AN PANTAHAR na korteng baroto na kapot ni Jordan garo bako man espesyal. Pero, saro iyan sa mga pinakainiingat-ingatan niya. “Kan aki pa ako, ’tinao ini sako ni Lolo Russell, sarong may edad nang amigo kan pamilya mi,” an sabi ni Jordan. Pagkagadan ni Russell, naaraman ni Jordan na dakulaon an nagin papel kaini sa buhay kan lolo asin mga magurang niya, na pinakusog sinda ni Russell sa masakit na mga panahon. “Ngunyan na mas dakul akong naaraman dapit ki Lolo Russell, lalong nagin mahalaga sako an sadit na regalong ini,” an sabi ni Jordan.

Ipinapahiling kan eksperyensiya ni Jordan na tibaad para sa iba, dikit sana o mayong halaga an sarong regalo. Pero para sa mapag-apresyar na nag-ako kaiyan, posibleng mahalagang marhay iyan o daing kapantay pa ngani an halaga. Ilinaladawan kan Bibliya an sarong regalong daing katumbas an halaga sa bantog na mga tataramon na ini: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.”—Juan 3:16.

Sarong regalo na matao nin buhay na daing katapusan sa maako kaiyan! May mas malabi pa daw sa regalong iyan? Tibaad dai nasasabutan kan iba an halaga kaiyan, pero para sa tunay na mga Kristiyano, iyan “dakula an halaga.” (Salmo 49:8; 1 Pedro 1:18, 19) Pero, taano ta itinao nin Diyos an buhay kan saiyang Aki bilang regalo para sa kinaban?

Ipinaliwanag ni apostol Pablo an dahilan: “Paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo.” (Roma 5:12) An inot na tawong si Adan nagkasala paagi sa tuyong pagsuway sa Diyos, kaya kan huri nagadan siya. Paagi ki Adan, an kagadanan namana kan gabos niyang gikan—an bilog na katawuhan.

“An bayad nin kasalan iyo an kagadanan, alagad an regalo nin Diyos iyo an buhay na daing  katapusan paagi ki Cristo Jesus na satuyang Kagurangnan.” (Roma 6:23) Para iligtas an katawuhan sa sentensiyang kagadanan, isinugo nin Diyos sa daga an saiyang Aki, si Jesu-Cristo, tanganing isakripisyo an perpektong buhay kaini para sa kinaban. Basado sa sakripisyong iyan, na inaapod na “pantubos,” an gabos na nagtutubod ki Jesus magkakaigwa nin buhay na daing katapusan.—Roma 3:24.

Mapadapit sa mga biyaya na itinatao nin Diyos sa saiyang mga parasamba paagi ki Jesu-Cristo, si Pablo nagsabi: “Salamat sa Diyos huli kan saiyang daing bayad na regalo na dai lubos mailadawan sa sobrang rahay.” (2 Corinto 9:15) Iyo, pambihirang marhay an pantubos kaya dai ta iyan lubos na ikaladawan. Pero sa gabos na marahay na regalo nin Diyos sa katawuhan, taano ta espesyal na marhay an pantubos? Paano iyan napapaiba sa iba pang mga regalo nin Diyos? * Paano ta maipapahiling an pasasalamat sa regalong iyan? Inaagda mi ika na basahon an simbag kan Bibliya sa mga hapot na ini sa sunod na duwang artikulo.