Halimbawa, si Sally, * na nakaistar sa Estados Unidos, na haros naubos an gabos na pagsadiri huli sa bagyo, nagsabi: “Garo dai ko na kakayanon. Dakul na aldaw na gusto ko nang magsuko.”

O paano kun magadanan ka nin mahal sa buhay? Si Janice, na taga Australia, nagsabi: “Kan magadan su duwa kong aking lalaki, kinaipuhan kong puruton an garo baga nagkaparasang pidaso kan sakong buhay tanganing bilugon giraray iyan sa abot kan sakong pinakamakakaya. Nakimahirak ako sa Diyos: ‘Diyos ko, dai ko na tabi kaya! Pabayaan mo na akong magpahingalo. Habo ko nang magmata.’”

Si Daniel man garo sinakluban nin langit kan maaraman niya na linoko siya kan agom niya. Sinabi niya: “Kan magtuga an misis ko na may karelasyon siyang iba, garo sinaksak an puso ko. Dai mawara-wara an grabeng kulog, na naglawig nin pirang bulan.”

Ipapaliwanag sa isyung ini kan An Torrengbantayan kun paanong may saysay pa man giraray an mabuhay dawa

• Inagihan nin kalamidad

• Nagadanan nin mahal sa buhay

• Linoko ka kan saimong agom

• May malalang hilang

• Pagmati mo habo mo nang mabuhay

Inot tang pag-ulayan kun paano ta makakayanan an sitwasyon pag inagihan nin kalamidad.