi Klisi be yo amun ye, yɛ maan be yo naan amun di fɔundi.
4 Ye dan mɔ Klisi Zezi dunman nun Ɲanmiɛn yoli amun’n ti’n, n la Ɲanmiɛn ase cɛn kwlaa.
5 Afin kɛ mɔ amun nin i be o nun’n ti’n, amun ɲannin like kwlaa. Ɔ maan amun si ndɛ kan kpa, yɛ amun wun ninnge’m be wlɛ kpa,+
6 Klisi’n i su ndɛ nga be kan kleli amun+ mɔ amun lafi su kpa’n ti.
7 Ɔ maan kɛ amún mínndɛ kpa kɛ e Min Zezi Klisi yi i wun nglo’n,+ amun sa mianman like fi wun.
8 Asa kusu’n, Ɲanmiɛn yó maan amún jrán kekle lele gúɛ i ti nin i bo naan e Min Zezi Klisi i cɛn’n nun’n,+ b’a wunman sa fi amun wun.
9 Ɲanmiɛn mɔ maan be flɛli amun kɛ amun nin i Wa Zezi Klisi m’ɔ ti e Min’n amun bo yo kun’n, ɔ ti nanwlɛfuɛ.+
10 Siɛn’n, aniaan mun, ń srɛ́ amun kɛ e Min Zezi Klisi dunman nun’n, maan amun kwlaa amun kan ndɛ kunngba’n, yɛ nán amun bubu amun wun nun.+ I liɛ’n, amun akunndan’n yó kun.+
11 Afin min niaan mun, Kloe i awlofuɛ wie’m be kannin amun wun ndɛ kleli min. Be waan amun bubu amun wun nun.
12 N se sɔ afin amun nun wie’m be waan: “N ti Pɔlu liɛ.” Wie’m be waan: “Min liɛ’n, n ti Apolɔsu liɛ.”+ Yɛ wie’m be kusu be waan: “Min liɛ’n, n ti Sefasi* liɛ.” Yɛ wie mun ekun be waan, “Min liɛ’n, n ti Klisi liɛ.”
13 ?Klisi bubuli i wun nun? ?Pɔlu yɛ be kunnin i waka’n su be mannin amun-ɔn? ?Annzɛ Pɔlu dunman nun yɛ be yoli amun batɛmun-ɔn?
14 Ń lá Ɲanmiɛn ase afin m’an yoman amun nun wie fi i batɛmun, saan Klisipisi+ nin Gaisi+ yɛ n yoli be batɛmun-ɔn.
15 Ɔ maan sran fi kwlá seman kɛ be yoli amun batɛmun min dunman nun.
16 N yoli Stefanasi i awlofuɛ’m+ be batɛmun wie. Sanngɛ be onga’m be liɛ’n, n siman sɛ n yoli be nun wie batɛmun-o.
17 Afin Klisi w’a sunmanman min kɛ n yo sran’m be batɛmun. Ɔ sunmannin min kɛ n bo jasin fɛ’n.+ Sanngɛ w’a sunmanman min kɛ kɛ ń kán ndɛ’n n yi klɔ sran ngwlɛlɛ’n i nglo,* kɛ ɔ ko yo naan Klisi i wulɛ m’ɔ wuli ɲrɛnnɛn waka’n* su’n, w’a yoman ngbɛn’n ti.
18 Afin ɲrɛnnɛn waka’n* i su ndɛ’n ti sinnzin ndɛ be nga be su mlin’n+ be ɲrun. Sanngɛ e nga y’a fite nun’n e liɛ’n, ɔ yi Ɲanmiɛn i tinmin’n i nglo.+
19 Afin be klɛli i kɛ: “Ń yó maan ngwlɛlɛfuɛ’m be ngwlɛlɛ’n wíe, yɛ ń kpálo fluwa sifuɛ’m be klun akunndan mun.”+
20 ?Ngwlɛlɛfuɛ’n wo nin? ?Mmla klɛfuɛ’n* wo nin? ?Mɛn* nga nun akplowa sifuɛ’n wo nin? ?Ɲanmiɛn maan mɛn’n nun ngwlɛlɛ’n w’a kaciman sinnzin?
21 Kɛ mɔ mɛn’n nunfuɛ’m be lafi be bɔbɔ be ngwlɛlɛ’n+ su’n ti’n, be siman Ɲanmiɛn.+ Ɔ maan ndɛ nga e kan’n sran’m be bu i sinnzin ndɛ.+ Sanngɛ Ɲanmiɛn waan ɔ́ fá ndɛ sɔ’n ɔ́ fá dé be nga be lafi su’n. I lɛ’n nun’n, Ɲanmiɛn kleli kɛ ɔ si ngwlɛlɛ.
22 Afin Zifu’m be kunndɛ abonuan sa mun,+ yɛ Glɛki’m be kunndɛ ngwlɛlɛ.
23 Sanngɛ e liɛ’n, Klisi mɔ be kunnin i waka’n su’n, i ndɛ yɛ e kan-ɔn. Ndɛ sɔ’n yo maan Zifu’m be ja kpla. Yɛ be nga be timan Zifu’n be liɛ’n, ɔ ti sinnzin ndɛ be ɲrun.+
24 Sanngɛ be nga be flɛli be’n, i Zifu-o, i Glɛki-o, Klisi ti’n, be si kɛ Ɲanmiɛn le tinmin, yɛ ɔ si ngwlɛlɛ.+
25 Afin Ɲanmiɛn i like nga sran’m be bu i sinnzin like’n, ɔ ti ngwlɛlɛ like tra like nga mɛn’n nunfuɛ’m be bu i ngwlɛlɛ like’n. Yɛ Ɲanmiɛn i like nga sran’m be bu i kɛ ɔ leman wunmiɛn’n, ɔ le wunmiɛn tra like nga mɛn’n nunfuɛ’m be bu i kɛ ɔ le wunmiɛn’n.+
26 Afin aniaan mun, amun wun kɛ amun mɔ be flɛli amun’n, amun nun sran nga klɔ sran’m be bu be ngwlɛlɛfuɛ’n b’a sɔnman,+ yɛ amun nun sran nga be le kwlalɛ’n b’a sɔnman. Yɛ amun nun sran nga be wuli be wlengbi ba’n,* b’a sɔnman.+
27 Sanngɛ Ɲanmiɛn kpali ninnge nga mɛn’n nunfuɛ’m be bu be finfin ninnge’n naan ngwlɛlɛfuɛ’m be wun ɲannzuɛn. Yɛ Ɲanmiɛn kpali ninnge nga mɛn’n nunfuɛ’m be bu be kɛ be leman wunmiɛn’n naan nga be le wunmiɛn’n be wun ɲannzuɛn.+
28 Asa ekun’n, Ɲanmiɛn kpali ninnge nga be leman ɲrun mɛn’n nunfuɛ’m be ɲrun’n, nin ninnge nga be buman be like fi’n, ɔ nin ninnge nga be nunman lɛ’n, naan ninnge nga be o lɛ’n be yo ngbɛn.+
29 Ɔ yoli sɔ naan sran* fi w’a tumɛn i wun Ɲanmiɛn ɲrun.
30 Sanngɛ i dunman nun ti yɛ amun nin Klisi Zezi be o nun-ɔn. Zezi yi Ɲanmiɛn i ngwlɛlɛ’n, ɔ nin i sa nuan su sɛsɛ yolɛ’n+ be nglo kle e, i ti’n e kwla yo Ɲanmiɛn liɛ.+ Asa ekun’n, ɔ kpɔli e ti naan e kwla ɲan e ti sa tɛ’n i sa nun,+
31 kɛ ɔ ko yo naan ndɛ nga be klɛli’n w’a kpɛn su sɛsɛsɛ’n ti. Be klɛli i kɛ: “Sran nga i waan ɔ́ dí i nuan’n, maan ɔ fa Zoova* di i nuan.”+
Ja ngua lɔ ndɛ mun
^ Be flɛ i ekun kɛ Piɛli.
^ Annzɛ “n kle kɛ n si fluwa dan.”
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
^ Yɛle sran ng’ɔ si Moizi Mmla’n i kpa’n.
^ Nian Ndɛ’m be bo tulɛ lika’n nun lɔ.
^ Annzɛ “sran nga be fin sran dan osu’n nun’n.”
^ Glk., “wunnɛn.”
