An kagadanan garo pagturog, ta an gadan daing pag-aram asin dai makakagibo nin ano man. Minsan siring, an Kaglalang kan buhay puwedeng ibalik an buhay kan nagadan paagi sa pagkabuhay liwat. Bilang pruweba kaiyan, tinawan nin Diyos si Jesus nin kapangyarihan na buhayon liwat an nagkapirang nagadan na tawo.—Basahon an Parahulit 9:5; Juan 11:11, 43, 44.

Nanuga an Diyos na an mga gadan na yaon sa memorya niya bubuhayon liwat sa sarong matanos na bagong kinaban. An mga bubuhayon liwat magdadanay sa kagadanan sagkod na buhayon sinda liwat nin Diyos. Minamawot kan Diyos na Makakamhan sa Gabos na gamiton an saiyang kapangyarihan tanganing buhayon liwat an mga gadan.—Basahon an Job 14:14, 15.

Pag binuhay liwat nin Diyos an mga tawong nagadan, mamimidbid ninda an saindang sadiri, an saindang mga amigo, asin an saindang pamilya. Minsan ngani nalapa na an hawak kan nagadan, kayang buhayon liwat nin Diyos an mismong tawong iyan na may bagong hawak.—Basahon an 1 Corinto 15:35, 38.

Medyo dikit sanang indibidwal an bubuhayon liwat tanganing mag-istar sa langit. (Kapahayagan 20:6) An kadaklan sa mga bubuhayon liwat maistar sa ibinalik na paraiso digdi sa daga. Tatawan sinda nin bagong kapinunan, na may paglaom na mabuhay nin daing sagkod.—Basahon an Salmo 37:29; Guibo 24:15.