Bilang kabtang kan kontribusyon ninda para suportaran an tunay na pagsamba, ipinagbuot sa suanoy na mga Israelita na magdonar nin ikapu, a o ikasampulong kabtang, kan taunan nindang ginaganar. Sinabi sainda nin Diyos: “Dai ka magpalta sa pagtao taon-taon kan ikasampulong kabtang [“ikapu,” King James Version] kan gabos na bunga kan saimong banhi na itinanom mo sa saimong uma.”—Deuteronomio 14:22.

 An pagbuot na magtao nin ikapu kabtang kan Katugunan ni Moises, na sarong kodigo nin ley na itinao nin Diyos sa suanoy na Israel. Bako nang sakop kan Katugunan ni Moises an mga Kristiyano kaya bako nang kahagadan sainda na magtao nin ikapu. (Colosas 2:13, 14) Imbes, an lambang Kristiyano matao nin pinansiyal na kontribusyon “uyon sa napagdesisyunan niya sa saiyang puso, na bakong magabat an buot o napipiritan, huli ta namumutan nin Diyos an maugmang nagtatao.”—2 Corinto 9:7.

•  Pagtao nin Ikapu sa Bibliya—“Lumang Tipan”

•  Pagtao nin Ikapu sa Bibliya—“Bagong Tipan”

 An pagtao nin ikapu nagkapirang beses na sinambit sa seksiyon kan Bibliya na midbid sa apod na Lumang Tipan. Sinambit an kadaklan kaiyan pagkatapos na itao sa Israel an kodigo nin Ley (an Katugunan ni Moises) paagi ki Moises. Pero an pira diyan sinambit bago kan panahon na iyan.

Bago an Katugunan ni Moises

 An inot na tawo na sinambit sa Bibliya na nagtao nin ikapu iyo si Abram (Abraham). (Genesis 14:18-20; Hebreo 7:4) Nagtao si Abram nin ikapu bilang regalo sa hading saserdote kan Salem. Minalataw na sarong beses niya sana ining ginibo; mayong ebidensiya sa pagkasaysay kan Bibliya na si Abraham o an mga aki niya nagtao giraray nin ikapu.

 An ikaduwang tawo na sinambit sa Bibliya na nagtao nin ikapu iyo an makuapo ni Abraham na si Jacob. Nanuga siya na kun bebendisyunan siya nin Diyos, itatao niya “an ikasampulong kabtang kan gabos” na itatao saiya. (Genesis 28:20-22) Sigun sa nagkapirang iskolar sa Bibliya, posibleng marhay na binayadan ni Jacob an ikapung ini paagi sa mga atang na hayop. Inutob ni Jacob an promesa niya, pero dai niya pinirit an pamilya niya na magtao kan ikapung iyan.

Sa irarom kan Katugunan ni Moises

 Ipinagbuot sa suanoy na mga Israelita na magtao nin ikapu bilang sarong paagi nin pagsuportar sa saindang relihiyosong aktibidad.

•   Nakasuportar an ikapu sa mga bilog na panahon na naglilingkod para sa relihiyosong mga gibuhon—an mga Levita, kaiba na diyan an mga saserdote—na mayo nin sadiring dagang uumahon. (Bilang 18:20, 21) An mga Levitang bakong saserdote tinatawan nin ikapu kan mga tawo, asin ikinokontribwir ninda sa mga saserdote an pinakamarahay na “ikasampulong kabtang kan ikasampulong kabtang.”—Bilang 18:26-29.

•   Minalataw na kahagadan man na magtao nin saro pang taunan na ikapu, na nakatabang sa mga Levita asin sa mga bakong Levita. (Deuteronomio 14:22, 23) Ginamit kan mga pamilyang Israelita an probisyon na ini may koneksiyon sa espesyal na mga kapiyestahan, asin sa partikular na mga taon, itinatao iyan sa mga tios na marhay para makatabang sa mga pangangaipo ninda.—Deuteronomio 14:28, 29; 26:12.

 Paano pigkukuwenta an ikapu? An mga Israelita may piglalain na ikasampulong kabtang kan taunan na ani kan saindang daga. (Levitico 27:30) Kun pilion nindang bayadan an ikapung ini nin kuwarta imbes na ani, kaipuhan nindang dagdagan nin 20 porsiyento an halaga kaiyan. (Levitico 27:31) Ipinagbuot man sainda na magtao nin “ikasampulo sa mga baka asin sa mga karnero.”—Levitico 27:32.

 Para maaraman an ikapu kan saindang mga ataman na hayop, pinipili kan mga Israelita an ikasampulong hayop na minaluwas sa saindang turil. Sinabi kan Katugunan na dai ninda puwedeng hilingon an kalidad kan piniling mga hayop o ribayan an mga iyan, asin dai man ninda puwedeng ribayan nin kuwarta an mga ataman na hayop na itatao ninda bilang ikapu. (Levitico 27:32, 33) Pero su saro pang ikapu na gagamiton para sa taunan na mga kapiyestahan puwedeng ipabakal para magin kuwarta. An probisyon na ini nakatabang sa mga Israelitang kaipuhan na magbiyahe nin halawig na distansiya para makaatender sa mga kapiyestahan.—Deuteronomio 14:25, 26.

 Nuarin nagtatao nin ikapu an mga Israelita? Nagtatao nin ikapu an mga Israelita kada taon. (Deuteronomio 14:22) Pero, dai sinda nagtatao sa kada ikapitong taon. An taon na iyan sabbath, o taon nin pahingalo, kun sain an mga Israelita dai nagtatanom nin ano man sa daga ninda. (Levitico 25:4, 5) Dahil diyan, mayong kokolektahon na ikapu sa panahon nin pag-ani. Sa kada ikatulo asin ikaanom na taon kan pitong taon na siklo nin Sabbath, itinatao kan mga Israelita an saro pang ikapu sa mga tios asin mga Levita.—Deuteronomio 14:28, 29.

 Ano an padusa kan dai pagtao nin ikapu? Mayong sinabing padusa an Katugunan ni Moises kun an saro dai makatao nin ikapu. Nagtatao nin ikapu an mga Israelita dahil aram nindang iyan an tamang gibuhon. Ipapahayag kan mga Israelita sa atubangan nin Diyos na naitao na ninda an ikapu asin na mahagad sinda nin bendisyon sa Diyos dahil sa pagtao ninda kaiyan. (Deuteronomio 26:12-15) Para sa Diyos, paghabon saiya an dai pagtao nin ikapu.—Malakias 3:8, 9.

 Nakakapagabat daw an pagtao nin ikapu? Dai. Nanuga an Diyos na kun itatao ninda an ikapu, iuula niya sainda an saiyang bendisyon asin dai sinda magkukulang nin ano man. (Malakias 3:10) Pero pag dai itinatao kan nasyon an ikapu, nagsasakit sinda. Dai sinda binebendisyunan nin Diyos saka dai sinda nakikinabang sa paglilingkod kan mga saserdote asin mga Levita na napabayaan ninda dahil sa dai ninda pagtao kan ikapu.—Nehemias 13:10; Malakias 3:7.

 Sa bilog na buhay ni Jesus bilang tawo, kahagadan pa sa mga parasamba nin Diyos an pagtao nin ikapu. Pero, hinali na iyan pagkagadan ni Jesus.

Kan panahon ni Jesus

 Sa seksiyon kan Bibliya na inaapod kan dakul na Bagong Tipan, ipinapahiling kaiyan na an mga Israelita padagos na nagtao nin ikapu kan si Jesus yaon digdi sa daga. Sinabi niya na obligasyon ninda an pagtao nin ikapu, pero kinondenar niya an mga lider nin relihiyon na istriktong nagtatao nin ikapu ‘alagad pigbabaliwala an mas matimbang na mga bagay kan Katugunan, na iyo an hustisya asin pagkahirak saka kaimbudan.’—Mateo 23:23.

Pagkagadan ni Jesus

 Bako nang kahagadan an pagtao nin ikapu pagkagadan ni Jesus. Pinara, o hinali, kan kagadanan ni Jesus bilang atang an Katugunan ni Moises, kaiba na an pagbuot na “magkolekta nin ikapu.”—Hebreo 7:5, 18, nota sa ibaba; Efeso 2:13-15; Colosas 2:13, 14.