An teknolohiya puwedeng makatabang o makaraot sa saindong pag-aguman. Paano iyan nakakaapekto sa saindong pag-aguman?

•  An dapat nindong maaraman

•  An magigibo nindo

•  An sinasabi nin mga mag-agom

•  Giya sa pag-uulay

•   An madunong na paggamit nin teknolohiya puwedeng makapakusog sa pag-aguman. Halimbawa, may mga mag-agom na ginagamit iyan para makakomunikar sa kada saro sa bilog na aldaw na dai sinda magkaibanan.

   “An simpleng mensahe sa text na ‘I love you’ o ‘I miss you’ puwedeng magin makahulugan na marhay.”—Jonathan.

•   An bakong madunong na paggamit nin teknolohiya puwedeng makapaluya sa pag-aguman. Halimbawa, may mga tawo na pirmi na sanang gadget an kapot, na nakakabawas kan panahon asin atensiyon na puwede kutanang itao ninda sa saindang agom.

   “Sigurado ako na may mga panahon na gusto kutana kan agom ko na makipag-ulay sako kun dai lang ako naggagamit kan sakong cellphone.”—Julissa.

•   May mga nagsasabi na puwede sindang magkaigwa nin makahulugan na pag-uulay kan saindang agom dawa busy sinda sa saindang gadget. Uyon sa sosyologong si Sherry Turkle, hali iyan sa salang paniniwala kan dakul na kaya nindang makapag-multitask. Minalataw na an inaapod na kakayahan na mag-multitask bako talagang marahay. Sinabi niya na sa totoo lang, “an satong performance nagluluya kada may idinadagdag kitang bagong trabaho sa dati ta nang ginigibo.” a

   “Nakakaugma pag nakakaulay ko si agom, pero bako pag nagmu-multitask siya. Pag arog kaya kaiyan, garo man sana sinasabi niyang maugma man siya dawa gadget niya lang an kaiba niya.”—Sarah.

 Tandaan: An teknolohiya puwedeng makatabang o makaraot sa saindong pag-aguman, depende sa paagi nin paggamit nindo kaiyan.

 Magbugtak nin mga priyoridad. Sinasabi kan Bibliya: ‘Siyertuhon nindo kun ano an mas importanteng mga bagay.’ (Filipos 1:10) Haputon an sadiri, ‘An panahon daw asin atensiyon na dapat ming itao sa kada saro bilang mag-agom naitatao mi na sa samong mga gadget?’

 “Nakakamundo na makahiling nin lalaki saka babayi na naggagamit kan saindang cellphone mantang nagkakakan sa restawran—duwang tawo na an atensiyon nasa saindang gadget. Habo tang magin uripon kan teknolohiya asin malingawan kun ano an pinakaimportante—an satong relasyon sa kada saro.”—Matthew.

 Magbugtak nin limitasyon. Sinasabi kan Bibliya: “Bantayan nindo nin maingat an saindong paglakaw, na iyan dai magin siring sa mga bakong madunong kundi siring sa mga tawong madunong, na ginagamit sa pinakamarahay an saindong panahon.” (Efeso 5:15, 16) Haputon an sadiri, ‘Puwede daw akong magtagama nin espesipikong oras para basahon asin simbagon an mga mensaheng dai man kaipuhan na simbagon tulos imbes na reply sana akong reply sa mga iyan?’

 “Nakakatabang pag ibinubugtak ko sa silent mode an sakong cellphone, tapos ma-reply na lang ako sa mas kumbenyenteng panahon. Bihira man na an sarong apod, text message, o e-mail kaipuhan talagang simbagon tulos.”—Jonathan.

 Kun posible, dai pagdarahon an trabaho. Sinasabi kan Bibliya: ‘Sa gabos na bagay igwa nin kapanahunan.’ (Parahulit 3:1) Haputon an sadiri: ‘Dinadara ko daw sa harong an sakong trabaho gamit an sakong smartphone? Kun iyo, paano ini nakakaapekto sa buhay ming mag-agom? Ano daw an sasabihon kan agom ko manungod diyan?’

 “Dahil sa teknolohiya, makakapagtrabaho kita dawa sain saka sa gabos na panahon. Pag magkaibanan kami kan sakong agom, kinakaipuhan kong gumibo nin dagdag na paghihinguwa para maiwasan an pirming pag-check kan sakong cellphone saka pag-asikaso nin mga bagay na may koneksiyon sa trabaho.”—Matthew.

 Pag-ulayan nindong mag-agom an paggamit nin teknolohiya. Sinasabi kan Bibliya: “Padagos na hanapon kan lambang saro, bako an para sa sadiri niyang kapakinabangan, kundi an para sa ibang tawo.” (1 Corinto 10:24) Pag-ulayan nindong mag-agom kun paano ginagamit kan lambang saro saindo an teknolohiya asin kun anong mga pagbabago, kun igwa man, an dapat na gibuhon. Sa pag-uulay nindo, puwede nindong gamiton an giya sa pag-uulay sa artikulong ini.

 “Mayo kaming itinatago ni agom sa kada saro, saka sinasabihan mi an kada saro kun sa hiling mi napapasobra na an paggamit kan cellphone o kan tablet. Aram mi na puwedeng magin problema ini, kaya pigkokonsiderar mi an sabuot kan kada saro.”—Danielle.

 Tandaan: Siguraduhon na an teknolohiya iyo an saimong uripon, bakong kagurangnan.