AFUƐ 1970 nun’n, be nga be fufu asiɛ’n be kunndɛ laa ninnge mun’n be wunnin fluwa ɲɔnɲɔnwa kun. Be wunnin i Izraɛli nvle’n nun lɔ lika kun nun. Be flɛ lika sɔ’n kɛ An-Gedi. Ɔ jenvie m’ɔ ti njin nzue klakla’n i wun koko lɛ. Be wunnin fluwa sɔ’n Zifu’m be Ɲanmiɛn sulɛ sua kun m’ɔ yrali’n nun. Klɔ nga Zifu’m be Ɲanmiɛn sulɛ sua sɔ’n o su’n, ɔ yrali afuɛ 500 nin 550 be afiɛn’n nun Klisifuɛ’m be blɛ su. Kɛ mɔ fluwa yrali’n ti’n, be kwlá ɲanjiman nun naan se kɛ bé kánngan nun. Afin sɛ be waan bé ɲánji nun’n, ɔ́ fúfú. I sɔ’n ti’n be fa wlɛli i mannzin kun nun. Sɛ é kwlá sé’n, mannzin sɔ’n trɛli fluwa’n nun naan b’a kwla kanngan nun.

?Kɛ be yoli sɔ’n ngue yɛ be wunnin i-ɔ? Be wunnin kɛ Biblu’n nun ndɛ mma wie mun yɛ be klɛ su-ɔ. Saun Yolɛ fluwa’n i bo bolɛ nun ndɛ mma wie mun-ɔn. Ɲanmiɛn i dunman nga be klɛli i Ebre nun’n, ɔ o nun. Be klɛli fluwa sɔ’n afuɛ 50 nin 400 be afiɛn’n nun Klisifuɛ’m be blɛ su. Kɛ be wunnin fluwa nga be wunnin be jenvie m’ɔ ti njin nzue klakla’n i wun lɛ’n, be wa wunnin fluwa uflɛ wie mun ekun. Sanngɛ fluwa nga be wunnin i An-Gedi lɔ’n, ɔ ti kpɛnngbɛn tra fluwa kasiɛn nga be wa wunnin be’n. Be flɛ fluwa sifuɛ kun kɛ Gili Zoaa. Ɔ seli kɛ: “Kɛ be klɛli fluwa nga be wunnin be jenvie m’ɔ ti njin nzue klakla’n i wun lɛ’n lele mɔ bé klɛ́ fluwa nga be wunnin i Alɛpu lɔ’n, ɔ dili afuɛ kɔe 1000.” Fluwa sifuɛ’m be nuan sɛli su kɛ fluwa ɲɔnɲɔnwa nga be wunnin i An-Gedi lɔ’n, ɔ kle weiin kɛ be nga be niannin Ɲanmiɛn Ndɛ’n nun fluwa klikli nnun’m be su be klɛli be fluwa su’n, be miannin be ɲin be dili junman kpa.Kannzɛ kɛ bé klɛ́’n be dili fɔ’n, sanngɛ fluwa nnun sɔ’m be nun ndɛ’n w’a kaciman.