May mga tawo na haluyon bago makanuod sa maraot nindang mga eksperyensiya. Arog ako kaiyan kaidto. Namundag asin nagdakula ako sa Barcelona, an ikaduwa sa pinakadakulang siyudad sa Espanya. Nakaistar an pamilya mi sa lugar na inaapod na Somorrostro, na sakop an dakulang parte kan siyudad sa may baybayon. Midbid an Somorrostro sa krimen asin berentahan nin droga.

 Siyam kaming magturugang, asin ako an pinakamatua. Huling tios kaming marhay, pinatrabaho ako ni Tatay sa sarong tennis club sa lugar mi bilang parapurot nin bola. Diyes anyos ako kaidto asin sampulong oras akong nagtatrabaho kada aldaw. Kaya dai ako nakapag-eskuwela arog kan kadaklan sa mga kaedad kong aki. Kan 14 anyos ako, nagtrabaho ako bilang operator nin makina sa sarong metal shop.

 Kan 1975, inapudan ako tanganing magserbisyo sa militar, na kahagadan kan gobyerno kan Espanya kaidto. Gusto ko nin exciting na buhay kaya nagboluntaryo ako na maglaog sa Spanish Foreign Legion sa Melilla, sarong lugar sa Norteng Aprika na teritoryo kan Espanya. Kan panahon na iyan, nagin adik ako sa droga asin buratsero.

 Kan magluwas ako sa Legion, nagbalik ako sa Barcelona asin nagbilog nin gang. Hinahabon mi an ano man na puwede ming habunon. Dangan ipinapabakal mi iyan tanganing may pambakal kami nin droga. Nagpuon akong maggamit nin LSD saka mga amphetamine, asin nagpangana ako sa sex, sa arak, asin sugal. Huli sa nakakaraot na istilo nin pamumuhay na ini, lalo akong nagin madahas. Pirmi akong may darang kutsilyo, patok, o sundang, asin kun sa hiling ko kaipuhan, dai ako nag-aalangan na gamiton an arin man diyan.

 Sarong beses, hinabon mi kan sakong gang an sarong kotse asin linapag kami kan mga pulis. Garo iyan eksena sa pelikula. Minaneho mi an kotse nin mga 30 kilometros, tapos pigpaputukan na kami kan mga pulis. Sa huri, ibinangga kan nagmamaneho sa samo an kotse, tapos nagdurulag kami gabos. Kan maaraman iyan ni Tatay, siyempre pinalayas niya ako sa harong.

 Sa suminunod na limang taon, an kalye an nagin istaran ko. Nagturog ako sa atubangan nin mga pinto, sa mga trak, sa mga tukawan sa parke, asin sa mga sementeryo. Nag-istar pa ngani ako nin pirang panahon sa sarong kuweba. Mayo lamang nin katuyuhan an buhay ko, saka pagmati ko ano man kun buhay ako o gadan. Nagigirumduman ko kaidto, bangag ako sa droga tapos naglaslas ako saka linugadan ko su takyag ko. Yaon pa sagkod ngunyan an mga piklat kaiyan.

 Kan 28 anyos ako, hinanap ako ni Nanay asin sinabi na magpuli na ako. Nag-iyo ako asin nangako na mabago na, pero medyo nahaloy-haloy bago ko nautob an pangakong iyan.

 Sarong hapon, may nagdalaw samong duwang Saksi ni Jehova. Mantang nagdadangog ako sa sainda, nagkurahaw si Tatay hali sa laog kan harong na dapat ko sindang bagsakan nin pinto. Habo kong pigdidiktahan ako, kaya dai ko siya inintindi. Inalukan ninda ako nin tulong saradit na libro, na maugma kong inako. Hinapot ko sinda kun sain sinda nagtitiripon, asin pakalihis nin pirang aldaw, nagduman ako sa Kingdom Hall.

 An inot kong narisa iyo an maayos na pagbado kan gabos. Sa kabaliktaran, halaba an buhok ko, dai ayos an barabas, saka musingon an bado. Risang-risa na dai ako angay duman, kaya nagdanay sana ako sa luwas kan Kingdom Hall. Pero nasurpresa ako ta nahiling ko an dati kong kairiba asin dating miyembro nin gang na si Juan, na nakaamerikana. Naaraman ko na nagi siyang Saksi ni Jehova kan nakaagi pa sanang taon. An presensiya niya nagtao sa sako kan kinakaipuhan na kusog nin buot tanganing maglaog saka mag-atender sa pagtiripon. Diyan nagpuon na magbago an buhay ko.

 Inako ko an alok sakong pag-adal sa Bibliya asin narealisar ko tulos na kun gusto kong uyunan ako nin Diyos, kaipuhan kong baguhon an pagigin agresibo ko saka an imoral na pamumuhay ko. Bakong madali an mga pagbabagong iyan. Nanudan ko na tanganing mapaugma an Diyos na Jehova, kaipuhan kong “liwaton an [sakong] pagkatawo paagi sa pagbago kan [sakong] isip.” (Roma 12:2) Nakataros na marhay sa sakong puso an pagkahirak nin Diyos. Sa ibong kan gabos kong kasalan, namatian kong tinatawan niya ako nin tsansa na magbago. An mga nanudan ko dapit sa Diyos na Jehova nakatadom na marhay sa puso ko. Nagin malinaw sa sako na igwa nin Kaglalang na nagmamakulog sa sako.—1 Pedro 5:6, 7.

 Nagpahiro ini sa sako na gumibo nin mga pagbabago. Halimbawa, kan mapag-ulayan sa samong pag-adal sa Bibliya an dapit sa tabako, sinabi ko sa sadiri ko, ‘Kun gusto kan Diyos na Jehova na magdanay akong malinig asin lubos na daing ramog, di kaipuhan nang mawara an mga sigarilyong ini!’ (2 Corinto 7:1) Kaya diretso iyan sa basurahan!

 Kaipuhan ko man na magpundo sa paggamit asin pagpabakal nin droga. Nangaipo iyan nin medyo mas dakul na panahon asin paghihinguwa. Tanganing maabot an pasuhan na iyan, aram kong kaipuhan kong putulon an relasyon ko sa mga dati kong kairiba. An impluwensiya ninda dai nakakatabang sa sako na umuswag sa espirituwal. Pero sa paglihis nin panahon, mas nagtitiwala na ako sa Diyos asin sa tabang kan bago kong mga amigo sa kongregasyon. An pagkamuot ninda asin pagmalasakit sa sako bilang indibidwal sarong bagay na dai ko pa naeksperyensiyahan kaidto. Sa paglihis nin mga bulan, nakabutas man giraray ako sa droga asin isinulot ko “an bagong personalidad,” na makakatabang sa sako na makamtan an pag-uyon nin Diyos. (Efeso 4:24) Kan Agosto 1985, binawtismuhan ako bilang saro sa Mga Saksi ni Jehova.

 Tinabangan ako kan Bibliya na maparahay an buhay ko. Pinatalingkas ako kaiyan sa nakakaraot na istilo nin pamumuhay na minaraot sa hawak asin dignidad ko. Sa katunayan, labing 30 sa dati kong mga kairiba an nagadan sa AIDS o iba pang hilang na konektado sa pagdodroga. Ipinagpapasalamat ko nanggad na huli sa pag-aplikar ko kan mga prinsipyo sa Bibliya, nakalikay ako sa siring na kapaha-pahamak na mga resulta.

 An mga kutsilyo asin patok na dara-dara ko kaidto bilang madahas na hoben parte na sana kan sakong nakaagi. Dai ko lamang naisip na maabot an aldaw na Bibliya na an dara-dara ko asin na gagamiton ko iyan tanganing tabangan an mga tawo. Ngunyan, pareho kami ni agom na naglilingkod bilang bilog na panahon na ministro kan Mga Saksi ni Jehova.

 Dai nagin Saksi ni Jehova an mga magurang ko, pero naapresyar ninda an mga pakinabang na nakamtan ko huli sa pag-adal ko nin Bibliya. Sa katunayan, idinepensa pa ngani ni Tatay an mga Saksi sa atubangan kan gabos niyang kairiba. Malinaw sa saiya na an bago kong pagtubod an dahilan kan pambihirang mga pagbabago sa sako. Parating sinasabi ni Nanay na dapat kaidto pa ako nag-adal nin Bibliya. Uyon nanggad ako sa saiya!

 Nanudan ko sa mga eksperyensiya ko sa buhay na mayo nanggad padumanan an paghanap nin kaugmahan sa droga asin sa iba pang bisyo. Nakakamati ako ngunyan nin tunay na kaugmahan sa paghiras sa iba kan mga katukduan na nasa Tataramon nin Diyos—mga katukduan na talagang nagligtas sa buhay ko.