•   An gusto mo, biriglaan sana; an gusto man kan agom mo planado gabos.

•   Tuninong ka saka bakong mainistorya; an agom mo bibo pirmi saka mainistorya.

 May ugali daw an saimong agom na ikinakauyam mo? An pagparapokus diyan puwedeng makaapektar sa saindong pag-aguman. Kaya sinasabi kan Bibliya na “an siisay man na sigeng pangistorya manungod [sa sarong bagay] pinagsusuway an mga dayupot na mag-amigo.”—Talinhaga 17:9.

 Imbes na magin dahilan nin pag-iiwal nindong mag-agom an nakakauyam na ugali, puwede mong manudan na mansayon iyan sa positibong paagi.

Sa artikulong ini

•  Mas maray na pagmansay sa mga ugali na nakakauyam sa saimo

•  An sinasabi nin mga mag-agom

•  Giya sa pag-uulay

 An ugali na ikinakauyam mo sa agom mo tibaad konektado sa ugali na nagustuhan mo sa saiya. Pag-isipan an tulong halimbawa:

 “Sa parati, maluway maghiro an agom ko, kaya haloy siyang makatapos sa ginigibo niya o magpreparar pag may dudumanan kami. Pero dahil sa ugali niyang iyan, mapasensiya siya—dawa sako. Nakakauyam talaga kun minsan an pagigin maluway niyang humiro, pero kaiba ’yan sa mga nagustuhan ko saiya.”—Chelsea.

 “Metikulosa sa pagplano nin mga bagay-bagay an agom ko; gusto niyang siguraduhon na ayos an gabos, na nakakauyam na kun minsan. Pero, dahil sa pagigin metikulosa niya, mayo siyang nalilingawan.” —Christopher.

 “Nauuyam ako sa agom ko ta kun minsan garo mayo siyang pakiaram. Pero, an pagigin relaks niya iyo an saro sa mga inot na nagustuhan ko saiya. Gusto ko an pagigin kalmado niya lang dawa sa nakaka-stress na mga sitwasyon.”—Danielle.

 Arog kan sinabi ni Chelsea, Christopher, asin Danielle, an kaluyahan nin sarong tawo sa parati ibang anggulo sana kan sarong magayon na kuwalidad. Kaya kun arog kaiyan, dai mo mahahali an kaluyahan na iyan kun dai mo man hahalion an maray na kuwalidad, kun paanong dai mo man puwedeng iapon an saro sanang side kan sinsilyo.

 Siyempre, bakong gabos na ugali igwa nin positibong anggulo. Halimbawa, sinasabi kan Bibliya na may mga tawo na “madaling maanggot.” (Talinhaga 29:22) Kaya dapat na pagmaigutan nin saro na halion an “lambang klase nin grabeng paghinanakit, kaanggutan, pagkaungis, sirilyakan, asin mapang-insultong pagtaram.” a—Efeso 4:31.

 Pero kun an sarong ugali nakakauyam man sana, sunudon an sadol kan Bibliya: “Padagos na pagpasensiyahan an lambang saro . . . dawa pa kun an siisay man igwa nin dahilan na [magreklamo].”—Colosas 3:13.

 Apuwera diyan, hinguwahon na mahiling an positibong anggulo kan ugaling iyan—an aspekto na tibaad iyo pa ngani an inot na nagustuhan mo sa agom mo. Sinabi ni Joseph, “An pagpokus sa nakakauyam na ugali, garo pagpokus sana sa matatarom na gilid kan sarong diyamante na dai hinihiling an gayon kaiyan.”

 Inot, puwedeng pag-isipan kan kada saro sa saindo an minasunod na hapot. Dangan, pag-ulayan nindo an saindong simbag.

•   An saimong agom daw may ugali na sa hiling mo makakaapektar sa saindong pag-aguman? Kun igwa, ano an ugaling iyan?

•   An ugali daw na iyan talagang maraot o nakakauyam man sana?

•   May positibong anggulo daw an ugaling iyan? Kun igwa, ano iyan, asin taano ta pinapahalagahan mo an aspektong iyan kan personalidad kan saimong agom?