Be flɛ bian kun Kɔstasi. Ɔ seli kɛ: “Kɛ e nin Sofia a e jali mɔ e dili afuɛ 39 tra su’n, ɔ tɔli tukpacɛ. Tukpacɛ’n kleli i yalɛ lele ɔ fa wuli. Kɛ ɔ yoli sɔ’n, min janvuɛ kpanngban be fɔnvɔli min kpa. Yɛ n kusu, n yoli ninnge wie mun naan m’an tranman koun. Sanngɛ kɛ ɔ́ dí afuɛ kun bɔbɔ’n, i wie’n te yo min ya dan. Ɔ ju wie’n, min wla bo min wun, yɛ ɔ ju wie kusu’n, min wla gua ase kan. Kɛ ɔ wuli’n, i afuɛ nsan yɛ. Sanngɛ cɛn wie’n, min awlɛn kpɔtɔ min klun.”

?Ɔ sran kpa wie w’a wu le? Sɛ ɔ ti sɔ’n, atrɛkpa’n ndɛ nga Kɔstasi kannin’n, ɔ ti ɔ liɛ’n su wie. Kɛ e yi annzɛ e wun, annzɛ e osufuɛ, annzɛ e janvuɛ kpa kun wu’n, wafa nga e awlɛn kpɔtɔ e klun ju’n, like uflɛ kwlá kpɔtɔman e awlɛn dan sɔ. Fluwa sifuɛ wie mɔ be suan awlabɔɛ ng’ɔ tɔ be nga be sran w’a wu’n be su’n, i su like’n, be kan sɔ wie. Dɔɔtrɔfuɛ wie’m be klɛli i be fluwa kun nun kɛ, ‘kɛ sran kun i sran wu’n, ɔ lafiman su kɛ ɔ́ wún i ekun. I sɔ liɛ’n yo i ya dan.’ I sɔfuɛ’n kwla usɛ i wun kɛ: ‘?Min wla bó min wun lele cɛn nɲɛ? ?Min klun jɔ́ ekun li? ?Ń yó sɛ naan min wla w’a gua ase kan?’

É wá wún kosan sɔ’m be su tɛlɛ’n fluwa nga nun. Ndɛ akpasua nga i sin liɛ’n nun’n, é wá kán like ng’ɔ fata kɛ sran nga i sran w’a wu’n, ɔ wun i wlɛ’n, i ndɛ. Kpɛkun, ndɛ akpasua nga bé bɛ́ i sin’n, bé klé e ajalɛ nga e kwla fa be naan e wla w’a fi e wun kan’n.

E lafi su kɛ ndɛ nga é wá yíyí nun yɛ’n, ɔ́ fɔ́nvɔ be nga be sran w’a wu’n, yɛ ɔ́ úka be naan be wla w’a fi be wun kan.