Awe, imipepele tayaba cimo cine. Baibolo yalilanda pa mipepele iingi iikalifya Lesa. Iyi mipepele yaba mu mabumba yabili.

Ibumba 1: Ukupepa balesa ba bufi

 Baibolo nga ilelanda pa kupepa balesa ba bufi ibomfya amashiwi pamo nga “mupu fye,” “fya fye” kabili “ifishingaafwa kantu.” (Yeremia 10:3-5; 16:19, 20) Yehova * Lesa aebele uluko lwa bena Israele ukuti: “Wilapepa balesa bambi pa cinso candi.” (Ukufuma 20:3, 23; 23:24) ‘Yehova alekalipa’ abena Israele nga bapepa tulesa twa bufi.—Impendwa 25:3; Ubwina Lebi 20:2; Abapingushi 2:13, 14.

 Lesa tayaluka, na muno nshiku mwine tatemwa abapepa “abetwa balesa.” (1 Abena Korinti 8:5, 6; Abena Galatia 4:8) Lesa eba abafwaya ukumupepa ukunayampana na baba mu mipepele ya bufi, abeba ati: “Fumenimo muli bena, no kuipaatulako.” (2 Abena Korinti 6:14-17) Nga ca kuti imipepele yonse yaba fye cimo cine kabili ilalenga abantu bapalama kuli Lesa, mulandu nshi Lesa engatwebela ukucita ifi?

Ibumba 2: Ukupepa Lesa mu nshila iyo ashasuminisha

 Inshita shimo, abena Israele pa kupepa Lesa balecita ifyo abalepepa balesa ba bufi balecita pa kupepa balesa babo, lelo Yehova alibakenye ukulasakanya ukupepa kwa cine no kupepa kwa bufi. (Ukufuma 32:8; Amalango 12:2-4) Yesu alikalipiile intungulushi sha mapepo abaliko mu nshiku shakwe pa nshila balepepalamo Lesa. Ku nse balemoneka kwati balitemwa ifya kwa Lesa lelo bali babumbimunda pantu ‘balisuulile ifyacindama ifyaba mu Mafunde, e kutila, umulinganya no luse ne cishinka.’—Mateo 23:23.

 Na muno nshiku mwine, mipepele fye isambilisha icine eitungulula abantu kuli Lesa. Ici icine caba muli Baibolo. (Yohane 4:24; 17:17; 2 Timote 3:16, 17) Imipepele iyisambilisha ifyapusana ne fyo Baibolo isambilisha ilalenga abantu bafuma kuli Lesa. Ifisambilisho ifingi ifyo abantu bamona kwati fyafuma mu Baibolo pamo nga icisambilisho ca kuti muli Lesa umo mwaba abene batatu, ica kuti umweo taufwa, ne ca kuti kwaliba umulilo wa pe, fyafumine ku balepepa balesa ba bufi. Imipepele isambilisha ifi ‘ya fye,’ nelyo yacabecabe, pantu ilalenga abantu balekonka intambi ukucila ukukonka ifyo Lesa afwaya.—Marko 7:7, 8.

 Lesa alipata imipepele iishikonka ifyo afwaya. (Tito 1:16) Pa kuti imipepele ilenge abantu bapalame kuli Lesa, ifwile ukulabasambilisha ifingabafwa mu mikalile yabo te kulabasambilisha fye intambi. Ku ca kumwenako, Baibolo itila: “Umuntu nga aimona kwati ni kapepa wine wine nomba talama ululimi lwakwe, lelo atwalilila ukubepa umutima wakwe, ninshi imipepele ya uyo muntu ya fye. Imipepele iyasanguluka kabili iishakowela mu menso ya kwa Lesa wesu kabili Shifwe ni yi: ukusakamana inshiwa na bamukamfwilwa mu kucula kwabo, no kuisunga ababula akabi ku fya pano calo.”—Yakobo 1:26, 27.