Fluwa klikli nga Pɔlu klɛli Korɛntifuɛ mun’n 7:1-40
7 Siɛn’n, fluwa nga amun klɛli’n i su ndɛ nga ń kán’n yɛle kɛ ɔ ti kpa kɛ nán yasua kan bla.*
2 Sanngɛ bla nin bian kunndɛlɛ sukusuku nin i wunsu ɲannzuɛn sa* mɔ w’a tru le nɲɔn nun’n ti’n, maan yasua kun ɲɛn i bɔbɔ i yi liɛ,+ yɛ maan bla kun ɲɛn i bɔbɔ i wun liɛ.+
3 Like ng’ɔ fata kɛ yasua’n yo mɛn i yi’n, maan ɔ yo mɛn i. Yɛ maan bla’n kusu yo i kunngba’n mɛn i wun’n wie.+
4 Bla’n i wunnɛn’n timɛn i bɔbɔ i liɛ, sanngɛ ɔ ti i wun’n i liɛ. I kunngba’n, yasua’n i wunnɛn’n timɛn i bɔbɔ i liɛ, sanngɛ ɔ ti i yi’n i liɛ.
5 Sɛ w’a yoman kɛ amun sran nɲɔn’n amun nuan w’a sɛ su kɛ amún fá blɛ amún srɛ́ Ɲanmiɛn’n, naan i sin’n amun a kan b’a bo nun ekun’n, nán maan amun nun kun se kɛ ɔ nin i wiengu kun’n be laman, kɛ ɔ ko yo naan amun awlɛn mɔ amun kwlá traman’n ti’n, Satan w’a lakaman amun’n ti.
6 N su man amun atin kɛ amun yo sɔ. Sanngɛ nán mmla yɛ n su kpɛ-ɔ.
7 N kunndɛ kɛ yasua’m be kwlaa be ka kɛ min sa. Sanngɛ kɛ Ɲanmiɛn mán e kwlaa e like’n,+ ɔ mannin sran kun nin i liɛ.
8 Siɛn’n, ń sé be nga be leman bla annzɛ bian’n nin angbeti bla’m be kɛ sɛ be ka kɛ min sa’n, ɔ ti kpa man be.+
9 Sanngɛ sɛ be kwlá traman be awlɛn’n, maan be ja bla annzɛ bian. Afin sɛ be ja bla annzɛ bian’n, ɔ flunman tra kɛ be konvi sɔ bla annzɛ bian kunndɛlɛ’n.+
10 Be nga be le bla annzɛ bian’n be liɛ’n, ń sé be kɛ ɔ fataman kɛ bla’n jaso i wun bo. Sanngɛ nán min yɛ n kan-ɔn, e Min’n yɛ ɔ kan sɔ-ɔ.+
11 Sɛ ɔ jaso i wun bo’n, nán maan ɔ ja bian uflɛ. Sɛ kusu ɔ kunndɛman kɛ i ngunmin trán’n, maan ɔ nin i wun be siesie be afiɛn. Yɛ ɔ fataman kɛ yasua kun yaci i yi’n.+
12 Sanngɛ ń sé be nga’m be kɛ sɛ aniaan bian kun i yi’n suman Ɲanmiɛn naan bla’n klo kɛ ɔ nin i bé trán’n, nán maan ɔ yaci i. Nanwlɛ, min yɛ n kan sɔ-ɔ, nán e Min’n niɔn.+
13 Yɛ sɛ bla kun i wun’n suman Ɲanmiɛn naan bian’n klo kɛ ɔ nin i bé trán’n, nán maan ɔ yaci i wun’n.
14 Afin yasua m’ɔ suman Ɲanmiɛn’n, i yi’n ti’n i aja’n ti Ɲanmiɛn liɛ’n su. Yɛ bla m’ɔ suman Ɲanmiɛn’n, i wun’n ti’n i aja’n ti Ɲanmiɛn liɛ’n su. Sɛ ɔ timɛn i ti’n, nn amun mma’m bé yó fiɛn Ɲanmiɛn ɲrun. Sanngɛ siɛn’n, be ti sanwun Ɲanmiɛn ɲrun.
15 Sanngɛ sɛ be nun kun ng’ɔ suman Ɲanmiɛn’n, i waan ɔ́ kɔ́’n,* maan ɔ wɔ. Aniaan bian’n annzɛ aniaan bla’n timan mianfuɛ i sɔ’n nun. Yɛle kɛ Ɲanmiɛn flɛli amun kɛ amun di fɔundi.+
16 ?Afin mmo, sɛ ɔ dunman nun ti yɛ ɔ wun’n fíte nun-o, a wun i wlɛ sɛ?+ ?Annzɛ kusu nja, sɛ ɔ dunman nun ti yɛ ɔ yi’n fíte nun-o, a wun i wlɛ sɛ?
17 Sanngɛ kɛ mɔ Zoova* mannin e tinuntinun e like’n ti’n, ka naan Ɲanmiɛn w’a flɛ e’n,+ wafa nga e ti’n maan e nian su e nanti. Ndɛ nga n kan kle asɔnun’m be kwlaa be nunfuɛ mun’n, yɛ ɔ o lɛ-ɔ.
18 Sran nga kɛ bé flɛ́ i’n b’a wlɛ i klɛn’n,+ maan ɔ ka kɛ ngalɛ’n sa. Sran nga kusu mɔ kɛ bé flɛ́ i’n be nin-a wlɛmɛn i klɛn’n, maan ɔ ka kɛ ngalɛ’n sa.+
19 Sɛ be wlali sran kun klɛn-o, sɛ b’a wlɛmɛn i klɛn-o, nɛ́n i sɔ’n yɛ ɔ ti cinnjin-ɔn.+ Ng’ɔ ti cinnjin’n yɛle Ɲanmiɛn i mmla’m be su falɛ.+
20 Kɛ bé flɛ́ sran kun’n, wafa ng’ɔ ti’n, maan ɔ ka sɔ.+
21 ?I nun nga bé flɛ́ wɔ’n, nn a ti kanga? Sɛ ɔ ti sɔ’n, nán bu i akunndan lele naan ɔ kaci ɔ su ngokɔɛ.+ Sanngɛ sɛ a kwla ɲan ɔ ti’n, fɛ i wun ajalɛ.
22 Afin sran kwlaa ng’ɔ ti e Min’n i sɔnnzɔnfuɛ mɔ kɛ bé flɛ́ i’n ɔ ti kanga’n, w’a ɲɛn i ti, yɛ w’a kaci e Min’n i liɛ.+ I kunngba’n, sran nga kɛ bé flɛ́ i’n ɔ ti diewa’n, w’a kaci Klisi i kanga.
23 Be tuali amun ti kalɛ.+ I sɔ’n ti’n, nán amun yo klɔ sran’m be kanga kun.
24 Aniaan mun, kɛ bé flɛ́ sran kun’n, wafa ng’ɔ ti’n, maan ɔ ka sɔ Ɲanmiɛn ɲrun.
25 Be nga be siman bian annzɛ bla’n* be liɛ’n, e Min’n w’a kanman be su ndɛ w’a kleman min. Sanngɛ min liɛ nga n wun i’n yɛ n kan-ɔn.+ Afin n ti kɛ sran mɔ e Min’n sili i aunnvɔɛ naan ɔ yo nanwlɛfuɛ’n sa.
26 I sɔ’n ti’n, andɛ mɛn mɔ w’a yo kekle’n ti’n, sɛ yasua kun ka kɛ ng’ɔ fa ti’n sa’n, n bu i kɛ ɔ ti kpa mɛn i.
27 ?A le bla? Sɛ ɔ ti sɔ’n, nán kunndɛ kɛ á yáci i.+ ?A leman bla? Sɛ ɔ ti sɔ’n, nán kunndɛ kɛ á já wie.
28 Sanngɛ sɛ a ja bla’n, w’a yoman sa tɛ. Yɛ kusu sɛ sran ng’ɔ siman bla annzɛ bian’n, ɔ ja bla annzɛ bian’n, w’a yoman sa tɛ. Sanngɛ be nga be ja bla annzɛ bian’n, bé wún be ɲin su. N kunndɛman kɛ i sɔ sa’n ɲan amun.
29 Asa ekun’n, aniaan mun, ń sé amun kɛ blɛ ng’ɔ ka’n w’a sɔnman.+ Ɔ maan kɛ ɔ fɛ i andɛ’n, maan be nga be le bla’n be yo kɛ be leman bla sa.
30 Yɛ maan be nga be sun’n, be yo kɛ be sunman sa. Be nga be klun ti jɔwa’n, maan be yo kɛ be klun timan jɔwa sa. Yɛ maan be nga be to like’n, be yo kɛ be leman like sa.
31 Yɛ maan be nga be fa mɛn’n nun ninnge’m be yo be wun sa ye’n, be yo kɛ be fa yoman be wun sa ye kpa sa. Afin mɛn’n su kaci.
32 Nanwlɛ, n kunndɛman kɛ amun koko. Yasua ng’ɔ leman bla’n, e Min’n i ninnge’m be akunndan yɛ ɔ bu-ɔ. Like ng’ɔ ko yo naan e Min’n i klun w’a jɔ i wun’n, i akunndan yɛ ɔ bu-ɔ.
33 Sanngɛ yasua ng’ɔ le bla’n, mɛn’n nun ninnge mun yɛ be lo i-ɔ.+ Like ng’ɔ ko yo naan i yi’n i klun w’a jɔ i wun’n, i akunndan yɛ ɔ bu-ɔ.
34 Ɔ maan i akunndan’n ti nɲɔnnɲɔn. Asa ekun’n, bla ng’ɔ leman bian’n, annzɛ bla ng’ɔ siman bian’n, e Min’n i ninnge’m be akunndan yɛ ɔ bu-ɔ,+ kɛ ɔ ko yo naan i wunnɛn’n nin i akunndan’n b’a yo sanwun’n ti. Sanngɛ bla ng’ɔ le bian’n, mɛn’n nun ninnge mun yɛ be lo i-ɔ. Like ng’ɔ ko yo naan i wun’n i klun w’a jɔ i wun’n, i akunndan yɛ ɔ bu-ɔ.
35 Amun bɔbɔ amun kpa yolɛ ti yɛ n kan sɔ-ɔ, nán amun mianmianlɛ ti-ɔ. N kunndɛ kɛ ń úka amun naan an yo like ng’ɔ nin i fata’n, naan amun a sieman amun ɲin nɲɔnnɲɔn b’a suman e Min’n, naan amun a su i kpa titi.
36 Sanngɛ kusu sɛ sran wie nin-a jaman bla annzɛ bian naan ɔ bu i kɛ ɔ su kwlá trɛmɛn i awlɛn’n, naan ɔ timan bakan kun’n, ɔ flunman kɛ ɔ ja bla annzɛ bian. Sɛ ɔ yo sɔ’n, w’a yoman sa tɛ.+
37 Sanngɛ sɛ sran wie w’a fua kpa kɛ ɔ jaman bla annzɛ bian’n* naan i sɔ yolɛ’n klemɛn i yalɛ’n, yɛ sɛ ɔ kwla niɛn i wun su’n, sa kpa yɛ ɔ su yo i lɛ-ɔ.+
38 Ɔ maan sran ng’ɔ ja bla annzɛ bian’n, w’a yo sa kpa. Sanngɛ sran nga w’a jaman bla annzɛ bian’n, w’a yo sa kpa w’a tra su.+
39 Ɔ fata kɛ bla ng’ɔ le bian’n ɔ nin i wun’n be tran lele saan bian’n w’a wu.+ Sɛ bian’n wu’n, bla’n kwla ja sran ng’ɔ klo’n. Sanngɛ maan sran sɔ’n yo e Min’n i sɔnnzɔnfuɛ.+
40 Min liɛ’n, min waan sɛ ɔ ka lɛ’n, ɔ́ dí aklunjɔɛ kpa. Yɛ n lafi su kpa kɛ n kusu’n, Ɲanmiɛn wawɛ’n sie min wie.
Ja ngua lɔ ndɛ mun
^ Yɛle kɛ, nán ɔ nin bla be si sua.
^ Glɛki nun: pɔɔneia. Nian Ndɛ’m be bo tulɛ lika’n nun lɔ.
^ Annzɛ “ɔ́ yáci i’n.”
^ Annzɛ “Be nga be nin-a jaman bla annzɛ bian le’n.”
^ Annzɛ “ɔ su siman bla annzɛ bian’n.”
