Pa calo pakaba umutende. Ubufumu bwa kwa Lesa, ubuteko ubwaba ku muulu, e bukaleta umutende te bantu iyo. Imfumu ya ubu buteko, ni Kristu Yesu. Moneni ifyo Baibolo ilanda pa fyo ubu ubufumu bukacita.

1.   Lesa akalenga “inkondo ukupwa ukufika ku mpela sha pano isonde,” ku kufikilisha ubulayo ubwa kulenga pe “sonde pabe umutende pa bantu abo atemwa.”—Amalumbo 46:9; Luka 2:14.

2.   Ubufumu bwa kwa Lesa bukalateka icalo conse ukufumu mu muulu. (Daniele 7:14) Apo bukalateka icalo conse, bukafumyapo akapatulula, akalenga abantu ukulaumana na ba mu fyalo fimbi pa mulandu wa kutemwisha icalo cabo.

3.   Yesu, Kateka wa Bufumu bwa kwa Lesa, etwa ati “Cilolo wa mutende,” kabili akalenga ‘ku mutende wakwe kwikaba impela.’—Esaya 9:6, 7.

4.   Abafwaya ukulwisha abanabo tabakabemo mu Bufumu, pantu “onse uwatemwa ubunkalwe [Lesa] alimupata.”—Amalumbo 11:5; Amapinda 2:22.

5.   Lesa alasamabilisha abantu bakwe ifya kwikala mu mutende. Baibolo ilanda pa bakonka ili ifunde ati: “Bakafula bapanga babo ukuti babe baplao na mafumo yabo ukuti yabe ifya kutungwilako imiti. Uluko talwakemishe uluko lunankwe ulupanga, nangu ukusambilila inkondo na kabili.”—Esaya 2:3, 4.

 Inte sha kwa Yehova pano calo ababa mu mamilioni balasambilila ifya kuba no mutende. (Mateo 5:9) Nangu ca kuti twafuma mu mishobo iyalekanalekana kabili twikala mu fyalo ukucila pali 230, tulakaana ukulwako inkondo.