An bawtismo nanunungod sa paglubog sa tubig sa sarong tawo asin sa paghawas diyan. a Iyan an dahilan kaya binawtismuhan si Jesus sa sarong dakulang salog. (Mateo 3:13, 16) Kaagid kaiyan, hinagad kan sarong lalaking Etiope na bawtismuhan siya kan paparani sinda sa “sarong lugar na may tubig.”—Gibo 8:36-40.

An kahulugan nin bawtismo

 Ikinumparar kan Bibliya an bawtismo sa paglubong. (Roma 6:4; Colosas 2:12) Isinisimbolisar kan bawtismo sa tubig an pagkagadan nin sarong tawo kun manungod sa dati niyang pamumuhay asin pagpuon nin bagong pamumuhay bilang sarong Kristiyano na dusay sa Diyos. An pagpabawtismo asin an mga lakdang na dapat gibuhon bago kaiyan areglo nin Diyos para magkaigwa an sarong tawo nin malinig na konsiyensiya basado sa pagtubod niya sa atang ni Jesu-Cristo. (1 Pedro 3:21) Iyan an dahilan kaya itinukdo ni Jesus sa mga disipulo niya na dapat sindang magpabawtismo.—Mateo 28:19, 20.

Nakakahali daw nin kasalan an pagpabawtismo?

 Dai. Huling itinutukdo kan Bibliya na malilinigan kita sa kasalan paagi sana sa ipinabulos na dugo ni Jesus. (Roma 5:8, 9; 1 Juan 1:7) Alagad, para makinabang sa atang ni Jesus, an saro dapat na magpahiling nin pagtubod ki Jesus, baguhon an saiyang pamumuhay para iuyon iyan sa mga tukdo ni Jesus, asin magpabawtismo.—Gibo 2:38; 3:19.

Ano an pagbunyag?

 An mga terminong “bunyagan” asin “pagbunyag” dai mahihiling sa Bibliya. Nanunungod iyan sa sarong seremonya na isinasagibo kan nagkapirang relihiyon kun sain an sarong umboy “binabawtismuhan” (paagi sa pagwirik nin tubig o pagbubo kaiyan sa payo niya) asin pinapangaranan.

Itinutukdo daw kan Bibliya an pagbawtismo sa umboy?

 Dai. An Kristiyanong pagbawtismo isinasagibo sa mga nasa edad na para masabutan asin magtubod sa “maugmang bareta manungod sa Kahadian nin Diyos.” (Gibo 8:12) Buot sabihon, dapat na madangog ninda an tataramon nin Diyos, akuon iyan, asin magsulsol—mga bagay na dai magigibo nin sarong umboy.—Gibo 2:22, 38, 41.

 Apuwera kaiyan, ipinapahiling kan Bibliya na para sa Diyos an sadit na mga aki kan mga Kristiyano banal, o malinig sa paghiling niya, dahil sa kaimbudan kan mga magurang. (1 Corinto 7:14) Kun tama na bawtismuhan an mga umboy, dai na kuta ninda kaipuhan na umasa sa kaimbudan kan iba. b

Mga salang ideya manungod sa Kristiyanong pagbawtismo

 Salang ideya: An pagwirik o pagbubo nin tubig sa payo nin sarong tawo kapareho man sana kan paglubog sa tubig.

 An totoo: An mga pagbawtismo na sinambit sa Bibliya gabos isinagibo paagi sa paglubog sa tubig. Halimbawa, kan an disipulong si Felipe bawtismuhan an sarong lalaking Etiope, ‘pareho sindang nagbuntog sa tubig’ para sa pagbawtismo. Pagkatapos, ‘naghawas sinda sa tubig.’—Gibo 8:36-39. c

 Salang ideya: Ipinaparisa kan Bibliya na kaibang binabawtismuhan an mga umboy pag binabawtismuhan an gabos na nakaistar sa sarong harong. Halimbawa, manungod sa sarong guwardiya kan presuhan sa Filipos, sinabi kaiyan: “Siya asin an gabos na kairiba niya sa harong tulos-tulos na binawtismuhan.”—Gibo 16:31-34.

 An totoo: An istorya manungod sa pagkakumbertir kan guwardiya nagpaparisa na naintindihan kan mga binawtismuhan “an tataramon ni Jehova” asin na nag-ugma sindang marhay. (Gibo 16:32, 34) Dahil sa mga impormasyon na iyan, masasabi niyato na kun igwa man nin mga umboy sa harong kan guwardiya, dai sinda kaibang binawtismuhan, huling dai pa man ninda kayang masabutan an tataramon ni Jehova.

 Salang ideya: Itinukdo ni Jesus an pagbawtismo sa umboy kan sabihon niyang para sa sadit na mga aki an Kahadian.—Mateo 19:13-15; Marcos 10:13-16.

 An totoo: Kan sabihon iyan ni Jesus, bako an manungod sa pagbawtismo an ipinapakipag-ulay niya. Imbes, ipinapahiling niya na an mga magigin kuwalipikado para sa Kahadian nin Diyos dapat na magin arog sa sadit na mga aki—mahuyo saka andam na tukduan.—Mateo 18:4; Lucas 18:16, 17.