Cimoneka kwati Mikaele, uo aba mu mipepele imo beta ukuti “Umutakatifu Mikaele,” lishina bapeele Yesu ilyo ashilaisa pano isonde e lyo na lintu abwelelemo ku muulu. * Mikaele alyumene na Satana pa numa ya mfwa ya kwa Mose kabili alyafwile malaika ukuyaeba kasesema Daniele amashiwi ya kwa Lesa. (Daniele 10:13, 21; Yuda 9) Mikaele acita ifintu ukulingana no bupilibulo bwe shina lyakwe, ilyalola mu kuti “Nani Uwaba Nga Lesa?” pantu alatungilila imitekele ya kwa Lesa kabili alalwisha abalwani ba kwa Lesa.—Daniele 12:1; Ukusokolola 12:7.

 Moneni umulandu twingalandila ukuti Yesu e Mikaele malaika mukalamba.

•   Mikaele e “malaika mukalamba.” (Yuda 9) Amashiwi ya kuti “malaika mukalamba” ayapilibula ukuti “umukalamba pali bamalaika bonse, yasangwa fye pa fikomo fibili mu Baibolo. Mu fikomo fyonse fibili ili ishiwi liloshafye ku muntu umo icilelanga ukuti kwaba fye malaika umo uwakwata ili ishina. Icikomo cimo citila Shikulu Yesu uwabushiwe “akeka ukufuma ku muulu ne shiwi lyakwe ilya maka likomfwika, e kutila ishiwi lya kwa malaika mukalamba.” (1 Abena Tesalonika 4:16) Yesu alikwata “ishiwi lya kwa malaika mukalamba” pantu e malaika mukalamba, Mikaele!

•   Mikaele aleba amabumba ya bamalaika ifya kucita. “Mikaele na bamalaika bakwe balwile ne cing’wena,” Satana. (Ukusokolola 12:7) Mikaele alikwata sana amaka pa fibumbwa fyonse ifya mupashi. Na kuba etwa ukuti “umo pali bacilolo bapulamo” no kuti “cilolo mukalamba.” (Daniele 10:13, 21; 12:1) Ba David E. Aune abasambilila sana ifya mu Cipingo Cipya balandile ukuti aya malumbo yalanga ukuti Mikaele e “mushilika mukalamba uwa mabumba ya bamalaika.”

   Baibolo nga yalanda pali aya amashina ilosha fye ku muntu umo uwakwata amaka pa mabumba ya bamalaika bonse. Ilalondolola “pa kusokololwa kwa kwa Shikulu Yesu ukufuma mu muulu pamo na bamalaika bakwe aba maka mu mulilo uulebilima, ilyo akaleta icilandushi.” (2 Abena Tesalonika 1:7, 8; Mateo 16:27) Ilyo Yesu aile ku muulu, “bamalaika na bamulopwe na ba maka balengelwe ukunakila ena.” (1 Petro 3:21, 22) Nga ca kuti Yesu na Mikaele bantu babili abapusana, Lesa te kuti ababike pa cifulo cimo cine ica kuba abakalamba ba mabumba ya bamalaika. Kanshi kuti twasondwelela ukuti, amashina ya kuti Yesu e lyo na Mikaele yalanda fye pa muntu umo.

•   Mikaele “akema” ilyo kukaba “inshita ya kucula.” (Daniele 12:1) Mwi buuku lya kwa Daniele ishiwi lya kuti “akema” balalibomfya sana nga balelanda pa mfumu iikema mu kubomba umulimo uwaibela. (Daniele 11:2-4, 21) Yesu Kristu uo Baibolo ita ukuti “Cebo ca kwa Lesa” akabomba umulimo waibela pamo nga “Imfumu ya shamfumu” ukonaula bonse abalwani ba kwa Lesa no kucingilila abantu bakwe. (Ukusokolola 19:11-16) Akacita ifyo ilyo kukaba “ubucushi ubukalamba ubushatala abubako ukutula pa ntendekelo ya ba pano calo.”—Mateo 24:21, 42.