Dahil sa pagkabaranga sa pulitika, nagsasakit na marhay an mga nasyon sa bilog na kinaban. Sigun sa sarong surbey kan 2022 kan Pew Research Center, “65% kan mga adulto sa 19 pigsurbey na nasyon an nagsasabi na sa nasyon ninda igwa nin grabe o grabeng marhay na pagkorontrahan sa tahaw nin mga tawong nagsusuportar sa magkakalain na partido sa pulitika.”

 Narisa mo daw na mas naggagrabe an pagkabaranga sa pulitika sa lugar nindo? Taano ta arog kaiyan? Igwa daw nin solusyon? Pag-isipan an sinasabi kan Bibliya.

 Ihinula kan Bibliya na sa panahon ta, na inaapod na “huring mga aldaw,” dakul na tawo an magkakaigwa nin mga ugaling nagpapagin imposible na makamtan an pagkasararo.

•   “Sa huring mga aldaw maabot an delikado asin masakit na mga panahon. Huli ta an mga tawo magigin interesado na sana sa sadiri nindang kapakanan, . . . habo nin ano man na kasunduan.”—2 Timoteo 3:1-3.

 Sa ibong kan lubos na paghihinguwa kan dakul na tawo, nasasakitan an mga gobyerno na magpunsiyonar nin epektibo. An mga tawo na magkakalain an pananaw nasasakitan, o imposible pa ngani sa sainda, na magtinarabangan para resolberan an mga problema. Pinapatunayan kan mga resulta an haloy na panahon nang sinabi kan Bibliya.

•   “An tawo nananakop sa tawo sa saiyang ikakapahamak.”—Eclesiastes 8:9.

 Dawa arog kaiyan, may itinataong solusyon an Bibliya—sarong gobyerno na pinapanginutan nin saro na kayang halion an mga problema na nagpapasakit sa sosyedad ngunyan.

 May sinasabi an Bibliya na sarong lider na iyo sana an igwa kan mga kakayahan na resolberan an mga problemang iyan—si Jesu-Cristo. Igwa si Jesus kan kapangyarihan, kan awtoridad, asin kan pagmawot na magkaigwa nin pagkasararo asin katuninungan sa bilog na katawuhan.

•   “Sa saiyang mga aldaw, an matanos magigin marambong, asin an katuninungan magigin abunda.”—Salmo 72:7.

•   “An gabos na nasyon maglilingkod sa saiya.”—Salmo 72:11.

 Sarong marahayon na lider si Jesus huling nagmamalasakit siya sa sato asin gusto niyang tabangan an mga tawo, lalo na an mga pigtratar nin bakong makatanusan.

•   “Ililigtas niya an dukha na naghahagad nin tabang, siring man an hamak asin an siisay man na mayo nin paratabang. Mahihirak siya sa hamak asin sa dukha, asin an buhay kan mga dukha ililigtas niya. Sa pang-aapi asin sa kadahasan ililigtas niya sinda.”—Salmo 72:12-14.

 Makanuod nin urog pa manungod sa Kahadian nin Diyos, an gobyerno sa langit na pinapamahalaan ni Jesus. Aramon kun paano ka makikinabang sa pamamahala kaiyan asin kun paano mo iyan masusuportaran.

•   Hilingon an video na Ano an Kahadian nin Diyos?

•   Basahon an artikulong “Kahadian nin Diyos—Sarong Gobyerno na Daing Korapsiyon.”