MGA pirang taon na an nakaagi, an mag-agom na Roald asin Elsebeth, na kaidto dai pang 50 anyos, namumuhay nin kumportable sa Bergen, an ikaduwang pinakadakulang siyudad sa Norway. Kaiba kan mga aki nindang si Isabel asin Fabian, maimbod sindang nakikikabtang sa mga aktibidad sa kongregasyon. Elder si Roald asin payunir si Elsebeth, mantang maigot na mga parahayag si Isabel asin Fabian.

Minsan siring, kan Setyembre 2009, nagdesisyon an pamilya na gumibo nin naiibang bagay—maghulit nin sarong semana sa napapasuway na lugar. Kaya, kaibanan si Fabian, na 18 anyos kaidto, si Roald asin Elsebeth nagbiyahe pasiring sa Nordkyn, sarong peninsula sa Finnmark, sa itaas kan Arctic Circle. Naghulit sinda duman sa baryo nin Kjøllefjord kaiba an ibang mga tugang na nagduman man sa napapasuway na lugar na idto tanganing maghulit. “Sa kapinunan kan semana,” an nagigirumduman ni Roald, “kontento nanggad ako ta nahimo kong iareglo an sakong mga gibuhon tanganing makapakikabtang sa espesyal na aktibidad na ini sa laog nin sarong semana.” Pero pakalihis nin pirang aldaw kan semanang idto, dai na mapamugtak si Roald. Ano an nangyari?

“Bigla na sana,” an sabi ni Roald, “hinapot kami ni Mario, sarong payunir sa Finnmark, kun baga andam kaming magbalyo sa sarong banwaan na an pangaran Lakselv tanganing tabangan an kongregasyon duman na may 23 na parahayag.” Nabigla si Roald sa dai inaasahan na hapot na iyan. Nagpaliwanag siya: “Naisip mi na ni Elsebeth an dapit sa posibilidad na maglingkod kun sain mas dakula an pangangaipo—pero bako ngunyan na nasa poder mi pa an mga aki.” Pero, dawa sa pirang aldaw sanang paghuhulit ni Roald sa napapasuway na lugar na idto, nahiling niya na an mga tawo duman gustong makanuod manungod ki Jehova. Kaipuhan ninda nin tabang ngunyan—bakong sa maabot pa. “Nakonsensiya ako kan hapot na idto asin dai ngani ako napaturog nin pirang banggi,” an nagigirumduman niya. Dangan iniba ni Mario sa awto niya si Roald asin an pamilya kaini pasiring sa Lakselv, mga 240 kilometros sa timog nin Kjøllefjord. Gusto ni Mario na mahiling mismo kan mga bisita an sadit na kongregasyon duman.

Si Andreas, saro sa duwang elder duman sa Lakselv, iyo an naglibot sa mga bisita tanganing mahiling an lugar asin an Kingdom Hall. Mamumuton sindang inako kan kongregasyon asin sinabi ninda ki Roald saka Elsebeth na mauugma sindang marhay kun mabalyo duman an saindang pamilya tanganing tumabang sa gibuhon na pang-Kahadian. Nakangirit na sinabi ni Andreas na may inareglo na siyang interbyu sa trabaho para ki Roald asin Fabian! Ano an gigibuhon kan mga bisita?

Ini an inot na reaksiyon ni Fabian: “Mayo akong pagmawot na magbalyo digdi.” Dai niya gustong isipon na bayaan an dayupot niyang mga katuod, na kaiba-iba na niya sa saindang kongregasyon puon kan aki pa siya, para mag-istar sa sadit na banwaan. Saro pa, dai pa siya tapos sa pagsasanay para magin elektrisyan. Minsan siring, kan hinapot si Isabel (21 anyos kaidto) kun ano an sabuot niya dapit sa pagbalyo, sinabi niya: “Iyan mismo an gusto kong gibuhon kaidto pa!” Pero, sinabi pa niya: “Kan hinurop-hurop ko iyan, naisip ko, ‘Marahay daw talaga ini? Dai daw ako mapungaw sa mga amiga ko? Ano daw kun digdi na sana ako sa kongregasyon mi kun sain an mga bagay-bagay kumbenyente asin may kasiguruhan?’” Ano an nagin reaksiyon ni Elsebeth sa imbitasyon na iyan? “Namatian ko na tinawan ni Jehova nin asignasyon an pamilya mi,” an sabi niya, “pero naisip ko man an harong mi na bago pa sanang pakarhayon asin an gabos na pinundar mi duman sa nakalihis na 25 taon.”

Pakatapos kan espesyal na semana, si Roald asin an saiyang pamilya nagpuli sa Bergen, pero dai mahali-hali sa isip ninda an Kristiyanong mga tugang sa Lakselv na mga 2,100 kilometros an rayo sa sainda. “Pirme akong namimibi ki Jehova,” an sabi ni Elsebeth, “asin padagos akong nakikikomunikar sa mga katuod na nabisto mi paagi sa pagpadara nin mga retrato asin paghiras nin mga eksperyensiya sainda, asin sinda iyo man.” Si Roald nagsabi: “Kinaipuhan ko nin panahon tanganing mapag-isipan an dapit sa pagbalyo. Saka kinaipuhan kong konsideraron kun baga praktikal iyan. Paano mi masusustentuhan an samong sadiri? Nagparapamibi ako ki Jehova asin nakipag-ulay sa sakong pamilya saka sa eksperyensiyadong mga tugang.” Nagigirumduman ni Fabian: “Mantang pigpaparaisip ko iyan, mas narerealisar ko na mayo talaga ako nin rasonableng dahilan na magsayuma. Parati akong namimibi ki Jehova, asin luway-luway na nagkusog an pagmawot kong magbalyo duman.” Kumusta man si Isabel? Tanganing magin andam sa posibleng pagbalyo, nagpayunir siya sa lugar ninda. Pakalihis nin anom na bulan nin pagpapayunir, kun sain dakul man an ginamit niyang oras sa personal na pag-adal sa Bibliya, namati niya na andam na nanggad siyang magbalyo.

Mantang nag-uurog an pagmawot na maglingkod kun sain kaipuhan an mas dakul na parahayag, may ginibong mga lakdang an pamilya tanganing maabot an pasuhan ninda. Maugma si Roald sa trabaho niya, na halangkaw an suweldo, pero naghagad siya nin sarong taon na bakasyon. Minsan siring, pinakiulayan siya kan saiyang among na magtrabaho nin part-time—duwang semanang trabaho, anom na semanang bakasyon. “Dakula an nabawas sa ginaganar ko, pero marahay an nagin resulta kaiyan,” an sabi Roald.

Si Elsebeth nagsabi: “Pinakiulayan ako kan agom ko na maghanap nin harong sa Lakselv asin paarkilahan an harong mi sa Bergen. Nangaipo ini nin dakul na panahon asin paghihinguwa, pero nagin mapanggana kami. Dai nahaloy, an mga aki nakahanap nin part-time na trabaho,” an sabi pa niya, “asin nagtabang sinda sa panggastos sa pagkakan asin transportasyon.”

Si Isabel nagsabi: “Huling sadit an banwaan na binalyuhan mi, an pinakadipisil sako iyo an paghanap nin trabaho tanganing masuportaran an sadiri bilang payunir. Kun beses, garo mayo nin paglaom.” Pero, paagi sa  pagkua nin ano man na simpleng part-time na trabaho na nanumpungan niya—siyam durante kan inot na taon—nasuportaran ni Isabel an sadiri niya. Kumusta man si Fabian? “Tanganing matapos ko an pag-eskuwela para magin elektrisyan, kaipuhan ko pang magtrabaho bilang sarong aprentis. Ginibo ko iyan sa Lakselv. Pakatapos kaiyan, nakapasar ako sa exam asin nakahanap nin part-time na trabaho bilang elektrisyan.”

An mag-agom na Marelius asin Kesia gusto man na maglingkod kun sain kaipuhan an mas dakul na parahayag. Si Marelius, na 29 anyos ngunyan, nagsabi: “Huli sa mga pahayag asin interbyu sa kumbensiyon dapit sa pagpapayunir, napaisip ako na pahiwason an sakong paglilingkod.” Minsan siring, para ki Kesia, na 26 anyos ngunyan, dipisil an maparayo sa pamilya. “Namumundo talaga ako pag iniisip ko na mapaparayo ako sa mga namumutan ko,” an sabi niya. Saro pa, nagtatrabaho si Marelius nin bilog na panahon tanganing mabayadan an sangra sa harong ninda. Sinabi nia: “Sa tabang ni Jehova asin nin dakul na pamibi, kun sain hinagad mi na lugod makagibo kami nin mga pagbabago, nagibo ming bumalyo.” Inot, mas dakul na panahon an ginamit ninda sa pag-adal nin Bibliya. Dangan, ipinabakal ninda an saindang harong, naghali sa saindang trabaho, asin kan Agosto 2011 nagbalyo sinda sa siyudad nin Alta, sa norteng parte kan Norway. Tanganing masuportaran an saindang sadiri bilang mga payunir duman, nagtrabaho si Marelius bilang accountant asin si Kesia sa sarong tindahan.

An mag-agom na Knut asin Lisbeth, na mga 35 anyos ngunyan, napahiro kan mga eksperyensiya sa Yearbook dapit sa mga naglilingkod kun sain kaipuhan an mas dakul na parahayag kan Kahadian. “Huli sa mga eksperyensiyang iyan, naisip mi an dapit sa paglilingkod sa ibang nasyon,” an sabi ni Lisbeth, “pero nag-alangan ako huling nagduduwa-duwa ako kun baga kaya ining gibuhon nin ordinaryong tawo arog ko.” Sa ibong kaiyan, naggibo sinda nin mga lakdang tanganing maabot an saindang pasuhan. Si Knut nagsabi: “Ipinabakal mi an samong apartment asin, tanganing makatipid, nakiistar kami sa sakong ina. Paghaloy-haloy, tanganing magkaigwa nin eksperyensiya kun paano maglingkod sa ibang nasyon, sarong taon kaming nag-asosyar sa sarong kongregasyon na Ingles an lengguwahe sa Bergen, kun sain nag-istar kami sa ina ni Lisbeth.” Dai nahaloy, andam na si Knut asin Lisbeth sa dakulang pagbabago—an magbalyo sa Uganda. Nagpupuli sinda sa Norway duwang bulan kada taon tanganing magtrabaho. Paagi kaiyan, igwa sinda nin supisyenteng pondo para masuportaran an sadiri asin makapaghulit nin bilog na panahon sa Uganda sa kadaklan na bulan kan taon.

Ano an resulta kan saindang gikan sa buot na paglilingkod? Si Roald nagsabi: “Mas dakul nanggad an panahon mi na mag-iribanan bilang pamilya sa napapasuhay na lugar na ini kisa kan nasa Bergen kami. Nagin mas dayupot an samong pamilya. Sarong bendisyon na mahiling an pag-uswag kan samong mga aki sa espirituwal.” Sinabi pa niya: “Dai na kami gayong nahahadit sa materyal na  mga bagay. Bako na iyan importanteng marhay arog kan iniisip mi kaidto.”

Nahiling ni Elsebeth na kaipuhan niyang makanuod nin ibang lengguwahe. Taano? Kaiba sa teritoryo kan Kongregasyon nin Lakselv an baryo nin Karasjok, na iniistaran kan kadaklan sa mga Sami—sarong grupong etniko sa norteng parte nin Norway, Sweden, Finland, asin Russia. Kaya tanganing magin mas pasil an paghuhulit sa sainda, nag-adal si Elsebeth nin lengguwaheng Sami. Ngunyan, kaya niya na an simpleng pakikipag-ulay gamit an lengguwaheng iyan. Maugma daw siya sa bago niyang teritoryo? Siya nakangirit na nagsabi: “Nagkokondukta ako nin anom na pag-adal sa Bibliya. Nagustuhan ko talagang maglingkod digdi!”

Si Fabian, na saro nang payunir asin ministeryal na lingkod, nagsabi na sa bago nindang kongregasyon natabangan ninda ni Isabel an tulong tin-edyer na nangangaipo nin pagparigon sa buot tanganing urog na makikabtang sa mga aktibidad kan kongregasyon. An tulong hoben na iyan aktibo na ngunyan sa ministeryo. Sa katunayan, an duwa sa sainda bautisado na asin nag-auxiliary payunir kan Marso 2012. An saro sa mga tin-edyer na napaparayo na sa katotoohan nagpasalamat ki Fabian asin Isabel sa pagtabang sa saiya na “magpadagos giraray.” Si Fabian nagsabi: “Nataros nanggad an puso ko kan sinabi niya iyan. Maugma talagang magtabang sa iba!” Sinabi man ni Isabel: “Sa asignasyon na ini, talagang ‘nanamitan ko asin nahiling na marahayon si Jehova.’” (Sal. 34:8) Sinabi pa niya: “Saro pa, talagang nakakaugmang maglingkod digdi!”

Ngunyan, mas simple an pamumuhay ni Marelius asin Kesia pero mas makahulugan an buhay ninda. An kongregasyon sa Alta, na binalyuhan ninda, igwa na nin 41 parahayag. Si Marelius nagsabi: “Kun gigirumdumon, nakakapakusog na mahiling kun gurano kadakula an pagbabago kan samong buhay. Nagpapasalamat kami ki Jehova na nakakapaglingkod kami saiya bilang mga payunir digdi. Mayo nang mas nakakakontento pa digdi.” Sinabi pa ni Kesia: “Nanudan kong magtiwala nin lubos ki Jehova, asin dai niya kami pinabayaan. Nanudan ko man na an pagigin harayo sa mga kapamilya nakakatabang sako na mas pahalagahan an mga panahon na kaibanan ko sinda. Nungka kong pinagbasulan an desisyon mi.”

Kumusta man si Knut asin Lisbeth sa Uganda? Si Knut nagsabi: “Nangaipo nin panahon bago mi napakibagayan an bagong lugar asin kultura. Sa panapanahon, nagkakaproblema kami sa tubig, elektrisidad asin tulak, pero nakakapagkondukta kami nin mga pag-adal sa Bibliya sagkod sa pinakadakul na gusto mi!” Si Lisbeth nagsabi: “Kabangang oras sana hali sa iniistaran mi, may mga teritoryo na dai pa lamang napaabutan kan maugmang bareta. Pero, pag nagduduman kami, may nanunumpungan kaming mga nagbabasa nin Bibliya asin nakikiulay na tukduan sinda. An pagtutukdo kan mensahe nin Bibliya sa siring na mapakumbabang mga tawo nagtatao nanggad nin daing kaagid na kaugmahan!”

Siguradong maugmahon an satong Lider na nasa langit, si Cristo Jesus, mantang nahihiling niya kun paanong an paghuhulit na pinunan niya ginigibo ngunyan sa mas dakul nanggad na parte kan daga! Iyo, para sa gabos na lingkod nin Diyos, dakulang kaugmahan na gikan sa buot na ipresentar an saindang sadiri tanganing utubon an pagbuot ni Jesus na ‘gumibo nin mga disipulo sa gabos na nasyon.’—Mat. 28:19, 20.