Satana ne fibanda balatunka sana abantu. E co Baibolo ilandila ukuti: “Icalo conse calaala mu maka ya mubifi.” (1 Yohane 5:19) Baibolo yalilanda pa micenjelo Satana abomfya pa kulufya abantu.

•   Ubufi. Baibolo yeba Abena Kristu “ukulwisha imicenjelo ya kwa Satana Kaseebanya.” (Abena Efese 6:11) Umucenjelo umo uo Satana abomfya wa kubepa abantu pa kuti balemona kwati ababomfi bakwe, babombela Lesa.​—2 Korinti 11:​13-​15.

•   Ukupupa imipashi. Satana alalufya abantu ukupitila mu bomfwana ne mipashi, abasobela ifya ku ntanshi, e lyo na babuka imbuko nelyo ababukila ku ntanda. (Amalango 18:​10-​12) Ukubomfya bubi bubi imiti, ne nshila shalekanalekana abantu babomfya pa kulenga amatontonkanyo ya bambi ukobelwa ne fya kwelenganya nako kuti kwalenga umuntu awilwa ne fibanda.​—Luka 11:​24-​26.

•   Ukupepa kwa bufi. Amacalici ayasambilisha ifisambilisho fya bufi yalalenga abantu ukukanalaumfwila Lesa. (1 Abena Korinti 10:20) Baibolo ita ifi ifisambilisho fya bufi ukuti “fisambilisho fya fibanda.”​—1 Timote 4:1.

•   Ukuwilwa ne ngulu. Mu Baibolo mwaliba amalyashi ya bantu abo ifibanda fyalecusha. Bamo abali ne fibanda balipofwile nelyo ukuba bacibulu e lyo bambi baleitetaula no kuitetaula.​—Mateo 12:22; Marko 5:​2-5.

Ifya kucita pa kuti Satana ekwata amaka pali ifwe

 Tamulingile ukulatiina ifibanda pantu Baibolo yalitweba ifya kucita pa kukaana Satana:

•   Mufwile ukwishiba inshila Satana alufishamo abantu pa kuti ‘mwishibe amapange yakwe.’​—2 Abena Korinti 2:11.

•   Mulesambilila Baibolo no kulakonka ifyo ilanda. Ukukonka ifyo Baibolo ilanda kuti kwamucingilila ku matunko ya kwa Satana.​—Abena Efese 6:​11-​18.

•   Mufwile ukonaula fyonse ifyakuma imipashi. (Imilimo 19:19) Pali fyo paba amabuuku, amamagazini, inyimbo, na mafilimu umwaba ifya mipashi.