1, 2. Anong milagro an ginibo ni Pedro asin Juan harani sa trangkahan kan templo?

 AN INIT kan saldang sa hapon minatama sa dakulon na tawo. Nag-aarabot na sa templo an debotadong mga Judio asin an mga disipulo ni Cristo. Madali na an “oras nin pagpamibi.” a (Gibo 2:46; 3:1) Kaiba sa dakulon na tawong idto si Pedro asin Juan na padangadang sa trangkahan kan templo na inaapod na Magayon. Sa tahaw kan ribok kan mga nag-uurulay-ulay asin nagraralakaw na mga tawo, madadangog an boses nin sarong labi nang 40 anyos na lalaking parapakilimos, na pilay puon pagkamundag, na naghahagad nin limos.—Gibo 3:2; 4:22.

² Mantang paparani si Pedro asin Juan, sinambit kan parapakilimos an pauruutro na niyang linya nin pakikilimos. Nagpundo an mga apostol, kaya naghiling sa sainda an lalaki na nag-aasang tatawan ninda siya nin limos. “Mayo akong pirak asin bulawan,” an sabi ni Pedro, “pero kun ano an igwa ako iyo an itatao ko sa saimo. Sa ngaran ni Jesu-Cristo na Nazareno, maglakaw ka!” Imahinara an pagkangalas kan mga tawo mantang kinakaputan ni Pedro an kamot kan lalaking pilay asin—sa inot na pagkakataon sa buhay kaini—nakatindog nin tanos an lalaki! (Gibo 3:6, 7) Naiimahinar mo daw an lalaki na pighihiling an saiyang naumayan nang mga bitis asin na pinupunan na niya iyan na ilakaw sa inot na pagkakataon? Bako nanggad makangangalas na naglukso-lukso siya asin makusog na inumaw an Diyos!

3. Anong nakakalabing marhay na regalo an puwedeng kamtan kan lalaking dating pilay asin kan mga tawo?

³ Grabe an kaugmahan kan mga tawo asin nagdaralagan sinda ki Pedro asin Juan sa may portiko ni Solomon. Sa mismong lugar na ini kun sain nagtindog asin nagtukdo kaidto si Jesus, ipinaaram ni Pedro sa mga tawo kun ano an tunay na kahulugan kan katatapos pa sanang milagro. (Juan 10:23) Inalukan niya an mga tawo asin an lalaking dating pilay nin sarong regalo na urog pa an halaga kisa sa pirak o bulawan. An regalong ini  nakakalabi pa sa oportunidad na maumayan sa pisikal. Ini an oportunidad na magsulsol, na mapara an saindang mga kasalan, asin na magin mga parasunod kan ninombrahan ni Jehova na “Panginot na Instrumento nin buhay,” si Jesu-Cristo.—Gibo 3:15.

4. (a) An milagrosong pagpaumay nagin dahilan nin anong komprontasyon? (b) Anong duwang hapot an sisimbagon ta?

⁴ Sarong pambihirang aldaw nanggad iyan! Sarong tawo an naumayan sa pisikal asin nakakalakaw na. Asin rinibo an tinawan nin oportunidad na maumayan sa espirituwal para makalakaw sinda nin maninigo para sa Diyos. (Col. 1:9, 10) Dugang pa, an mga pangyayari kan aldaw na iyan nagin dahilan nin komprontasyon sa pag-ultanan kan maimbod na mga parasunod ni Cristo asin kan mga nasa kapangyarihan na pinupurbaran na pugulan sindang utubon an pagbuot ni Jesus na ihulit an mensahe kan Kahadian. (Gibo 1:8) Ano an manunudan ta sa mga pamamaaging ginamit asin sa sabuot na ipinahiling ni Pedro asin Juan—na mga “daing inadalan asin mga ordinaryong tawo”—mantang nagpapatotoo sinda sa mga tawo? b (Gibo 4:13) Asin paano ta sinda maaarog asin an iba pang mga disipulo sa kun paano ninda inatubang an pagkontra?

5. Ano an manunudan ta sa paagi ni Pedro nin pakikipag-ulay sa mga tawo?

⁵ Nagtindog si Pedro asin Juan sa atubangan kan mga tawo, dawa ngani aram ninda na an nagkapira duman tibaad kaiba sa mga nag-insistir kasuarin pa sana na gadanon si Jesus. (Mar. 15:8-15; Gibo 3:13-15) Pag-isipan an ipinahiling na kusog nin buot ni Pedro kan sabihon niyang an lalaking pilay naumayan paagi sa ngaran ni Jesus. Kusog-buot na sinabi ni Pedro an katotoohan. Daing pag-alangan niyang sinabi sa sainda na may paninimbagan man sinda sa pagkagadan ni Cristo. Pero dai si Pedro nagtanom nin raot nin buot sa mga tawong ini, huling ‘dai lang ninda naiintindihan an ginigibo ninda kaidto.’ (Gibo 3:17) Nakipag-ulay siya sa sainda bilang saiyang mga tugang asin nagpokus siya sa positibong mga aspekto kan mensahe kan Kahadian. Kun magsulsol sinda asin magkaigwa nin pagtubod ki Cristo, “an mga panahon nin kaginhawahan” maabot sa sainda hali ki Jehova. (Gibo 3:19) Kaipuhan man niyatong magin makusog an buot asin magin daing pag-alangan sa pagtaram manungod sa papaabot na paghukom nin Diyos. Pero kasabay kaiyan, dai man kita dapat magin daing preno, makulog magtaram, o mapanghusgar. Imbes, ibinibilang niyatong potensiyal na mga tugang an mga nahuhulitan ta, asin arog ni Pedro, nagpopokus kita lalo na sa positibong mga aspekto kan mensahe kan Kahadian.

6. Paano ipinahiling ni Pedro asin Juan an kapakumbabaan?

⁶ An mga apostol mapakumbabang mga lalaki. Dai ninda kinua an kredito kan naisagibo nindang milagro. Sinabi ni Pedro sa mga tawo: “Taano ta  nakahiling kamo sa samo na garo baga sa sadiri ming kapangyarihan o dahil sa debosyon mi sa Diyos kaya mi siya napalakaw?” (Gibo 3:12) Aram ni Pedro asin kan iba pang mga apostol na an ano man na marahay na naisasagibo ninda sa saindang ministeryo dahil iyan sa kapangyarihan nin Diyos, bako sa sadiri nindang kapangyarihan. Bilang resulta, may kapakumbabaan nindang naitao ki Jehova asin ki Jesus an gabos na pag-umaw huli kan mga naisagibo ninda.

7, 8. (a) Anong regalo an maiaalok niyato sa mga tawo? (b) Paano nauutob ngunyan an panuga na “pagbabalik sa dati kan gabos na bagay”?

⁷ Kaipuhan ta man na magpahiling nin arog kaiyan na kapakumbabaan mantang nakikikabtang sa gibuhon na paghuhulit kan Kahadian. Totoo, dai man tinawan kan espiritu nin Diyos an mga Kristiyano sa presenteng panahon nin kapangyarihan na milagrosong makapaumay. Dawa arog kaiyan, puwede tang tabangan an mga tawo na magkaigwa nin pagtubod sa Diyos asin ki Cristo asin na mag-ako kan kaparehong regalo na iinalok ni Pedro—an oportunidad na mapatawad an saindang mga kasalan asin mapaginhawa ni Jehova. Kada taon, ginatos na ribo an inaako an alok na ini asin nagigin bawtisadong mga disipulo ni Cristo.

⁸ Tunay nanggad, nabubuhay kita sa inaapod ni Pedro na panahon nin “pagbabalik sa dati kan gabos na bagay.” Bilang kautuban kan mga “ipinahayag nin Diyos paagi sa mga tataramon kan saiyang banal na mga propeta kan suanoy,” an Kahadian naestablisar sa langit kan 1914. (Gibo 3:21; Sal. 110:1-3; Dan. 4:16, 17) Dai nahaloy pagkatapos kaiyan, pinunan ni Cristo an pangangataman sa gibuhon na pagbabalik kan tunay na pagsamba sa daga. Bilang resulta, minilyon an nakalaog sa espirituwal na paraiso asin nagin mga sakop kan Kahadian nin Diyos. Hinuba ninda an saindang luma asin maraot na personalidad asin ‘isinulot an bagong personalidad na linalang sigun sa kabutan nin Diyos.’ (Efe. 4:22-24) Arog kan pagpaumay sa pilay na parapakilimos, an makangangalas na gibuhon na ini naisagibo, bakong paagi sa paghihinguwa nin tawo, kundi paagi sa espiritu nin Diyos. Arog ni Pedro, dapat na kusog-buot asin epektibo niyatong gamiton an Tataramon nin Diyos para tukduan an iba. An ano man na kapangganahan ta sa pagtabang sa mga tawo na magin mga disipulo ni Cristo huli iyan sa kapangyarihan nin Diyos, bako sa sadiri tang kapangyarihan o kusog.

9-11. (a) Ano an nagin reaksiyon kan Judiong mga lider sa mensahe ni Pedro asin Juan? (b) Ano an determinadong gibuhon kan mga apostol?

⁹ Maugmahon asin nagkariribok an mga tawo huli sa diskurso ni Pedro asin huli sa lalaking dating pilay na ngunyan naglulukso-lukso na asin nagkukurahaw. Dahil kaiyan, an pamayo kan mga guwardiya sa templo—na inasignaran na mangataman sa seguridad sa templo—asin an mga panginot na saserdote biglang nag-arabot para mag-imbestigar. Posibleng  marhay na an mga lalaking ini mga Saduceo, sarong sekta na mayaman asin makapangyarihan sa pulitika na ipinopromotir an pagkaigwa nin matuninong na relasyon sa mga Romano. Kontra sinda sa berbal na ley na sinusunod na marhay kan mga Fariseo asin dai nagtutubod sa pagkabuhay liwat. c Nauyam nanggad sinda kan mahiling ninda si Pedro asin Juan sa templo na kusog-buot na itinutukdo na si Jesus binuhay liwat!

¹⁰ Ipinapreso kan anggot na mga parakontrang ini si Pedro saka Juan, asin kinaagahan, dinara ninda sinda sa atubangan kan Judiong korte suprema. Para sa mayayaman asin nobleng mga tagapamahalang ini, si Pedro asin Juan mga “daing inadalan asin mga ordinaryong tawo” na mayong deretso na magtukdo sa templo. Dai sinda nakapag-adal sa arin man na bantog na relihiyosong eskuwelahan. Pero, napangalas sa sainda an korte huli sa saindang pagkaprangka asin kumbiksiyon sa pagtaram. Taano ta nagin epektibong marhay si Pedro asin Juan? An sarong dahilan iyo na sinda “nagin kaiba-iba ni Jesus.” (Gibo 4:13) Bakong arog kan mga eskriba, an saindang Kagurangnan nagtukdo nin may tunay na awtoridad.—Mat. 7:28, 29.

¹¹ Pinagbutan kan korte an mga apostol na magpundo na sa paghuhulit. Sa sosyedad na iyan, makapangyarihan an mga pagbuot kan korte. Pirang semana pa sana bago kaini, kan si Jesus umatubang man sa korteng iyan, sinabi kan mga miyembro kaiyan: “Dapat siyang magadan.” (Mat. 26:59-66) Pero, dai natakot si Pedro asin Juan. Mantang nakatindog sa atubangan kan mayayaman, mga may halangkaw na inadalan, asin maimpluwensiyang mga lalaking ini, daing takot pero may paggalang na sinabi ni Pedro asin Juan: “Kun baga tama sa paghiling nin Diyos na magdangog sa saindo imbes na sa Diyos, kamo mismo an maghusgar. Pero para sa samo, dai mi magigibong magpundo sa pagtaram manungod sa mga bagay na samuyang nahiling asin nadangog.”—Gibo 4:19, 20.

12. Ano an makakatabang sato na lalo pang magkusog an satong buot asin kumbiksiyon?

¹² Naipapahiling mo man daw an siring na kusog nin buot? Ano an namamatian mo pag nagkakaoportunidad kang magpatotoo sa mayayaman, mga may halangkaw na inadalan, asin maimpluwensiyang mga tawo sa saindong komunidad? Paano kun pigtutuya-tuya ka kan saimong mga kapamilya, mga kaeskuwela, o mga katrabaho huli kan saimong mga tinutubod? Nakakamati ka daw nin takot? Kun iyo, kaya mong mapangganahan an siring na pagmati. Kan nasa daga si Jesus, tinukduan niya an saiyang mga apostol kun paano idedepensa nin may kumpiyansa asin paggalang an saindang mga tinutubod. (Mat. 10:11-18) Pagkatapos siyang buhayon liwat, ipinanuga ni Jesus sa saiyang mga disipulo na padagos siyang magigin kaibanan ninda “sa gabos na aldaw sagkod sa pagtatapos kan sistema nin mga bagay.” (Mat. 28:20) Paagi sa paggiya ni Jesus, tinutukduan kita  kan “maimbod asin mapagmansay na uripon” kun paano idedepensa an satong mga tinutubod. (Mat. 24:45-47; 1 Ped. 3:15) Naaako ta ini paagi sa mga instruksiyon sa mga pagtiripon sa kongregasyon, arog kan An Satong Kristiyanong Pamumuhay Asin Ministeryo, asin paagi sa basado sa Bibliya na mga publikasyon, arog kan mga artikulong “Simbag sa mga Hapot sa Bibliya” na nasa website na jw.org. Inaaprobetsaran mo daw an mga probisyon na ini? Kun iyo, lalo pang makusog an saimong buot asin kumbiksiyon. Asin, arog kan mga apostol, dai mo tutugutan an ano man o an siisay man na papunduhon kang magtaram manungod sa makangangalas na espirituwal na mga katotoohan na nahiling mo asin nadangog.

13, 14. Kun napapaatubang kita sa pagkontra, ano an dapat tang gibuhon, asin taano?

¹³ Pagkatapos na mapalibre, nagduman tulos si Pedro asin Juan sa mga kairiba ninda sa kongregasyon. “Sararo sindang nag-arang sa Diyos sa makusog na boses” asin namibi para sa kusog nin buot tanganing padagos na makapaghulit. (Gibo 4:24) Aram na marhay ni Pedro na sarong kamangmangan na magtiwala sa sadiring kusog pag hinihinguwa tang gibuhon an kabutan nin Diyos. Pirang semana pa sana an nakalihis, may pagtitiwala sa sadiring sinabi niya ki Jesus: “Maski pa bayaan ka ninda gabos dahil sa mangyayari sa saimo, dai taka nuarin man babayaan!” Pero arog kan ihinula ni Jesus, madalion na nadaog kan pagkatakot sa tawo si Pedro asin ninigaran na bisto niya an saiyang amigo asin paratukdo. Minsan siring, nakanuod si Pedro sa nagibo niyang sala.—Mat. 26:33, 34, 69-75.

¹⁴ Bakong igo an pagkaigwa lang nin determinasyon para maisagibo mo an saimong asignasyon na magpatotoo manungod ki Cristo. Pag pinupurbaran kan mga nagkokontra na paluyahon an pagtubod mo o na papunduhon kang maghulit, arugon an halimbawa ni Pedro asin Juan. Mamibi ki Jehova na tawan ka nin kusog. Maghagad nin tabang sa mga tugang sa kongregasyon. Sabihon sa mga elder asin sa iba pang mga maygurang an manungod sa inaatubang mong mga kadipisilan. An mga pamibi kan iba  makusog na puwersa na makakatabang sa saimo na makatagal.—Efe. 6:18; Sant. 5:16.

15. Taano ta dai dapat pangluyahan nin buot idtong mga nagpundo kaidtong maghulit nin dikit na panahon?

¹⁵ Kun nadaog ka man kaidto nin panggigipit asin nagpundo kang maghulit nin dikit na panahon, dai pangluyahan nin buot. Girumdumon na an gabos na apostol nagpundong maghulit nin dikit na panahon pagkagadan ni Jesus, pero dai nahaloy nagin aktibo giraray sinda. (Mat. 26:56; 28:10, 16-20) Dai pagtugutan na pangluyahan ka nin buot huli sa mga salang nagibo mo kaidto. Imbes, gamiton mo an eksperyensiyang iyan asin an mga leksiyon na nanudan mo diyan para pakusugon an iba.

16, 17. Ano an manunudan ta sa pamibi kan mga parasunod ni Cristo sa Jerusalem?

¹⁶ Ano an dapat tang ipamibi pag ginigipit kita kan mga nasa awtoridad? Tabi na mangnuhon na dai hinagad kan mga disipulo na dai na sinda mapaatubang sa mga pagbalo. Nagigirumduman nindang marhay an sinabi ni Jesus: “Kun pinersegir ninda ako, pepersegiron man ninda kamo.” (Juan 15:20) Imbes, hinagad ki Jehova kan maimbod na mga disipulong ini na ‘hilingon’ an mga patakot kan mga nagkokontra. (Gibo 4:29) Nagpokus an mga disipulo sa kun ano an pinakaimportante—an kabutan nin Diyos. Nasasabutan ninda na an pagpersegir sa sainda, sa katunayan, kautuban nin mga propesiya. Aram ninda na, arog kan itinukdo ni Jesus sa sainda na ipamibi, an kabutan nin Diyos ‘mangyayari sa daga,’ ano man an tibaad sabihon nin tawo man sanang mga tagapamahala.—Mat. 6:9, 10.

¹⁷ Tanganing maisagibo an kabutan nin Diyos, namibi ki Jehova an mga disipulo: “Tabangan mo an saimong mga uripon na padagos na ipahayag an saimong tataramon na daing takot.” Ano tulos an simbag ni Jehova? “An lugar na pinagtitiripunan ninda natanyog, asin sinda gabos napano kan banal na espiritu asin nagpuon na magpahayag kan tataramon nin Diyos na daing takot.” (Gibo 4:29-31) Mayong makakapugol na mautob an kabutan nin Diyos. (Isa. 55:11) Gurano man kagrabe an pagkontra, gurano man kamakapangyarihan an kalaban, kun maarang kita sa Diyos paagi sa pamibi, makakasigurado kita na tatawan niya kita kan kusog na padagos na maipahayag nin daing takot an saiyang tataramon.

18. Ano an ginibo kan mga miyembro kan kongregasyon sa Jerusalem para sa lambang saro?

¹⁸ Dai nahaloy, an bagong kongregasyon sa Jerusalem uminuswag, na may labi nang 5,000 na miyembro. d Dawa magkakalain sinda nin pinaghalian, an mga disipulo “nagkasararo sa puso asin kalag.” Sararo sinda sa pag-iisip asin sa dalagan nin kaisipan. (Gibo 4:32; 1 Cor. 1:10) An mga disipulo dai lang namibi ki Jehova na bendisyunan an saindang mga paghihinguwa. Sinuportaran man ninda an lambang saro sa espirituwal asin, kun kinakaipuhan, sa materyal. (1 Juan 3:16-18) Halimbawa, an disipulong si Jose, na inaapod kan mga apostol na Bernabe, nagpabakal kan sadiri niyang daga asin daing kaimutan na idinonar an enterong kabaklan tanganing tabangan idtong mga hali sa hararayong kadagaan na magdanay sa Jerusalem nin huruhalawig pang panahon para urog pa sindang makanuod manungod sa bago nindang pagtubod.

19. Taano ta ginadan ni Jehova si Ananias asin Safira?

¹⁹ An mag-agom na Ananias asin Safira nagpabakal man nin daga asin nagtao nin kontribusyon. Nagsagin-sagin sinda na an itinatao ninda iyo an enterong kabaklan; pero an totoo, “pasekreto [nindang] itinago an ibang parte kan kabaklan.” (Gibo 5:2) Ginadan ni Jehova an mag-agom na ini, bakong huli ta kulang an idinonar ninda, kundi huli ta maraot an motibo ninda sa pagtao saka mapandaya sinda. Nagputik sinda “bako sa mga tawo, kundi sa Diyos.” (Gibo 5:4) Arog kan mga parasagin-sagin na kinondenar ni Jesus, mas gusto ni Ananias asin Safira na makamtan an pag-umaw kan mga tawo imbes na an pag-uyon nin Diyos.—Mat. 6:1-3.

20. Ano an mga manunudan ta manungod sa pagtao ki Jehova?

²⁰ Arog kan pagigin matinao kan maimbod na mga disipulo sa Jerusalem kan inot na siglo, minilyon na Saksi sa presenteng panahon an nagsusuportar sa pambilog na kinaban na gibuhon na paghuhulit paagi sa pagtao nin gikan sa buot na mga donasyon. Mayo sa sainda an pinirit na magtao kan saiyang panahon o kuwarta tanganing suportaran an gibuhon na ini. Iyo, habo ni Jehova na maglingkod kita sa saiya nin magabat an buot o napipiritan. (2 Cor. 9:7) Pag nagtatao kita, interesado si Jehova bako sa kantidad kundi sa motibo niyato sa pagtao. (Mar. 12:41-44) Habo nanggad niyato na magin arog ni Ananias asin Safira, na naglilingkod lang sa Diyos huli sa pansadiring pakinabang o tanganing umawon kan mga tawo. Imbes, arog ni Pedro, Juan, asin Bernabe, lugod na an motibo ta pirmi sa paglilingkod ki Jehova iyo an satong tunay na pagkamuot sa Diyos asin sa satong kapwa.—Mat. 22:37-40.