Nahiling Ninda an Pagkamuot kan Kongregasyon
SI Yomara saka an mga tugang niyang lalaki—si Marcelo saka si Hiver—nakaistar sa sarong sadit na baryo sa Guatemala. Si Yomara an inot na nakipag-adal nin Bibliya sa mga Saksi, tapos kan huri nag-iba na man sa pag-adal an duwa niyang tugang. Kaya lang may problema. Buta an tulong magturugang saka dai tataong magbasa nin braille. Kaya, binabasa sa sainda kan nagtutukdo sainda nin Bibliya an pag-aadalan saka an mga teksto na nasa leksiyon.
An pag-atender sa mga pagtiripon kan kongregasyon an saro pa sa nagin dipisil para sa sainda. Kun sinda sana, dai ninda kaya an 40 minutos na pagbiyahe pasiring sa pinakaharaning Kingdom Hall. Pero naggibo nin paagi an mga tugang sa kongregasyon para makaatender sinda sa gabos na pagtiripon. Tapos kan tawan na sinda nin mga kabtang bilang estudyante sa midweek na pagtiripon, tinabangan sinda kan mga tugang na matuom an saindang mga presentasyon.
Kan Mayo 2019, nagpuon nang magkaigwa nin mga pagtiripon kan kongregasyon sa saindang baryo. Kan panahon man na iyan, igwa nin mag-agom na regular payunir na nagbalyo sa saindang baryo. Ginibo nindang pasuhan na tukduan an tulong magturugang na ini na makabasa asin makasurat nin braille, maski ngani sinda mismong mag-agom dai tataong mag-braille. Kaya nagduman sinda sa sarong librarya para pag-adalan kun paano magtukdo nin braille.
Si Marcelo na nagkokomento sa sarong pagtiripon kan kongregasyon
Pirang bulan lang, mahusay nang magbasa nin braille an tulong magturugang, asin lalo kaiyan naparikas an pag-uswag ninda sa espirituwal. a Ngunyan si Yomara, Marcelo, saka si Hiver naglilingkod bilang regular payunir. Sarong ministeryal na lingkod si Marcelo. Sa bilog na semana, maiguton sindang nagpapartisipar sa espirituwal na mga aktibidad, asin talagang nakakaulakit an saindang kaigutan.
Ipinagpapasalamat na marhay kan tulong magturugang an mamumuton na suporta kan kongregasyon. “Kan inot mi pa sanang pagkabiristuhan, ipinahiling na samo kan mga Saksi an tunay na Kristiyanong pagkamuot,” an sabi ni Yomara. “May marahayon kaming mga amigo sa kongregasyon mi, saka parte kami kan sarong internasyonal na kasararuan nin magturugang na binubugkos nin pagkamuot,” an sabi man ni Marcelo. Hinahalat-halat ni Yomara saka kan duwang tugang niya an aldaw na mahihiling na ninda an daga na ginibo nang paraiso.—Sal. 37:10, 11; Isa. 35:5.
a An brosyur na Learn to Read Braille dinisenyo para tabangan an sarong buta o may diperensiya sa paghiling na makanuod na magbasa asin magsurat nin braille.
Puwede Mo Man Magustuhan
KUN PAANO GINAGAMIT AN SAINDONG MGA DONASYON
Mga Tuldok na Nakapabago nin Buhay
Dai lang kita naggigibo nin mga publikasyon sa braille kundi nagtutukdo man kita sa mga tawo na magbasa nin braille.
