Salmo 83:1-18
Sarong kanta. Salmo ni Asaf.+
83 O Diyos, dai ka magsilensiyo;+Dai ka magdanay na mayong girong* o dai naghihiro, O Banal na Diyos.
2 Huli ta uya! nagkakariribok an mga kalaban mo;+Minahirong may kapalangkawan* an mga nauungis sa saimo.
3 May katusuhan sindang nagpapakana nin pasekreto laban sa saimong banwaan;Nagkukurumplutan sinda laban sa saimong mga pinakainiingatan.*
4 An sabi ninda: “Madya, puhuon ta sinda sa pagigin sarong nasyon,+Tanganing an pangaran nin Israel dai na magirumduman pa.”
5 Nagplano sinda nin pinagsararong estratehiya;*Naggibo sinda nin sarong alyansa* laban sa saimo+—
6 An mga Edomita, mga Ismaelita,* an Moab+ asin mga Hagrita,+
7 An Gebal asin an Ammon+ saka an Amalek,An Filistia+ kaiba an mga nag-iistar sa Tiro.+
8 Uminiba man sa sainda an Asiria;+An mga gikan ni Lot* sinusuportaran ninda.*+ (Selah)
9 Gibuha sa sainda an arog kan ginibo mo sa Midian,+An arog kan ginibo mo ki Sisera asin ki Jabin sa sapa* nin Kison.+
10 Nagkapuruho sinda sa En-dor;+Nagin udo sinda sa daga.
11 An saindang mga respetadong tawo gibuhon mong magin arog ni Oreb saka Zeeb+Asin an saindang mga lider* magin arog ni Zeba asin Zalmuna,+
12 Huling nagsarabi sinda: “Agawon ta an dagang iniirukan nin Diyos.”
13 O sakuyang Diyos, gibuha sindang siring sa nagliligid na nagsarabudan na awot,*+Siring sa pinaggapasan na pighuhuyop-huyop kan duros.
14 Siring sa kalayo na minasulo sa kadlagan,Siring sa laad na minatutong sa kabukidan,+
15 Lugod na arog mo kaiyan sinda lapagon paagi kan saimong makusugon na duros+Asin takuton mo sinda paagi kan saimong alipuros.+
16 An saindang lalawgon tahuban* mo nin kawaran nin onra,Tanganing hanapon ninda an saimong pangaran, O Jehova.
17 Lugod na mapasupog sinda asin matakot sagkod lamang;Lugod na mawaran sinda nin onra asin mapara;
18 Lugod na maaraman kan mga tawo na ika, na an pangaran Jehova,+Ika sana an Kahuruhalangkawi sa bilog na daga.+
Mga Nota
^ O “na dai nagtataram.”
^ O “Nagtataas kan saindang mga payo.”
^ Sa literal, “mga itinago.”
^ Sa literal, “Nag-urulay-ulay sinda na may sarong puso.”
^ O “tipan.”
^ Sa literal, “An mga tolda kan Edom asin kan mga Ismaelita.”
^ Sa literal, “Nagin takyag sinda kan mga aki ni Lot.”
^ An buot sabihon, an mga Moabita asin an mga Ammonita.
^ O “sulugan na kababan.”
^ O “prinsipe.”
^ O “duot.”
^ Sa literal, “panuon.”
