Babiloni Mukalamba, uo ibuuku lya Ukusokolola lyalandapo, emininako ukupepa ukwa bufi konse, uko Lesa akaana. * (Ukusokolola 14:8; 17:5; 18:21) Nangu ca kuti iyi mipepele yalipusanapusana, yonse ilatalusha abantu ku kupepa Lesa wa cine, Yehova.—Amalango 4:35

Ifya kwishibilako Babiloni Mukalamba

1.   Babiloni Mukalamba cishibilo. Baibolo imulondolola ukuti “mwanakashi” kabili “cilende mukalamba,” uwakwata ishina ilya “nkama ukutila: ‘Babiloni Mukalamba.’” (Ukusokolola 17:​1, 3, 5) Pa kulemba ibuuku lya Ukusokolola babomfeshe “ifishibilo,” kanshi kuti twatila Babiloni Mukalamba cishibilo, te mwanakashi wa cine cine. (Ukusokolola 1:1) Na kabili “aikala pa menshi ayengi” ayemininako ‘abantu abengi kabili mabumba ya bantu, inko shonse na ba ndimi shonse.’ (Ukusokolola 17:1, 15) Umwanakashi wa cine cine te kuti acite ifi.

2.   Babiloni Mukalamba aba mu fyalo fyonse. Etwa ukuti “umusumba uukalamba uwateka ishamfumu shonse isha pe sonde.” (Ukusokolola 17:18) E co kanshi alikwata amaka sana pa fyalo fyonse.

3.   Babiloni Mukalamba mipepele te kabungwe ka mapolitiki nelyo aka makwebo. Mu musumba wa Babiloni uwa ku kale mwali imipepele iingi, kabili waishibikilwe ku “buloshi” no “kupanda.” (Esaya 47:1, 12, 13; Yeremia 50:1, 2, 38) Na kuba, e mwali imipepele ya bufi iyalelwisha Lesa wa cine, Yehova. (Ukutendeka 10:8, 9; 11:2-4, 8) Bakateka ba mu Babiloni baleitakisha no kuisansabika pali Yehova no kupepa kwakwe. (Esaya 14:4, 13, 14; Daniele 5:2-4, 23) Na Babiloni Mukalamba wine na o aishibikilwa mu “kupupa imipashi.” Ici e cilanga ukuti Babiloni Mukalamba mipepele.—Ukusokolola 18:23.

    Babiloni Mukalamba te kuti abe akabungwe ka mapolitiki pantu “ishamfumu sha pe sonde” shikaloosha ukonaulwa kwakwe. (Ukusokolola 17:1, 2; 18:9) Kabili te kabungwe ka makwebo, pantu Baibolo ilamupusanyako na “bashimakwebo ba pe sonde.”—Ukusokolola 18:11, 15.

4.   Ifyo Babiloni Mukalamba bamulondolola filanga ukuti mipepele ya bufi. Mu nshita ya kusambilisha abantu ifyo bengapalama kuli Lesa wa cine, Yehova, imipepele ya bufi ibasambilisha ukulapepa tulesa tumbi. Baibolo ita ifi ukuti “bucilende.” (Ubwina Lebi 20:6; Ukufuma 34:15, 16) Ifisumino pamo nga Bulesa butatu na bumunshifwa bwa mweo e lyo no kubomfya ifilubi pa kupepa fyatendekele mu Babiloni kale sana kabili fyalitwalilila na muno nshiku mu mipepele ya bufi. Kabili iyi mipepele ilasankanya amapepo ne fya mu calo. Baibolo ipashanya uku ukukanaba ne cishinka ku bucende.—Yakobo 4:4.

    Ifyuma fya mipepele ya bufi ne fyo iitakisha pa fyo yakwata filingana ne fyo Baibolo ilanda pali Babiloni Mukalamba ukuti afwele “ifyakashikila ne fyakashika ce, kabili aiyemfeshe ku fya golde na ku mabwe ayauma umutengo na kuli bamargariti.” (Ukusokolola 17:4) Babiloni Mukalamba e “mwine wa fya bunani ifya pano isonde,” e kutila ifisambilisho ne micitile ifishisekesha Lesa. (Ukusokolola 17:5) Abantu ababa mu mipepele ya bufi ‘bantu abengi kabili mabumba ya bantu, inko shonse na ba ndimi shonse’ abatungilila Babiloni Mukalamba.—Ukusokolola 17:15.

 Babiloni Mukalamba e wipaya ‘abantu bonse abepaiwa pe sonde.’ (Ukusokolola 18:24) Ukufuma fye na ku kale, aba mu mipepele ya bufi balasongelekanya inkondo no kusansa kwa fipondo, kabili balifilwa ukusambilisha abantu icine pali Yehova, Lesa wa kutemwa. (1 Yohane 4:8) Ici calenga kwaba sana ukusumya umulopa. E ico, abafwaya ukusekesha Lesa bafwile ‘ukufumamo muli ena,’ e kutila ukuipatulako ku kupepa kwa bufi.—Ukusokolola 18:4; 2 Abena Korinti 6:14-17.