1. Taano ta may mga maninigong tawan nin onra, asin ano an pag-uulayan niyato ngunyan?

AN PAGTAO nin onra sa saro iyo an pagpahiling sa saiya nin espesyal na atensiyon asin nin paggalang. Sa parati, nagpapahiling kita nin arog kaiyan na atensiyon asin paggalang sa mga nakagibo nin sarong bagay na kaumaw-umaw o sa mga may halangkaw na katungdan. Kaya, pag-ulayan ta kun siisay an mga dapat tang tawan nin onra, asin kun taano ta maninigo sindang mag-ako kaiyan.

2, 3. (a) Taano ta si Jehova an lalo nang maninigo na tawan nin onra? (Hilingon an ritrato sa itaas.) (b) Sa Kapahayagan 5:13, siisay an Kordero, asin taano ta angay siyang tawan nin onra?

² Arog kan sinasabi sa Kapahayagan 5:13, maninigo nanggad na tawan nin onra an “Saro na nakatukaw sa trono asin [an] Kordero.” Mababasa ta sa kapitulo 4 kan libro man sanang iyan an sarong dahilan kun taano ta maninigong tawan nin onra si Jehova. An mamuraway na mga linalang sa kalangitan makusog an boses na inuumaw si Jehova, “an Saro na nabubuhay sagkod nuarin pa man.” Sinasabi ninda: “Angay ka, Jehova na samuyang Diyos, na mag-ako kan kamurawayan asin kan onra asin kan kapangyarihan, huli ta linalang mo an gabos  na bagay, asin huli sa saimong kabutan, sinda nag-eksister asin nalalang.”—Kap. 4:9-11.

³ An Kordero iyo si Jesu-Cristo, “an Kordero nin Diyos na naghahali kan kasalan kan kinaban.” (Juan 1:29) Sinasabi kan Bibliya na nakakalabi nanggad siya sa gabos na tawong hadi o nagin hadi huling “siya an Hadi kan mga namamahala bilang hadi asin Kagurangnan kan mga namamahala bilang kagurangnan, an solamenteng igwa nin imortalidad, na nag-iirok sa liwanag na dai nanggad maranihan, siya na dai nin siisay man na tawo na nakahiling o makakahiling.” (1 Tim. 6:14-16) Igwa pa daw nin ibang hadi na gikan sa buot na itinao an saiyang buhay bilang pantubos sa satong mga kasalan? Siguradong arog kan dakulon na linalang sa langit, napapahiro ka man na ipahayag: “An Kordero na ginadan angay na mag-ako kan kapangyarihan asin kayamanan asin kadunungan asin kusog asin onra asin kamurawayan saka kaumawan.”—Kap. 5:12.

4. Taano ta bakong opsiyonal an pagtao nin onra ki Jehova asin ki Cristo?

⁴ Bakong opsiyonal an pagtao nin onra ki Jehova asin ki Cristo huling nakadepende diyan an pagkamit ta nin buhay na daing katapusan. Masasabutan ta iyan sa sinabi ni Jesus sa Juan 5:22, 23: “An Ama dai nanggad naghuhukom sa kiisay man, kundi ipinagkatiwala niya sa Aki an gabos na paghukom, tanganing an gabos magtaong onra sa Aki kun paanong nagtatao sinda nin onra sa Ama. An siisay man na dai nagtataong onra sa Aki dai nagtataong onra sa Ama na nagsugo sa saiya.”—Basahon an Salmo 2:11, 12.

5. Taano ta maninigo niyatong pahilingan nin onra asin paggalang an mga tawo?

⁵ Linalang an mga tawo sigun ‘sa ladawan nin Diyos.’ (Gen. 1:27) Kaya, naipapahiling kan kadaklan an mga kuwalidad nin Diyos dawa sa magkakaibang lebel. May kakayahan an mga tawo na magpahiling nin pagkamuot, kabuutan, asin pagmalasakit sa iba. Huling an mga tawo linalang na igwa nin konsiyensiya—dawa ngani kun minsan dai iyan napapatuod nin tama—may natural sindang kakayahan na maaraman kun ano an tama o sala, onesto o bako, angay o bakong angay. (Roma 2:14, 15) Kadaklan sa mga tawo gusto an mga bagay na malinig saka magayon, asin gusto nindang magkaigwa nin matuninong na relasyon sa iba. Aram man ninda o dai, minsan paano naipapahiling ninda an kamurawayan ni Jehova. Kaya maninigo kitang magpahiling sa sainda nin onra asin paggalang.—Sal. 8:5.

6, 7. Sa pagtao nin onra sa mga tawo, paano napapalain an Mga Saksi ni Jehova?

⁶ Kaipuhan niyatong magin timbang sa kun anong klase asin kun gurano kadakulang onra an dapat niyatong itao sa mga tawo. An kadaklan kaya sa bakong perpektong mga tawo impluwensiyadong marhay kan espiritu kan kinaban ni Satanas. Huli kaiyan, may tendensiya sinda na idoluhon an partikular na mga lalaki o babayi, imbes na magpahiling sa mga ini nin tama sanang onra asin paggalang. Halangkaw na marhay an paghiling ninda sa mga lider nin relihiyon asin nin pulitika, sa mga atleta, artista, saka sa iba pang sikat na tawo, asin ibinibilang an mga ini na garo na mga diyos. Kaya inaarog kan mga tawo, hoben man o may edad, an hiro-hiro, pagbado, asin paggawi kan mga hinahangaan ninda.

⁷ Linilikayan kan tunay na mga Kristiyano an salang paaging iyan nin pagtao nin onra sa mga tawo. Sa gabos na tawong nabuhay sa daga, si Cristo sana an maibibilang tang sarong perpektong arugan. (1 Ped. 2:21) Habo nin Diyos na tawan ta an mga tawo nin onra na sobra sa maninigo. Kaipuhan niyatong tandaan na “an gabos nagkasala saka dai nakaabot sa kamurawayan nin Diyos.” (Roma 3:23) Iyo, mayo nin tawo na maninigong tawan nin onra na haros maibibilang nang idolatriya.

8, 9. (a) Ano an pagmansay kan Mga Saksi ni Jehova sa mga opisyal nin gobyerno? (b) Sagkod sain kita magigin makinuyog sa mga opisyal nin gobyerno?

 ⁸ Sa sekular na gobyerno, may mga tawo na nasa katungdan arog kan mga opisyal kaiyan. Sinda an linalauman na mapautob nin ley saka mapadanay nin areglo, asin maasikaso kan mga pangangaipo kan mga nasasakupan ninda. Nakikinabang diyan an gabos. Huli kaiyan, sinadol ni apostol Pablo an mga Kristiyano na midbidon an siring na mga opisyal nin gobyerno bilang “haralangkaw na awtoridad” asin na dapat magpasakop sa sainda an mga Kristiyano. Sinabi niya: “Itao sa gabos an para sa sainda: sa naghahagad nin buhis, an buhis; . . . sa maninigong tawan nin onra, an onra.”—Roma 13:1, 7.

⁹ Kaya bilang mga Saksi ni Jehova, gikan sa buot kitang nagtatao nin onra sa mga opisyal, depende sa linalauman asin kinaugalian sa sarong lugar. Nakikikooperar kita sa sainda mantang ginigibo ninda an saindang mga responsabilidad. Siyempre, an onra asin suportang itinatao ta sa sainda igwa nin rasonableng mga limitasyon na basado sa Kasuratan. Dai niyato iyan dapat paabuton sa punto na masusuway ta na an Diyos, o na dai na kita magigin neutral.—Basahon an 1 Pedro 2:13-17.

10. Anong marahay na halimbawa an ipinahiling kan mga lingkod ni Jehova kaidto sa pagtao nin onra sa gobyerno asin sa mga opisyal kaiyan?

¹⁰ Makakanuod kita sa mga lingkod ni Jehova kaidto kun paano mapahiling nin onra sa gobyerno asin sa mga opisyal kaiyan. Kan ipagbuot kan Imperyo nin Roma na magparehistro an gabos na sakop kaiyan, nagsunod si Jose asin si Maria. Nagbiyahe sinda pa-Betlehem dawa kabulanan na ni Maria sa panganay ninda. (Luc. 2:1-5) Kan inakusaran man si Pablo, magalang niyang idinepensa an saiyang sadiri asin nagpahiling nin tamang onra ki Hading Herodes Agripa asin ki Festo, an gobernador kan probinsiya nin Judea na sakop kan Roma.—Gibo 25:1-12; 26:1-3.

11, 12. (a) Taano ta magkalain an pagtrato niyato sa mga opisyal nin gobyerno asin sa mga lider nin relihiyon? (b) Ano an nagin marahay na resulta kan magpahiling nin onra an sarong Saksing taga Austria sa sarong pulitiko?

¹¹ Pero bakong tama para sa mga Saksi ni Jehova na magtao nin espesyal na onra sa mga lider nin relihiyon, dawa pa iyan an tibaad linalauman kan mga ini. Dai ninda itinutukdo an katotoohan dapit sa Diyos asin binibiribid an mga katukduan kan saiyang Tataramon. Nagpapahiling kita sa sainda nin onra arog kan ipinapahiling ta sa satong kapwa, pero dai niyato sinda tinatawan nin espesyal na onra. Kinondenar sinda ni Jesus asin inapod na mga parasagin-sagin asin butang paragiya. (Mat. 23:23, 24) Sa ibong na lado, an satong pagpahiling nin maninigong paggalang saka onra sa mga opisyal nin gobyerno puwedeng magkaigwa nin positibo asin dai pa ngani inaasahan na mga resulta.

¹² Si Leopold Engleitner, sarong maigot na Saksi sa Austria, inarestar kan mga Nazi asin ipinadara sa kampo de-konsentrasyon sa Buchenwald sakay nin tren. Sakay man kaiyan an saro pang preso na si Dr. Heinrich Gleissner. Saro siyang pulitiko kaidto sa Austria pero dai siya gusto kan mga Nazi. Mantang nasa biyahe, magalang na ipinaliwanag ni Brother Engleitner ki Dr. Gleissner an mga tinutubod niya, asin atentibo ining nagdangog sa saiya. Pagkatapos kan Giyera Mundiyal II, pirang beses na ginamit ni Gleissner an saiyang impluwensiya tanganing tabangan an mga Saksi sa Austria. Tibaad may maisip ka pang ibang halimbawa kun sain nagkaigwa nin marahay na resulta an pagpahiling kan mga Saksi nin paggalang sa mga opisyal, na itinatao sa mga ini an maninigong onra kauyon kan sinasabi sa Bibliya.

13. Sa satong mga kapagtubod, siisay an lalo nang maninigong pahilingan nin paggalang saka onra, asin taano?

¹³ Siyempre, kaiba an satong mga kapagtubod  sa mga dapat niyatong tawan nin onra asin paggalang. Lalo na an mga elder na iyo an nanginginot sa sato. (Basahon an 1 Timoteo 5:17.) Tinatawan ta sinda nin onra ano man an saindang nasyonalidad, pinag-adalan, o estado sa buhay. Inaapod sinda kan Bibliya na “mga balaog na tawo” asin mahalaga an kabtang ninda sa areglo nin Diyos sa pag-asikaso kan mga pangangaipo kan saiyang banwaan. (Efe. 4:8) Isipa na sana an mga elder sa kongregasyon, paraataman nin sirkito, saka an mga miyembro kan Komite kan Sangay asin kan Namamahalang Grupo. Dakula an pagpapahalaga kan mga Kristiyano kan inot na siglo sa mga ninombrahan na manginot, asin arog man kita kaiyan ngunyan. Dai niyato iniidolo an midbid na mga representante kan Kristiyanong kongregasyon o tinatrato sindang garo mga anghel pag kaibanan ta sinda. Pero, nagpapahiling kita sa sainda nin paggalang asin onra huli sa saindang pagpapagal asin kapakumbabaan.—Basahon an 2 Corinto 1:24; Kapahayagan 19:10.

14, 15. Ano an pagkakalain kan Kristiyanong mga pastor asin kan mga lider nin relihiyon?

¹⁴ An siring na mga elder mga mapakumbabang pastor. Habo ninda na tratuhon niyato sinda na garo mga artista. Iyan an pagkakalain ninda sa dakul na lider nin relihiyon sa satong panahon asin kan inot na siglo. Sinabi ni Jesus dapit sa mga ini: “Gustong-gusto ninda an mga puwesto sa bangkete na nakareserba sa espesyal na mga bisita asin an inutan na mga tukawan sa mga sinagoga saka gusto nindang tinatawan sinda nin galang sa mga pampublikong lugar.”—Mat. 23:6, 7.

¹⁵ Mapakumbabang sinusunod kan tunay na Kristiyanong mga pastor an sadol ni Jesus: “Dai kamo magpaapod na Rabbi, huli ta saro sana an saindong Paratukdo, asin gabos kamo magturugang. Saro pa, dai nindo pag-apudon na saindong ‘ama’ an siisay man sa daga, huli ta saro sana an saindong Ama, an Saro na nasa langit. Dai man kamo magpaapod na ‘lider,’ huli ta saro sana an saindong Lider, an Cristo. Alagad an saro na pinakaurog sa saindo dapat na magin lingkod nindo. An siisay man na naglalangkaw kan saiyang sadiri ibababa, asin an siisay man na nagpapakumbaba ilalangkaw.” (Mat. 23:8-12) Ini an dahilan kaya an mga elder sa kongregasyon sa bilog na kinaban namumutan, iginagalang, asin tinatawan nin onra kan saindang mga kapagtubod.

16. Taano ta dapat na padagos niyatong hinguwahon na masabutan asin iaplikar an sinasabi kan Bibliya mapadapit sa pagtao nin onra?

¹⁶ Iyo, tibaad kaipuhan nin panahon para magin timbang kita sa kun paano asin kun kiisay kita matao nin onra. Totoo man ini sa inot na mga Kristiyano. (Gibo 10:22-26; 3 Juan 9, 10)  Pero, sulit nanggad kun hihinguwahon tang iaplikar an mga sadol kan Bibliya mapadapit sa pagtao nin onra. Kadakul nin mga pakinabang kun magigin timbang kita sa bagay na iyan.

17. Ano an mga pakinabang kan pagpahiling nin onra sa mga tawong nasa katungdan?

¹⁷ Kun nagpapahiling kita nin paggalang asin onra sa mga nasa katungdan sa satong komunidad, mas posibleng marhay na idepensa ninda an satong deretso na maghulit. Sa parati, nagigin marahay an impresyon sa satong gibuhon huli kaiyan. Pirang taon na an nakaagi, nag-atender si Birgit, sarong payunir sa Germany, sa graduation kan aki niyang babayi. Sinabi kan mga maestra ki Birgit na gustong-gusto ninda na magin estudyante an mga aki nin Saksi. Asin para sa sainda nagin mas marahay na lugar an eskuwelahan huli sa mga aki nin Saksi. Ipinaliwanag sa sainda ni Birgit, “Tinutukduan mi an mga aki mi na sunudon an mga pamantayan nin Diyos. Kaiba diyan an pagpahiling nin paggalang saka onra sa mga maestra ninda.” Saro sa mga maestra an nagsabi, “Kun gabos gayod na estudyante mi arog kan aki nindo, garo man sana paraiso an eskuwelahan.” Pakalihis nin pirang semana, saro sa mga maestra an nag-atender sa sarong kumbensiyon sa Leipzig.

18, 19. Ano an dapat niyatong tandaan kun nagtatao kita nin onra sa mga elder?

¹⁸ Siyempre dapat na basado sa perpekto asin madunong na mga prinsipyo na nasa Tataramon nin Diyos an ipapahiling niyatong onra sa mga elder sa kongregasyon. (Basahon an Hebreo 13:7, 17.) Puwede ta sindang komendaran asin dapat talaga niyatong gibuhon iyan huli sa saindang mga pagpapagal. Hinguwahon ta man na sumunod sa mga instruksiyon ninda. Makakatabang iyan na padagos nindang magibo nin may kaugmahan an saindang mga paninimbagan. Pero, dai iyan nangangahulugan na aarugon ta na nin eksakto an sarong “bistadong” elder sa paagi niya nin pagbado, pagpakarhay sa sadiri, pagtaram sa publiko, o dawa sa paagi niya nin pakikipag-ulay. Puwede iyan magtao nin salang impresyon. Dapat niyatong girumdumon na arog ta, bako man siyang perpekto. An dapat niyatong arugon asin sundan iyo si Cristo.

¹⁹ Makakatabang sa mga elder kun tinatawan ta sinda nin angay na onra asin paggalang mantang dai man sinda tinatrato na garo mga artista. Paagi kaini, mas malilikayan ninda na magin mapalangkaw asin mamati na garo nakakalabi o mas matanos sinda sa iba.

20. Paano makakatabang sa sato an pagtao nin onra sa iba?

²⁰ An pagpahiling nin onra sa mga maninigo kaiyan makakatabang man sa sato na dai magpokus sa satong sadiri asin dai magin mapalangkaw kun umawon kita nin iba. Pinagdadanay man kita kaiyan na magin kauyon kan organisasyon ni Jehova, na dai nagtatao nin sobra o bakong maninigong onra sa siisay man na tawo—kapagtubod man o bako. Saka madunong nanggad iyan ta makakatabang iyan sa sato na dai mangluya kun may magibong nakakadisganar an saro na pinapahilingan ta nin onra.

21. Ano an pinakamahalagang pakinabang sa pagtao nin tamang onra sa mga maninigo kaiyan?

²¹ An pinakamahalagang pakinabang sa pagtao nin tamang onra sa mga maninigo kaiyan iyo na napapaugma niyato an Diyos. Ginigibo ta an gusto niya asin huli kaiyan napapagdanay niyato an satong integridad sa saiya. Makakadagdag iyan sa simbag ni Jehova sa siisay man na magtuya sa saiya. (Tal. 27:11) Dakul sa kinaban na ini an dai aram kun paano matao nin onra sa tamang paagi. Nagpapasalamat nanggad kita na tinukduan kita kun paano mapahiling nin onra sa paaging inuuyunan ni Jehova!