An Bibliya iyo an pinakapopular na libro sa kinaban. Taano? An sarong dahilan iyo an pagigin madaling masabutan kaiyan. Igwa iyan nin totoong mga pagkasaysay dapit sa tunay na mga tawo saka sa interaksiyon ninda sa lambang saro asin sa Diyos. An mga pagkasaysay na iyan nagtutukdo nin praktikal na mga leksiyon gamit an simple asin malinaw na mga tataramon na puwedeng itradusir sa ginatos na lengguwahe asin puwedeng masabutan nin mga tawo sain man sinda nakaistar o sa ano man na peryodo nin panahon. Asin an mga prinsipyo kan Bibliya pirming epektibo.

An pinakamahalaga, an Bibliya nagsasabi na iyan bako sanang libro manungod sa Diyos kundi libro man na hali sa Diyos. Ihinahayag kaiyan an pangaran nin Diyos, an saiyang personalidad, asin an saiyang dai maliliwat na katuyuhan sa paglalang kan daga asin sa mga tawo. Isinasaysay man kan Bibliya an haloy nang labanan nin marahay asin maraot: sarong kawili-wiling istorya na may maugmang katapusan. Kaya, kun babasahon ta an Bibliya na may bukas na isip, magkakaigwa kita nin pundasyon para sa pagtubod asin paglaom.

May mga impormasyon na makukua sana sa Bibliya. Halimbawa, sinasabi sato kan Bibliya an katotoohan dapit sa mga topiko na siring kan mga ini:

• Kun sain kita hali asin kun taano ta nagsasakit kita

• Kun ano an ginibo nin Diyos tanganing balukaton an katawuhan

• Kun ano an ginibo ni Jesus para sa sato

• Kun ano an kaaabtan kan daga asin kan mga tawo

Taano ta dai magtao nin atensiyon sa masunod na mga pahina asin konsideraron kun ano an laog kan Bibliya?