Jue Mun 119:1-176
-
Ɲanmiɛn i ndɛ m’ɔ ti cinnjin’n i klolɛ
-
‘?Wafa sɛ yɛ gbanflɛn’m be kwla yo be atin’n i sanwun-ɔn?’ (9)
-
“N klo ɔ mmla’m be kpa” (24)
-
“N klo ɔ mmla’n kpa!” (97)
-
“N si ngwlɛlɛ n tra be nga be kle min like’n be kwlaa” (99)
-
“Ɔ ndɛ’n ti kɛ kannin sa, ɔ kpaja min bo” (105)
-
“Ɔ ndɛ’n bɔbɔ ba’n ti nanwlɛ” (160)
-
Be nga be klo Ɲanmiɛn i mmla’m be di alaje (165)
-
א [Alɛfu]
119 Be nga be nanti seiin’n,mɔ be nanti Zoova i mmla’n su’n, be liɛsu ti ye.+
2 Be nga be nanti i afɔtuɛ’m be su’n,+mɔ be tu be klun be kunndɛ i’n, be liɛ su ti ye.+
3 Be yoman sa m’ɔ timan su’n,be nanti i atin’m be su.+
4 A seli kɛ
maan be nian nun kpa be nanti ndɛ nga á kán’n su.+
5 Ń srɛ́ kɛ n jran kekle,+naan m’an kwla di ɔ mmla’m be su!
6 I liɛ’n, kɛ ń bú ɔ mmla’m be kwlaa be su akunndan’n,ɲannzuɛn su kunman min.+
7 Kɛ n ko suan jɔlɛ nga a di be nanwlɛ su’n be su like’n,ń tú min klun ń mánmán wɔ.
8 Ń nánti ɔ mmla’m be su.
nán yi min ase le.
ב [Bɛti]
9 ?Wafa sɛ yɛ gbanflɛn kun kwla yo naan i atin’n w’a yo sanwun titi-ɔ?
Sɛ ɔ nian ɔ ndɛ’n su nanti’n yɛ ɔ kwla yo sɔ-ɔ.+
10 N tuli min klun n kunndɛli wɔ.
Nán yaci min lɛ naan n yaci ɔ mmla mun n ko fa atin uflɛ.+
11 N fa ɔ ndɛ’n n sie min klun*+
naan m’an fɔnman ɔ wun.+
12 Ee Zoova, maan manmanlɛ’n yo ɔ liɛ.
Kle min ɔ mmla mun.
13 N fa min nuan bui’n n kan
jɔlɛ nga a dili be’n be kwlaa be ndɛ.
14 N di ɔ afɔtuɛ’m be su aklunjɔɛ+
n tra ninnge kpakpa kwlaa.+
15 Ń bú ndɛ nga á kán’n be su akunndan kpa,*+
yɛ ń fá min ɲin ń síe i ɔ atin’m be su.+
16 N klo ɔ mmla mun.
Min wla su fimanɔ ndɛ’n su.+
ג [Gimɛli]
17 Yo ɔ sufuɛ’n i ye,i liɛ’n, ń ká nguan nun yɛ ń nánti ɔ ndɛ’n su.+
18 Tike min ɲin naan n wun
ɔ mmla’n nun ninnge kpakpa’m be wlɛ weiin.
19 N ti aofuɛ ngbɛn mɛn’n nun.+
Nán fa ɔ mmla mun fia min wun.
20 Min ɲin o
jɔlɛ nga a di be’n be sin kpa blɛ kwlaa nun.
21 Wun tufuɛ mɔ be boli be sannzan mɔ be yaci ɔ mmla mun be fa atin uflɛ’n,a tu be fɔ.+
22 Yo maan be yaci min srilɛ nin min finfin yolɛ,afin n nanti ɔ afɔtuɛ’m be su.
23 Kannzɛ sran dandan’m be tran ase likawlɛ be kan min wun ndɛ bɔbɔ’n,ɔ sufuɛ’n bu ɔ mmla’m be su akunndan.*
24 N klo ɔ mmla’m be kpa.+
Be ti min afɔtuɛ manfuɛ.+
ד [Dalɛti]
25 N la ndutre’n nun.+
Yo maan n ka nguan nun kɛ nga a fa kannin’n sa.+
26 N kannin min atin’m be ndɛ n kleli wɔ, yɛ a tɛli min su.
Kle min ɔ mmla mun.+
27 Yo maan n wun like nga a se kɛ be yo’n be bo,naan n bu sa dandan nga a yo be’n be su akunndan.*+
28 Awlabɔɛ’n ti’n, n kwlá lafiman.
Man min wunmiɛn kɛ nga a fa kannin’n sa.
29 Yo naan m’an faman ato atin’n su,+yɛ fa ɔ mmla’n yo min ye.
30 N fali nanwlɛ atin’n su.+
N wun i wlɛ kɛ jɔlɛ nga a di’n be ti su.
31 N klo ɔ afɔtuɛ mun.+
Ee Zoova, nán yaci min lɛ naan min wla bo min wun.*+
32 Ń nánti* atin nga ɔ mmla’m be kle’n su juejue su,afin a mɛn i lika min awlɛn’n nun lɔ.*
ה [E]
33 Ee Zoova, kle min+ ɔ mmla’m be atin’n,yɛ ń nánti su lele ń gúɛ i ti nin i bo.+
34 Man min ngwlɛlɛ,naan n fa ɔ mmla’n su,naan n tu n klun n nanti su.
35 Fa min sin* atin nga ɔ mmla’m be kle’n su,+afin ɔ man min aklunjɔɛ.
36 Yo maan min awlɛn’n tran ɔ afɔtuɛ’m be su,nán maan ɔ tran aɲinkpli yolɛ’n su.+
37 Yo naan min ɲin w’a tranman ninnge ngbɛnngbɛn’m be su.+
Yo maan n ka nguan nun ɔ atin’n su.
38 Yia nda nga a tali* ɔ sufuɛ’n i nuan,naan be sro wɔ.*
39 Yo naan m’an wunman ɲannzuɛn mɔ n sro i’n,afin jɔlɛ nga a di’n be ti kpa.+
40 Nian kɛ n klo like nga a se kɛ be yo’n niɔn.
Yaci min nguan nun, sa nuan su sɛsɛ m’ɔ a yo’n ti.
ו [Vavu]
41 Ee Zoova, yi ɔ sran klolɛ dan’n i nglo min lika,+de min kɛ nga a fa tali min nda’n sa.*+
42 I liɛ’n, ń tɛ́ sran ng’ɔ kpɛ min nzowa’n i su,afin n fa min wla n gua ndɛ nga a kan’n su.
43 Nán yi ndɛ nanwlɛ’n min nuan nun mlɔnmlɔn,afin n fa min wla’n n gua jɔlɛ nga a di’n su.*
44 Ń nían ɔ mmla’n su ń nánti tititi,blɛ kwlaa nun.+
45 Yɛ ń wlánwlán lika kun mɔ sa fi su ɲanman min lɔ’n* nun,+afin n kunndɛ sa nga a se kɛ be yo’n.
46 Ń kán ɔ afɔtuɛ’m be ndɛ famiɛn’m be ɲrun,yɛ ɲannzuɛn su kunman min.+
47 N klo ɔ mmla mun,nanwlɛ, n klo be.+
48 Ń mán min sa’m be su ɔ mmla mɔ n klo be’n ti,+yɛ ń bú ɔ ndɛ’m be su akunndan.*+
ז [Zayin]
49 Maan ɔ wla kpɛn ndɛ nga a kan kleli* ɔ sufuɛ’n su,ɔ ndɛ sɔ’n yo maan min wla o like kpa su.
50 I yɛ maan min wla gua ase min ɲrɛnnɛn blɛ’n nun-ɔn,+afin ɔ ndɛ’n yoli maan n te o nguan nun.
51 Wun tufuɛ’m be yo min finfin dan,sanngɛ n yaciman ɔ mmla’n n ko faman atin uflɛ.+
52 Ee Zoova, min wla kpɛn jɔlɛ nga a dili be laa’nbe su,+yɛ be yo maan min wlagua ase.+
53 Klunwifuɛ’m be ti’n, m’an fa ya dan,be yaci ɔ mmla mun.+
54 Kan kwlaa nga n tran lɛ’n,*
ɔ mmla’m be ti min jue.
55 Ee Zoova, kɔnguɛ’nmin wla kpɛn ɔ dunman’n su,+kɛ ɔ ko yo naan m’an nanti ɔ mmla’n su’n ti.
56 I sɔ yɛ n yo i titi-ɔ,afin n yo like nga a se kɛ be yo’n.
ח [Ɛti]
57 Zoova yɛ ɔ ti min like liɛ nga n le i’n niɔn.+
N tali nda kɛ ń nánti ɔ ndɛ’m be su.+
58 N tu min klun n srɛ wɔ kpa.+
Si min aunnvɔɛ+ kɛ nga a fa tali min nda’n sa.*
59 N fali min ɲin n sieli i min atin’m be su,kɛ ɔ ko yo naan m’an sa min sin m’an fa ɔ afɔtuɛ’m be su’n ti.+
60 N kpli, yɛ n sisiman min bo
naan m’an nian ɔ mmla’m be su m’an nanti.+
61 Klunwifuɛ’m be ɲanman’m b’a blabla min wun,sanngɛ min wla fiman ɔ mmla’n su.+
62 Kɔnguɛ afiɛn’n, n jaso n la wɔ ase,+jɔlɛ mɔ a di be nanwlɛ su’n ti.
63 N ti be kwlaa nga be sro wɔ’n be janvuɛ,yɛ n ti be nga be yo like nga a se kɛ be yo’n be janvuɛ.+
64 Ee Zoova, ɔ sran klolɛ dan’n w’a yi asiɛ’n,+kle min ɔ mmla mun.
ט [Teti]
65 Ee Zoova, kɛ nga a fa kannin’n sa’n,a yoli ɔ sufuɛ’n i ye.
66 Kle min sa ng’ɔ ti su’n, yɛ yo maan n si sa,+afin n fa min wla’n n gua ɔ mmla’m be su.
67 Ka naan m’an wun min ɲrun’n, n fa atin uflɛ su,sanngɛ siɛn’n, n nanti ndɛ nga a kan’n su.+
68 A ti kpa,+ yɛ sa nga a yo’n be ti kpa.
Kle min ɔ mmla mun.+
69 Wun tufuɛ’m be bua min su ato,sanngɛ n tu min klun n yo like nga a se kɛ be yo’n.
70 Be awlɛn’n w’a kete,+sanngɛ min liɛ’n, n klo ɔ mmla’n.+
71 Kɛ min wla boli min wun’n, ɔ ti kpa,+i sɔ’n yoli maan n suannin ɔ mmla mun.
72 Mmla nga a mannin’n, ɔ ti kpa man min,+ɔ ti kpa tra sika ɔkwlɛ annzɛ sika mma akpi kpanngban.+
י [Yɔdu]
73 Ɔ sa mun be yili min, yɛ be kleli min like.
Man min ngwlɛlɛ,naan n suan ɔ mmla mun.+
74 Be nga be sro wɔ’n be wun min yɛ be di aklunjɔɛ,afin ɔ ndɛ’n su yɛ n fa min wla’n n gua-ɔ.*+
75 Ee Zoova, n si kɛ jɔlɛ nga a di’n be ti su,+yɛ n si kɛ nanwlɛ mɔ a di’n ti yɛ a tuli min fɔ-ɔ.+
76 Yaci, maan ɔ sran klolɛ dan’n+ fɔnvɔ min,kɛ nga a fa tali ɔ sufuɛ’n i nda’n sa.*
77 Yaci min wun sa’n cɛ min naan n ka nguan nun,+afin n klo ɔ mmla’n.+
78 Maan wun tufuɛ’m be ɲin gua ase,afin be yo min tɛ kusu nn m’an yoman sa.*
Sanngɛ min liɛ’n, ń bú like nga a se kɛ be yo’n be su akunndan.*+
79 Maan be mɔ be sro wɔ’n, mɔ be si ɔ afɔtuɛ mun’n,be sa be sin min wun.
80 Nán maan min awlɛn’n yo nɲɔnnɲɔn ɔ mmla’m be su falɛ’n nun,+kɛ ɔ ko yo naan m’an wunman ɲannzuɛn’n ti.+
כ [Kafu]
81 Min ɲin o delɛ m’ɔ fin wɔ’n i sin,+afin ɔ ndɛ’n su yɛ n fa min wla’n n gua-ɔ.*
82 Min ɲin o ɔ ndɛ’n i sin,+n usa kɛ: “?Cɛn benin ko yɛ á fɔ́nvɔ min-ɔn?”+
83 Afin m’an yo kɛ nzue kplo wie mɔ wunsrɛn’n ti’n w’a wu kee’n sa,sanngɛ min wla fiman ɔ mmla’m be su.+
84 ?Ɔ sufuɛ’n mínndɛ lele cɛn benin?
?Cɛn benin yɛ á dí be nga be kle min yalɛ’n be jɔlɛ-ɔ?+
85 Wun tufuɛ mun, be mɔ be diman ɔ mmla’n su’n,be fu min bo kunman.
86 Be kwla lafi ɔ mmla’m be kwlaa be su.
Sran’m be kle min yalɛ kusu nn m’an yoman sa, uka min!+
87 Ɔ ka kan naan b’a nunnun min asiɛ’n su,sanngɛ m’an yaciman like nga a se kɛ be yo’n be yolɛ.
88 Yo maan n ka nguan nun, ɔ sran klolɛ dan’n ti.
I liɛ’n, ń nánti ɔ afɔtuɛ nga a mannin be’n be su.
ל [Lamɛdi]
89 Ee Zoova,ɔ ndɛ’n ɔ́ ká ɲanmiɛn su lɔ tititi.+
90 Nanwlɛ mɔ a di’n, ɔ wo lɛ blɛ kwlaa nun.+
A takali asiɛ’n i kpa, ɔ maan kɛ ɔ o lɛ’n yɛ ɔ o-ɔ.+
91 Ɔ jɔlɛ nga a di’n ti’n, be o lɛ lele andɛ,*
afin be kwlaa be ti ɔ sufuɛ.
92 Sɛ ɔ ti kɛ m’an kloman ɔ mmla’n,nn n wuli min ɲrɛnnɛn’n nun.+
93 Min wla su fiman like nga a se kɛ be yo’n su le,afin be dunman nun’n, a yoli maan n kali nguan nun.+
94 N ti ɔ liɛ, de min,+afin n kunndɛli like nga a se kɛ be yo’n.+
95 Klunwifuɛ’m be kunndɛ kɛ bé núnnún min,sanngɛ n fa min ɲin n sie i ɔ mmla’n su kpa.
96 Like kwlaa ng’ɔ ti kpa’n, ɔ le i nuan su,sanngɛ ɔ mmla’n i liɛ’n, ɔ lemɛn i nuan su.*
[ Memun]
97 N klo ɔ mmla’n kpa!+
N bu su akunndan* aliɛ ba kwlaa nun.+
98 Ɔ mmla’n yo maan n si ngwlɛlɛ n tra min kpɔfuɛ mun,+afin n kpɔcimɛn i le.
99 N si ngwlɛlɛ n tra be nga be kle min like’n be kwlaa.+
Afin n bu ɔ afɔtuɛ’m be su akunndan kpa.*
100 N yo ninnge mun ngwlɛlɛ su n tra kpɛnngbɛn mun,afin n yo like nga a se kɛbe yo’n.
101 N kplinman su kɛ ń sín atin tɛ wie fi su,+kɛ ɔ ko yo naan m’an nian ɔ ndɛ’n su m’an nanti’n ti.
102 N kaciman min sin n siman jɔlɛ nga a di be’n,afin a kleli min like.
103 Ɔ ndɛ’m be yo fɛ dan min lalolalo’n nun,be yo fɛ tra awɛma nzue min nuan nun!+
104 Like nga a se kɛ be yo’n be ti’n, n yo ninnge mun ngwlɛlɛ su.+
I sɔ’n ti yɛ n kpɔ atin kwlaa ng’ɔ ti tɛ’n niɔn.+
נ [Nunnun]
105 Ɔ ndɛ’n ti kɛ kannin sa, ɔ kpaja min bo,yɛ ɔ kpaja min atin’n su.+
106 N tali nda kun, yɛ ń yíɛ i nuan,naan ń fá ɔ jɔlɛ mɔ a di be nanwlɛ su’n be su.
107 Min wla w’a bo min wun dan.+
Ee Zoova, yo maan n ka nguan nun kɛ nga a fa kannin’n sa.+
108 Ee Zoova, maan min klunklo like nga n man n fa manman wɔ’n+ ɔ jɔ ɔ klun,yɛ kle min ɔ jɔlɛ nga a di’n.+
109 Min nguan’n wo wie nuan titi,sanngɛ min wla fiman ɔ mmla’n su.+
110 Klunwifuɛ’m b’a sua min wun aya,sanngɛ n yaciman like nga a se kɛ be yo’n be lɛ n ko faman atin uflɛ.+
111 N fa ɔ afɔtuɛ mun n fa yo min liɛ titi,*
afin be yo maan minklun jɔ.+
112 M’an fua kpa kɛ ń nánti ɔ mmla’m be su
blɛ kwlaa nun, lele ń gúɛ i ti nin i bo.
ס [Samɛki]
113 N kpɔ be nga be awlɛn’n ti nɲɔnnɲɔn’n,+sanngɛ n klo ɔ mmla’n.+
114 A ti min fiawlɛ nin min ɲrɛn,+afin ɔ ndɛ’n su yɛ n fa min wla’n n gua-ɔ.*+
115 Klunwifuɛ mun, nán amun fa amun wun mantan min,+kɛ ɔ ko yo naan m’an nanti min Ɲanmiɛn’n i mmla’m be su’n ti.
116 Suan min bo kɛ nga a fa tali nda’n sa.*+
I liɛ’n, ń ká nguan nun.
Nán maan like mɔ min wla o su’n ɔ kaci awlabɔɛ.*+
117 Suan min bo naan n fite nun.+
I liɛ’n, ń fá min ɲin ń síe i ɔ mmla’m be su kpa.+
118 A kpalo be kwlaa nga be yaci ɔ mmla mun’n, mɔ be fa atin uflɛ’n,+afin be ti gblɛfuɛ nin sran lakafuɛ.
119 A kpalo klunwifuɛ mun asiɛ’n su kɛ wla sa.+
I sɔ’n ti yɛ n klo ɔ afɔtuɛ mun’n niɔn.
120 Srɛ m’ɔ kun min ɔ wun’n ti’n, n usu,n sro ɔ jɔlɛ nga a di’n.
ע [Ayin]
121 N yoli sa kpa, ɔ nin sa ng’ɔ ti i nuan su’n.
Nán yaci min be mɔ be kle min yalɛ’n be sa nun!
122 Ta nda kɛ á úka ɔ sufuɛ’n.
Nán maan wun tufuɛ’m be kle min yalɛ.
123 Min ɲinma’m b’a minndɛ delɛ m’ɔ fin wɔ’n leleb’a fɛ,+ɔ nin nda nga a tali’n m’ɔ ti kpa’n.*+
124 Yi ɔ sran klolɛ dan’n i nglo ɔ sufuɛ’n i lika,+yɛ kle min ɔ mmla mun.+
125 N ti ɔ sufuɛ, man min ngwlɛlɛ,+naan n si ɔ afɔtuɛ mun.
126 Blɛ’n w’a ju kɛ Zoova yo like kun,+afin be fɔnnin ɔ mmla’n.
127 I sɔ’n ti yɛ n klo ɔ mmla mun’n niɔn,n klo be n tra sika ɔkwlɛ, n klo be n tra sika ɔkwlɛ jrɛiin’n* bɔbɔ.+
128 Ɔ maan like kwlaa nga a se kɛ be yo’n, n bu be like kpa.+
N kpɔ atin kwlaa ng’ɔ ti tɛ’n.+
פ [Pe]
129 Ɔ afɔtuɛ’m be yo ɲɛnmɛn.
I sɔ’n ti yɛ n nian be su n nanti’n niɔn.
130 Kɛ be yiyi ɔ ndɛ’m be nun’n lika’n kpaja,+ɔ yo maan sran ng’ɔ siman sa’n ɔ si ngwlɛlɛ.+
131 N trɛ min nuan’n nun kpa yɛ n fɛfɛ,afin min ɲin o ɔ mmla’m be sin kpa.+
132 Kpɛ ɔ ɲin min su wa, yɛ si min aunnvɔɛ,+kɛ nga a fa yo i be ngabe klo ɔ dunman’n be lika’n sa.+
133 Maan ɔ ndɛ’n yo maan min ja’m be taka kpa,nán maan sa tɛ fi tinmin su.+
134 De min* be nga be mianmian min’n besa nun.
I liɛ’n, ń yó like nga a se kɛ be yo’n.
135 Yo maan ɔ ɲrun’n kpaja ɔ sufuɛ’n i su,+yɛ kle min ɔ mmla mun.
136 Min ɲinmuɛn nzue’n bu,afin nvlefuɛ’m be nantiman ɔ mmla’n su.+
צ [Sade]
137 Ee Zoova, a yo sa i nuan su sɛsɛ,+yɛ jɔlɛ nga a di’n be ti su.+
138 Afɔtuɛ nga a man’n be ti kpa,yɛ be kwla lafi be su.
139 Min wun yrayra min,+afin min kpɔfuɛ’m be wla w’a fi ɔ ndɛ’m be su.
140 Fiɛn kaan sa nunman ɔ ndɛ’n i wun,+yɛ ɔ sufuɛ’n klo i.+
141 N timan like fi yɛ min wla w’a bo min wun.+
Ɔ nin i sɔ’n ngba’n, min wla w’a fiman like nga a se kɛ be yo’n i su.
142 Ɔ sa nuan su sɛsɛ yolɛ’n, ɔ́ ká lɛ tititi,+yɛ ɔ mmla’n ti nanwlɛ.+
143 Ɲrɛnnɛn nin sa kekle’m be tɔ min su,sanngɛ n klo ɔ mmla mun titi.
144 Ɔ afɔtuɛ’m be ti kpa, yɛ bé ká sɔ tititi.
Man min ngwlɛlɛ,+ naan n ka nguan nun.
ק [Kɔfu]
145 N tu min klun n kpan flɛ wɔ. Ee Zoova, tɛ min su.
N kunndɛ kɛ ń nánti ɔ mmla’m be su.
146 N kpan flɛ wɔ, de min!
Ń fá ɔ afɔtuɛ’m be su.
147 N jasoli ka naan aliɛ w’a cɛn, naan ń kpán flɛ́ wɔ kɛ a uka min,+afin ɔ ndɛ’m be su yɛ n fa min wla’n n gua-ɔ.*
148 Kɔnguɛ afiɛn’n min ɲinma’m be o su,kɛ ɔ ko yo naan m’an bu ɔ ndɛ’m be su akunndan’n ti.*+
149 Tie min nɛn’n, ɔ sran klolɛ dan’n ti.+
Ee Zoova, yo maan n ka nguan nun, ɔ sa nuan su sɛsɛ yolɛ’n ti.
150 Be nga be yo ɲannzuɛn sa’n b’a mantan koko.
Be nin ɔ mmla’n be afiɛn’n ti nun.
151 Ee Zoova, a o koko,+yɛ ɔ mmla’m be kwlaa be ti nanwlɛ.+
152 N si ɔ afɔtuɛ’m be su ndɛ w’a cɛ,n si kɛ a siesieli be naan be ka lɛ tititi.+
ר [Rɛsi]
153 Nian ɲrɛnnɛn ng’ɔ o min su’n naan de min,+afin min wla w’a fiman ɔ mmla’n su.
154 Kpli min ti yɛ de min,+yo maan n ka nguan nun kɛ nga a fa tali nda’n sa.*
155 Delɛ’n wo klunwifuɛ’m be wun mmua,afin b’a kunndɛman ɔ mmla mun.+
156 Ee Zoova, ɔ sa yaci cɛlɛ’n ti dan.+
Yo maan n ka nguan nun, ɔ sa nuan su sɛsɛ yolɛ’n ti.
157 Min yalɛ klefuɛ mun nin min kpɔfuɛ’m be sɔnnin.+
Sanngɛ m’an yaciman ɔ afɔtuɛ mun m’an faman atin uflɛ.
158 N nian gblɛfuɛ’m be tɛ kpa,afin be nantimanɔ ndɛ’n su.+
159 Nian kɛ n klo like nga a se kɛ be yo’n niɔn!
Ee Zoova, yo maan n ka nguan nun, ɔ sran klolɛ dan’n ti.+
160 Ɔ ndɛ’n bɔbɔ ba’n ti nanwlɛ,+yɛ ɔ jɔlɛ mɔ a di be nanwlɛ su’n, be kwlaa bé ká lɛ tititi.
ש [Sin] annzɛ [Sinnin]
161 Sran dandan’m be kle min yalɛ,+ kusu nn m’an yoman sa,sanngɛ n bu ɔ ndɛ’m be like cinnjin kpa.+
162 N di ɔ ndɛ’n i su aklunjɔɛ+
kɛ sran wie mɔ w’a ɲan like dan alɛ kunlɛ nun’n sa.
163 N kpɔ ato bualɛ’n, n kpɔ i.+
N klo ɔ mmla’n.+
164 Aliɛ ba kun nun’n, n manman wɔ kpɛ nso,ɔ jɔlɛ mɔ a di be nanwlɛ su’n ti.
165 Be nga be klo ɔ mmla’n, be wun jɔ́ be kpa fɔuun.+
Be ja su kplaman like fi su.
166 Ee Zoova, n fa min wla’n n gua sa nga a yo be fa de sran’n su,yɛ n nanti ɔ mmla’m be su.
167 N fa ɔ afɔtuɛ’m be su,yɛ n klo be kpa.+
168 N yo like nga a se kɛ be yo’n, yɛ n fa ɔ afɔtuɛ’m be su,afin a si like kwlaa nga n yo’n.+
ת [Tavu]
169 Ee Zoova, maan kpanlɛ mɔ n kpan flɛ wɔ kɛ a uka min’n ɔ to wɔ lɔ.+
Maan ɔ ndɛ’n uka min naan n wun i wlɛ.+
170 Maan srɛlɛ mɔ n srɛ wɔ kɛ a si min aunnvɔɛ’n, ɔ to wɔ lɔ.
De min, kɛ nga a fa tali nda’n sa.*
171 Maan ɔ manmanlɛ’n ɔ yi min nuan’n lele ɔ bu gua,+afin a kle min ɔ mmla mun.
172 Maan min taaman’n to ɔ ndɛ’n i su jue,+afin ɔ mmla’m be kwlaa be ti kpa.
173 Maan ɔ sa’n uka min,+afin n fali ajalɛ kɛ ń yó like nga a se kɛ be yo’n.+
174 Ee Zoova, min ɲin o delɛ m’ɔ fin wɔ’n i sin,yɛ n klo ɔ mmla’n.+
175 Yaci min nguan nun naan n manman wɔ.+
Maan ɔ jɔlɛ nga a di be’n be uka min.
176 N wlanwlan kɛ bua wie mɔ w’a mlin’n sa.+ Kunndɛ ɔ sufuɛ’n,afin min wla w’a fiman ɔ mmla’m be su.+
Ja ngua lɔ ndɛ mun
^ Ebr., “awlɛn’n nun.”
^ Annzɛ “Ń súan be su like.”
^ Annzɛ “ɔ suan be su like.”
^ Annzɛ “n suan be su like.”
^ Annzɛ “naan n wun ɲannzuɛn.”
^ Ebr., “wánndi.”
^ Be kwla se ekun kɛ “a yo maan min wla gua ase.”
^ Annzɛ “Yo maan n nanti.”
^ Annzɛ “ndɛ nga a kan kleli.”
^ Be kwla se ekun kɛ “Yia nda nga a tali be nga be sro wɔ’n i nuan.”
^ Annzɛ “kɛ nga a fa kannin’n sa.”
^ Annzɛ “n minndɛ jɔlɛ nga a di’n.”
^ Annzɛ “lika gbawun kun.”
^ Annzɛ “ń súan be su like.”
^ Annzɛ “nda nga a tali.”
^ Annzɛ “Sua nga n tran nun kɛ aofuɛ sa’n i nun’n.”
^ Annzɛ “a fa kannin’n sa.”
^ Annzɛ “n minndɛ ɔ ndɛ’n.”
^ Annzɛ “kɛ nga a kan kleli ɔ sufuɛ’n sa.”
^ Be kwla se ekun kɛ “be bua ato be fa yo min tɛ.”
^ Annzɛ “ń súan be su like.”
^ Annzɛ “ɔ ndɛ’n yɛ n minndɛ i-ɔ.”
^ Yɛle kɛ, ninnge ng’ɔ yili be’n be kwlaa.
^ Ebr., “ɔ la plaii.”
^ Annzɛ “N suɛn i su like.”
^ Annzɛ “n suan be su like.”
^ Annzɛ “n fa yo min aja like titi.”
^ Annzɛ “n minndɛ ɔ ndɛ’n.”
^ Annzɛ “kɛ nga a fa kannin’n sa.”
^ Annzɛ “ɲannzuɛn.”
^ Annzɛ “ndɛ nga a kannin’n.”
^ Annzɛ “sika ɔkwlɛ mɔ be yili i nun fiɛn’n.”
^ Ebr., “Kpɔ min ti.”
^ Annzɛ “n minndɛ ɔ ndɛ mun.”
^ Annzɛ “naan m’an suan be su like’n ti.”
^ Annzɛ “kɛ nga a fa kannin’n sa.”
^ Annzɛ “kɛ nga a fa kannin’n sa.”
