Jue Mun 77:1-20
Ɔ ti jue tofuɛ’m be su kpɛn’n i liɛ. Zeditɛn* su. Azafu i jue-ɔ.+
77 Ń fá min nɛn’n ń kpán flɛ́ Ɲanmiɛn.
Ń kpán flɛ́ Ɲanmiɛn, yɛ ɔ́ tí.+
2 Min ɲrɛnnɛn blɛ’n nun’n, n kunndɛ Zoova.+
Kɔnguɛ’n, n tinngɛ min sa’n nun i wun lɔ sa trilili.
Like fi kwlá fɔnvɔman min.
3 Kɛ min wla kpɛn Ɲanmiɛn su’n, n kplin.+
Min wla bo min wun, yɛ min wunmiɛn’n wie.+ (Sela)
4 A uke min ɲinma bui mun.
Min akunndan’n w’a sanngan yɛ n kwlá ijɔman.
5 Min ɲin kpɛn laa sa’mbe su.+
Min ɲin kpɛn afuɛ nga be sinnin w’a cɛ kpa’n be su.
6 Kɔnguɛ’n min wla kpɛn min jue’n su,+n bu akunndan min klun lɔ.+
N bo min ɲin ase n kunndɛ sa sɔ’m be su like kpa.
7 ?Naan Zoova yí e blo sa tititi?+
?Ɔ su siman e aunnvɔɛ kun?+
8 ?I sran klolɛ dan’n w’a wie mlɔnmlɔn?
?I nda ng’ɔ tali’n i nuan su yiaman le?
9 ?Ɲanmiɛn i wla w’a fi i sran ye yolɛ’n su?+
?Annzɛ i ya’n ti’n i sran aunnvɔɛ silɛ’n w’a wie? (Sela)
10 ?Ń sé titi kɛ: “Like ng’ɔ bo min wla’n yɛ:+
Ɲanmiɛn m’ɔ o Like Kwlaa Ti Su’n w’a kaci wafa ng’ɔ nin e nanti’n?”
11 Min wla kpɛ́n ninnge nga Ya yo be’n be su.
Min wla kpɛ́n ɔ abonuan sa nga a yoli be laa’n be su.
12 Yɛ ń bú like nga a yo’n i kwlaa su akunndan.
Yɛ ń bú wafa nga a yo ninnge mun’n i akunndan.+
13 Ee Ɲanmiɛn, ɔ atin’m be ti sanwun.
?Ee Ɲanmiɛn, ɲanmiɛn benin yɛ ɔ ti dan kɛ wɔ sa-ɔ?+
14 A ti Ɲanmiɛn Kpli, wɔ yɛ a yoli abonuan ninnge mun-ɔn.+
A yili ɔ tinmin’n i nglo kleli nvlefuɛ mun.+
15 A fali ɔ tinmin’n* fa deli ɔ nvlefuɛ mun,*+
a deli Zakɔbu i mma mun nin Zozɛfu i mma mun. (Sela)
16 Ee Ɲanmiɛn, nzue’m be wunnin wɔ.
Nzue’m be wunnin wɔ yɛ be kejeli.+
Yɛ nzue mɔ be bo ti kploun’n be kejeli.
17 Ɲanmiɛn ble’n guali nzue dan kpa ase.
Ɲanmiɛn m’ɔ lu tritritri’n kplali,yɛ ɔ ta mma’m be kɔwa kɔ wa.+
18 Ɔ angblannan’n+ tɛ kɛ kakaklolo’m be ja’n sa.
Kɛ ɲanmiɛn’n kpali sin piapia’n, asiɛ’n su kpajali.+
Asiɛ’n usuli yɛ ɔ kejeli.+
19 Ɔ atin’n sin jenvie’n nun.+
Ɔ atin’n sin nzue kpanngban nun.
Sanngɛ be kwlá wunman ɔ ja osu.
20 A kleli ɔ nvlefuɛ’m be atin kɛ nga be fa kle bua’m be atin’n sa.+
Moizi nin Aarɔn be niannin be lika.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Ebr., “ɔ sa’n.”
^ Ebr., “a fa kpɔli be ti.”
