Jue Mun 90:1-17
Moizi m’ɔ ti Ɲanmiɛn Kplii sran’n i srɛlɛ.+
90 Ee Zoova, a yoli e tranwlɛ*+ blɛ kwlaa nun.
2 Ka naan b’a wu oka mun’n,annzɛ ka naan w’a yi asiɛ’n nin asiɛ m’ɔ yo like ye’n,+kɛ ɔ fɛ i laa lele’n, a ti Ɲanmiɛn tititi.+
3 A yo maan klɔ sran’n sɛ i sin ndutre’n nun.
A se kɛ: “Klɔ sran mun, amun sa amun sin.”+
4 Afuɛ akpi kun (1.000) ti ɔ ɲrun kɛ anunman cɛn ba m’ɔ sinnin’n sa,+ɔ ti kɛ kɔnguɛ blɛ kan wie sa.
5 A fa be kɔ,+ be kaci kɛ lafilɛ ngbɛn sa.
Nglɛmun’n, be ti kɛ ijre m’ɔ fifi’n sa.+
6 Nglɛmun’n ɔ bo nɲrɛ, kpɛkun ɔ bo mɔnnɛn,Sanngɛ nnɔsua’n, ɔ glɔ kpɛkun ɔ wu kee.+
7 Afin ɔ ya’n nunnun e,+yɛ ɔ ya dan’n ti’n, srɛ kun e dan.
8 A fa e fɔnlɛ mun sie ɔ ɲrun.*+
Ɔ ɲrun’n i kpajalɛ’n yi e nvialiɛ nun sa’m be nglo.+
9 Ɔ ya dan’n ti’n e cɛn’m be wie blɛblɛblɛ.*
Yɛ e afuɛ’m be wie kɛ aswre tulɛ sa.*
10 Afuɛ nga e di’n ti afuɛ ableso (70),yɛ sran ng’ɔ le wunmiɛn kpa’n, ɔ di afuɛ ablaɔcuɛ (80).+
Sanngɛ be ti ɲrɛnnɛn nin awlabɔɛ ngunmin.
Be sin ndɛndɛ, yɛ be tu kɔ.+
11 ?Wan yɛ ɔ kwla si wafa nga ɔ ya’n i dan’n fa ti’n niɔn?
Ɔ ya’n ti dan kɛ srolɛ m’ɔ fata kɛ be sro wɔ’n sa.+
12 Kle e wafa ng’ɔ fata kɛ e ka e cɛn mun’n,+kɛ ɔ ko yo naan e awlɛn’n w’a si ngwlɛlɛ’n ti.
13 Ee Zoova, sa ɔ sin!+ ?Sa sɔ’n cɛ́ lele jú cɛn benin?+
Si ɔ sufuɛ’m be aunnvɔɛ.+
14 Nglɛmun’n, yi ɔ sran klolɛ dan’n+ i nglo e lika,kɛ ɔ ko yo naan y’a kwla kpan aklunjɔɛ kpanlɛ, naan y’a di aklunjɔɛ+ blɛ mɔ e o nguan nun’n ti.
15 Yo maan blɛ nga a kleli e ɲrɛnnɛn’n, ɔ nin e aklunjɔɛ dilɛ blɛ’n be sɛ.+
Yo maan afuɛ nga sa kekle tɔli e su’n, ɔ nin e aklunjɔɛ dilɛ afuɛ’mbe sɛ.+
16 Maan ɔ sufuɛ’m be wun sa nga a yo’n,yɛ maan be mma’m be wun ɔ aɲrunɲan’n.+
17 Maan e Ɲanmiɛn Zoova i klun jɔ e wun.
Yo maan e sa nuan ninnge’m be yo ye,ɛɛn, yo maan e sa nuan ninnge’m be yo ye.+
Ja ngua lɔ ndɛ mun
^ Be kwla se ekun kɛ “e fiawlɛ.”
^ Annzɛ “A si e fɔnlɛ mun.”
^ Annzɛ “e nguan’n wie blɛblɛblɛ.”
^ Annzɛ “kɛ wunmiɛn mɔ be lo i kpɛ kunngba’n sa.”
