Sa nga Akoto’m be yoli’n 24:1-27
24 Kɛ ɔ dili cɛn ba nnun’n, Ananiasi m’ɔ ti Ɲanmiɛn ɲrun jranfuɛ dan’n+ nin kpɛnngbɛn wie mun, ɔ nin bian nga be flɛ i kɛ Tɛɛtilisi m’ɔ ijɔ sran’m be nuan’n, be bali. Be wa kannin be nin Pɔlu be afiɛn ndɛ’n kleli mɛn siefuɛ’n.+
2 Kɛ be fali ndɛ’n wlali Tɛɛtilisi i nuan’n, ɔ tɔnnin Pɔlu suɛn, ɔ seli kɛ:
“E wun kɛ ɔ dunman nun’n, e di fɔundi dan. Kpɛkun kɛ mɔ a fa ngwlɛlɛ sie mɛn nga’n ti’n, ninnge’m be yo kpa be kɔ be ɲrun.
3 E wun i sɔ liɛ’n lika kwlaa, yɛ e kɛn i ndɛ cɛn kwlakwla. I sɔ’n ti’n, Nannan Felisi, é lá wɔ ase.
4 Kɛ ɔ ko yo naan m’an traman wɔ ase lele’n, ń srɛ́ wɔ, ɔ klun ufue’n ti’n, tie e ndɛ’n kan.
5 E wun kɛ bian ng’ɔ o yɛ’n, ɔ timan kpa kaan sa.*+ Ɔ saci Zifu nga be tran asiɛ wunmuan’n su’n be kwlaa be ti nun naan be jaso siefuɛ’m be wun.+ I yɛ ɔ ti Nazarɛtifuɛ’m be Ɲanmiɛn sulɛ wafa uflɛ’n i su kpɛn’n niɔn.+
6 Ɔ kunndɛli kɛ ɔ́ yó Ɲanmiɛn sua’n i fiɛn. I sɔ’n ti’n, e trɛli i.+
7 *——
8 Kɛ ɔ bɔbɔ á wá úsɛ i sa’n, á wá wún kɛ ndɛ sɔ’m be kwlaa be ti nanwlɛ.”
9 Kɛ ɔ kannin sɔ’n, Zifu’m be kusu be jrɛnnin i sin be seli kɛ ndɛ sɔ’m be ti nanwlɛ.
10 Kɛ mɛn siefuɛ’n mannin Pɔlu i atin kɛ ɔ ijɔ’n, Pɔlu seli kɛ:
“N si kpa kɛ a di mɛn nga nunfuɛ’m be jɔlɛ w’a di afuɛ kpanngban. Ɔ maan kɛ mɔ wɔ yɛ n su kan min ndɛ’n n kle wɔ’n, ɔ yo min fɛ.+
11 N ɔli Zerizalɛmun Ɲanmiɛn sulɛ ɔ nin-a traman cɛn ba blu-nin-nɲɔn (12).+ Ɔ bɔbɔ a kwla usa nun.
12 B’a wunman kɛ e nin sran kun e su si akplowa Ɲanmiɛn sua’n nun lɔ. Yɛ m’an wlawlaman sran fi Ɲanmiɛn sulɛ sua’m be nun annzɛ klɔ’n nun.
13 Yɛ kusu min su ndɛ nga be kan’n, be kwlá kleman wɔ kɛ be ti nanwlɛ.
14 Sanngɛ nanwlɛ, Ɲanmiɛn sulɛ wafa uflɛ nga be kɛnnin i ndɛ lɛ’n, i atin’n su yɛ n nian n su min nannan’m be Ɲanmiɛn’n niɔn.+ Kpɛkun ndɛ kwlaa nga be klɛli i Moizi Mmla’n nun’n, ɔ nin Ɲanmiɛn nuan ijɔfuɛ’m be fluwa’n nun’n,+ n fa be su.
15 Kpɛkun n lafi su kɛ be nga be yoli sa kpa-o, be nga b’a yoman sa kpa-o,+ Ɲanmiɛn wá cɛ́n be.+ Yɛ sran nga be o yɛ’n be kusu be lafi su sɔ wie.
16 I sɔ’n ti’n, n mian min ɲin kpa cɛn kwlaa naan min akunndan’n w’a buman min fɔ Ɲanmiɛn nin sran’m be ɲrun.+
17 Ɔ maan kɛ afuɛ lɔun kpa sinnin’n, n sali min sin Zerizalɛmun kɛ ń kó mán min nvle’n nun yalɛfuɛ’m be like,+ naan ń yí tɛ.
18 Kɛ ń yó ninnge sɔ mun’n, yɛ be toli min Ɲanmiɛn sua’n nun lɔ-ɔ. Bé bá nn m’an wie min wun sanwun yo, kɛ nga mmla’n waan be yo’n sa.+ B’a toman min nin sran kpanngban, yɛ m’an kpɛman ndɛnngan ba. Kɛ ɔ́ yó sɔ’n, nn Zifu nga be fin Azi mɛn’n nun lɔ’n, be nun wie’m be o lɛ.
19 Sɛ n yoli sa tɛ’n, nn be yɛ ɔ fata kɛ be sanman min ɔ ja su-ɔ.+
20 Annzɛ kɛ n wo Jɔlɛ Difuɛ Dandan’m* be ɲrun lɔ’n sɛ n yoli sa tɛ’n, maan sran nga be o yɛ’n be kan.
21 Ndɛ nga kɛ n wo be afiɛn’n n mannin min nɛn’n su n kannin’n, i su ngunmin yɛ be kwla jran naan b’a se kɛ n yoli sa tɛ-ɔ. N seli kɛ: ‘Sran nga be wuli’n be cɛnlɛ’n i su ndɛ’n i ti yɛ be su di min jɔlɛ amun ɲrun andɛ-ɔ!’”+
22 Kɛ mɔ Felisi si Ɲanmiɛn sulɛ wafa sɔ’n*+ i su ndɛ’n ti’n, ɔ mannin be atin kɛ be wɔ. Ɔ seli kɛ: “Sɛ Liziasi m’ɔ ti sonja akpi su kpɛn’n ɔ ba’n, yɛ ń kpɛ́ amun ndɛ’n nun-ɔn.”
23 Kpɛkun ɔ seli sonja ya su kpɛn’n kɛ be tra Pɔlu be wɔ naan be ko niɛn i su. Sanngɛ ɔ kan guali su kɛ be mɛn i atin naan ɔ yo ninnge wie mun. Ɔ seli be ekun kɛ be mɛn i sran’m be atin naan be niɛn i lika.
24 Kɛ ɔ dili le nɲɔn kun’n, Felisi nin i yi Driziyi m’ɔ ti Zifu’n be bali. Ɔ sunmannin sran kɛ be ko flɛ Pɔlu. Kɛ Pɔlu kannin Klisi Zezi i su lafilɛ’n i ndɛ’n, ɔ sieli i su tili.+
25 Sanngɛ kɛ Pɔlu kannin sa kpa yolɛ’n nin be wun su nianlɛ’n, ɔ nin sran’m be jɔlɛ mɔ bé wá dí’n be ndɛ’n,+ srɛ kunnin Felisi, yɛ ɔ seli kɛ: “Andɛ liɛ’n, ɔ ti kpa sɔ, kɔ. Cɛn nga n ɲan min ti’n, ń súnman sran naan ɔ ko flɛ wɔ ekun.”
26 Ɔ bu i kɛ Pɔlu wá mɛ́n i sika. I sɔ’n ti’n, ɔ sunmannin sran kpɛ sunman kɛ be ko flɛ i, kpɛkun ɔ nin i be kokoli yalɛ.
27 Sanngɛ kɛ afuɛ nɲɔn sinnin’n, Pɔɔsiisi Fɛstisi wa sinnin Felisi i osu. Kɛ mɔ Felisi kunndɛ kɛ Zifu’m be bo i dunman kpa’n ti’n,+ ɔ yacili Pɔlu bisua lɔ.
Ja ngua lɔ ndɛ mun
^ Annzɛ “ɔ yo maan lika’n nun sanngan.” Glk., “ɔ ti tukpacɛ m’ɔ sa ndɛndɛ.”
^ Glk.,“Sanedrɛn.”
^ Glk., “Atin sɔ’n.”
