DANIƐL fluwa’n kan Famiɛn kun i ndɛ. Famiɛn sɔ’n i dunman’n yɛle Bɛlsazar. Sanngɛ be nga be lafiman Biblu’n nun ndɛ’n su’n, be waan famiɛn sɔ’n w’a tranman nguan nun sakpasakpa. (Dan. 5:1) Like nga ti yɛ be se sɔ’n, yɛle kɛ be waan be nga be fufu asiɛ’n be kunndɛ laa ninnge mun’n, b’a wunman like fi mɔ kle kɛ ɔ trannin nguan nun sakpa-ɔ. Sanngɛ afuɛ 1854 nun’n, b’a kɛnmɛn i sɔ ndɛ’n kun. ?Ngue ti-ɔ?

Afuɛ sɔ’n nun’n, angle bian kun m’ɔ suan Jɔnun Zɔzu Telɔɔ’n, ɔ ɔli klɔ nga be flɛ i kɛ Ir m’ɔ w’a yo nvuɛn’n, i su niannianlɛ. Andɛ’n, klɔ sɔ’n wo nvle nga be flɛ i kɛ Iraki’n i ngua lɔ lika’n nun. Kɛ ɔ juli lɔ’n, ɔ wunnin sua fleiin kun. Kɛ ɔ wluli sua sɔ’n nun lɔ’n, ɔ wunnin ninnge wie mɔ fa yɛ be fa yoli’n. Ninnge sɔ’m be tɛnndɛn nun’n ju santimɛtri 10 kun yɛ be klɛklɛli ndɛ wie’m be su. Ninnge sɔ’m be nun kun su’n, be klɛli srɛlɛ mɔ sran’m be srɛli naan Babilɔnin famiɛn Nabonindi nin i wa kpɛn Bɛlsazar be cɛ nguan nun’n, i su. I sɔ’n ti’n be nga be lafiman Biblu’n nun ndɛ’n su’n, be dili i nanwlɛ kɛ Bɛlsazar trannin nguan nun sakpa.

Sanngɛ Biblu’n w’a kɛnmɛn i ngbɛn kɛ Bɛlsazar trannin nguan nun, ɔ seli kɛ ɔ yoli famiɛn wie. Sanngɛ be nga be lafiman Biblu’n nun ndɛ’n su’n, b’a lafiman ndɛ sɔ’n su ekun. I wie yɛle kɛ afuɛ 1875 nun’n, siansifuɛ kun m’ɔ suan Wiliamun Talibɔti’n seli kɛ: “Sran wie’m be waan Bɛlsazar nin i si Nabonindi be dili famiɛn blɛ kunngba’n nun. Sanngɛ like fi kleman kɛ ndɛ sɔ’n ti nanwlɛ.”

Ninnge nga be wunnin be klɔ nga be flɛ i Ir su lɔ’n, be wa kpɛli akplowa sɔ’n nun. Afin ninnge sɔ’m be nun wie’m be su’n, be klɛli i kɛ blɛ kun nun’n, Bɛlsazar i si Nabonindi jasoli Babilɔnin lɛ ɔli klɔ uflɛ su yɛ ɔ cɛli lɔ kpa. ?Blɛ sɔ’n nun’n ngue sa yɛ ɔ juli-ɔ? Fluwa kun seli kɛ: “Kɛ Nabonindi ɔli lomuɛn’n, ɔ seli i wa Bɛlsazar kɛ ɔ sin i ja nun di famiɛn. Kpɛkun ɔ fɛli i sonja’m be nun kpanngban kpa fa mɛnnin i.” Ɔ maan e kwla se kɛ Bɛlsazar ɔ nin i si be dili famiɛn blɛ kunngba’n nun Babilɔnin lɔ. I sɔ’n ti’n, sran nga be fufu asiɛ’n be kunndɛ laa ninnge mun’n ɔ nin fluwa sifuɛ kun mɔ be flɛ i kɛ Alanin Milaa’n, be seli kɛ: “Sɛ Daniɛl fluwa’n flɛ Bɛlsazar kɛ ‘famiɛn’n’ i sɔ’n ti su.”

Sanngɛ be nga be su Ɲanmiɛn’n be liɛ’n, be si su kɛ like ng’ɔ kle kɛ be kwla lafi ndɛ ng’ɔ o Daniɛl fluwa nun’n su’n naan Ɲanmiɛn yɛ maan be klɛli’n, i kwlaa o Biblu’n nun.​—2 Tim. 3:16.