Be flɛ bla kun kɛ Madu. a Ɔ tran Ɛndi. Ɔ seli kɛ: “Min kaan nun’n, min niaan bian bo min cɛn kwlakwla yɛ ɔ kpɛ min nzowa. Kɛ n jali bian’n, min sewi’n yoli min tɛtɛ wie. Ɔ nin i wun’n be yo min kɛ n ti be kanga sa. I sɔ’n ti’n, n kunndɛli kɛ ń kún min wun.”

 Anuannzɛ kun seli kɛ: “Asiɛ’n i bue kwlaa su’n be yo bla’m be tɛtɛ.” (Organisation mondiale de la santé) Ɔ seli ekun kɛ sɛ be fa bla nsan’n, be nun kun o lɛ mɔ be yoli i tɛtɛ annzɛ be nin i lali kekle nun-ɔn.

 Sɛ i sɔ sa’n w’a ju ɔ su le’n, a kwla bu i kɛ lika kwlaa nga á kɔ́’n, i sɔ’n kwla ju ɔ su ekun. Asa’n, a kwla bu i kɛ sran’m be buman bla’m be sran. ?Yɛ Ɲanmiɛn li? ?Ɔ bu bla’m be sran?

 Ndɛ nga Biblu’n kan’n: “[Ɲanmiɛn] yili be yasua nin bla.” —Bo Bolɛ 1:27.

 Ndɛ sɔ’n i bo’n: Ɲanmiɛn yili yasua nin bla mun. I ɲrun’n ɔ fata kɛ be bu be nɲɔn’n be sran. Asa’n, ɔ kunndɛ kɛ yasua kun “klo i yi kɛ ɔ fa klo i bɔbɔ wun’n sa.” Ɔ kunndɛman kɛ ɔ miɛnmiɛn i yi’n, annzɛ ɔ kɛn i ndɛ tɛtɛ annzɛ ɔ yo i kpokokpoko. (Efɛzifuɛ Mun 5:33; Kolɔsufuɛ Mun 3:19) I sɔ’n kle weiin kɛ Ɲanmiɛn kunndɛman kɛ be yo bla’m be tɛtɛ.

 Be flɛ bla kun kɛ Maria. Ɔ tran Aazantinin. Ɔ seli kɛ: “Min bakan nun’n, min osufuɛ wie’m be nin min lali kekle nun. Kɛ n ɲannin afuɛ 17, min junman su kpɛn’n kusu seli min kɛ sɛ min nin i y’a laman’n, ɔ́ tú min junman’n nun. Kɛ n yoli kaklaka kusu’n, min wun’n nin min osufuɛ mun ɔ nin min mantanfuɛ mun be yoli min tɛtɛ. Sanngɛ kɛ n ma sili Zoova b m’ɔ ti e Yifuɛ’n, n wunnin i wlɛ kɛ ɔ bu bla’m be sran. Ɔ maan n wunnin kɛ ɔ klo min naan min ndɛ lo i.”

 Ndɛ nga Biblu’n kan’n: “Janvuɛ wie o lɛ’n, ɔ fɛ i wun mantan wɔ kpa tra ɔ niaan bɔbɔ.”—Ɲanndra Mun 18:24.

 Ndɛ sɔ’n i bo’n: Ɔ janvuɛ kpa kun mɔ a lafi i su’n kwla uka wɔ. Sɛ a kan wafa ng’ɔ wun yo wɔ’n i ndɛ kle i’n, ɔ ti kpa.

 Be flɛ bla kun kɛ Elifi. Ɔ tran Tiiki. Ɔ seli kɛ: “Be tɔli min gblu. N fiali ndɛ sɔ’n su lele afuɛ 20. I sɔ’n ti’n, m’an diman aklunjɔɛ, yɛ min wla boli min wun dan. Sanngɛ kɛ n ma kannin sa ng’ɔ juli min su’n kleli sran kun’n m’ɔ sieli i su min nuan bo’n, min wla wa guali ase kpa.”

 Ndɛ nga Biblu’n kan’n: “An fa amun su sa’n kwlaa wlɛ i Ɲanmiɛn sa nun, afin amun ndɛ lo i.”—1 Piɛli 5:7.

 Ndɛ sɔ’n i bo’n: Kɛ e srɛ Ɲanmiɛn’n, ɔ tie. (Jue Mun 55:22; 65:2) Kɛ mɔ ɔ ndɛ lo i’n ti’n, ɔ kwla uka ɔ naan w’a bu ɔ wun sran.

 Be flɛ bla kun kɛ Ana. Ɔ tran Belizi. Ɔ seli kɛ: “Kɛ n suannin Zoova i su like’n, i sɔ’n ukali min naan min wla w’a gua ase. Siɛn’n, n kwla srɛ i yɛ n kan min klun ndɛ kwlaa n kle i. Ɔ ti kɛ min janvuɛ kpa kun m’ɔ wun wafa nga min wun yo min’n i wlɛ’n sa.”

 Ndɛ nga Biblu’n kan’n: “Zoova […] wá dí be nga be leman si’n nin be nga b’a kpɔtɔ’n, be ndɛ’n klanman. I liɛ’n, klɔ sran mɔ fa yɛ be fa yili i’n, ɔ su wlanwlanman be kun.” —Jue Mun 10:​17, 18.

 Ndɛ sɔ’n i bo’n: Ɲanmiɛn wá yó maan sran lufle bulɛ wafa kwlaa’n mɔ i wie yɛle bla’m be tɛtɛ yolɛ’n, ɔ́ wíe.

 Be flɛ bla kun kɛ Robɛɛta. Ɔ tran Mɛksiki. Ɔ seli kɛ: “Kɛ n tili i kɛ ɔ cɛ kan’n, Zoova wá yó maan be su yoman bla nin talua kanngan’m be tɛtɛ kun’n, i sɔ’n guali min awlɛn su nzue. Yɛ min akunndan’n w’a sannganman kun.”

 Sɛ a kunndɛ kɛ á sí ndɛ nga Biblu’n kan m’ɔ cici e wla’n, ɔ nin sa nga ti yɛ e kwla lafi ndɛ ng’ɔ kan’n su’n, ɔ nin wafa nga Zoova i Lalofuɛ’m be fa Biblu’n nun ndɛ’n be fɔnvɔ sran mun’n, se be nun kun ng’ɔ fali fluwa nga mannin wɔ’n kɛ ɔ wa nian wɔ osu.

 Cuɛn fluwa nga.