“Ubwafya ubukalamba ubo nakwete ilyo nalekula kukumbwa abaume banandi. Pa kubala nalemona kwati bwaice fye nalimo nkaleka nga nakulako, lelo nshalekele ukukumbwa abaume banandi.”—E fyalandile David, uuli ne myaka 23.

 David, Mwina Kristu uufwaya ukulacita ifyo Lesa afwaya. Bushe kuti acita ifyo Lesa afwaya uku ninshi alakumbwa abaume banankwe? Bushe Lesa amona shani abaume abalaala na baume banabo nelyo abanakashi abalaala na banakashi banabo?

•  Finshi Baibolo yalandapo?

•  Bushe ici calola mu kuti . . . ?

•  Inga nga ca kuti . . . ?

 Ifyo abantu bamona abaume abalaala na baume banabo nelyo abanakashi beka beka filapusana ukulingana ne ntambi nelyo inshita. Nomba Abena Kristu bena tabakonkelela fye ifyo abantu abengi bamona ifintu kabili ‘tabasendwa uku no ku, ku mwela onse uwe sambilisho ku bucenjeshi bwa bantu.’ (Efes. 4:14) Lelo bakonka ifyo Baibolo ilanda pa kulaala pamo ukwa baume beka beka nelyo abanakashi beka beka (ukubikako fye na pa mibele imbi iyabipa).

 Baibolo yalilanda mu kulungatika pa kulaala pamo ukwa baume beka beka nelyo abanakashi beka beka. Icebo ca kwa Lesa citila:

•  “Te kwesha ukusendama no mwaume munobe filya usendama no mwanakashi.”—Ubwina Lebi 18:22.

•  “Lesa abalekele ukuti balecita ifyakowela, ukulingana no kufwaya kwa mitima yabo, . . . abalekele ukuti baletungululwa ne nsuuna ishili ya cifyalilwa, pantu abanakashi bashile umusango wa cifyalilwa uwa kulaala na baume no kutampa ukulaala abanakashi beka beka.”—Abena Roma 1:24, 26.

•  “Mwilufiwa. Aba bulalelale, nangu abapepa utulubi, nangu abacende, nangu abaume abasuminisha abaume banabo ukulaala na bo, nangu abaume abalaala na baume banabo, nangu bapuupu, nangu bafunushi, nangu ni bacakolwa, nangu abatukana, nangu ni balya abacenjesha abanabo, tabakapyane ubufumu bwa kwa Lesa.”—1 Abena Korinti 6:9, 10.

 Ukulanda fye icishinka, amafunde ya kwa Lesa yalilanda pa fyo bonse abantu balingile ukulacita, nampo nga baume abakumbwa abanakashi na banakashi abakumbwa abaume, nelyo nga baume abakumbwa abaume banabo nelyo banakashi abakumbwa abanakashi banabo. Kanshi icishinka ca kuti bonse fye tufwile ukulaesha na maka ukukanacita fyonse ifingafulwisha Lesa.—Abena Kolose 3:5.

 Bushe ici cilolele mu kuti Baibolo itukoselesha ukupata abaume abalaala na baume banabo nelyo abanakashi abalaala na banakashi banabo?

 Awe. Na kuba Baibolo yalilesha ukupata umuntu uuli onse, nampo nga uyo muntu mwaume uulaala na baume banankwe nelyo nga mwanakashi uulaala na banakashi banankwe nelyo iyo. Lelo itweba ‘ukulabombesha ukuba aba mutende ku bantu bonse’ te mulandu ne fyo abo bantu baba. (AbaHebere 12:14) Kanshi te kuti cibe bwino ukupata nelyo ukulacusha abantu ba musango uyu.

 Bushe ici cilolele mu kuti Abena Kristu balingile ukususha amafunde ayasuminisha abaume ukuupana beka beka nelyo abanakashi ukuupana beka beka?

 Ukulingana na fintu Baibolo ilanda, umwaume no mwanakashi e balingile fye ukuupana epela, ifi e fyo Lesa afwaya. (Mateo 19:4-6) Nomba ifikansa fya calo e filenga abantu balelanshanya pa kupanga mafunde ayalanda pa baume ukuupana beka beka na banakashi ukuupana abanakashi beka beka te mu kuti balefwaya ukulekanya icalungama ne calubana. Baibolo itila Abena Kristu tabalingile ukuitumpa mu fikansa fya calo. (Yohane 18:36) E ico tabatungilila nelyo ukulwisha amafunde ya buteko ayakuma abaume abalaala na baume banabo nelyo abanakashi abalaala na banakashi banabo. Nelyo amafunde ayasuminisha abantu ba musango uyu ukuupana.

 Inga nga ca kuti umwaume alalaala no mwaume munankwe nelyo umwanakashi no mwanakashi munankwe, bushe kuti ayaluka?

 Ee kuti ayaluka, na kuba na mu nshiku sha batumwa kwali abalipo ifi! Baibolo yalilanda ukuti abaume abalaala na baume banabo nelyo abanakashi abalaala na banakashi banabo tabakapyane Ubufumu bwa kwa Lesa, lelo yalilundapo no kuti: “imwe bamo e fyo mwali.”—1 Abena Korinti 6:11.

 Bushe ici cilepilibula ukuti bonse abalekele ukulaala na baume banabo nelyo abanakashi banabo balilekelele fye ukukumbwa abaume banabo nelyo abanakashi banabo? Awe iyo. Baibolo itila: “Fwaleni ubuntu bupya, ubulelengwa cipya cipya . . . ukupitila mu kwishiba bwino bwino icine.” (Abena Kolose 3:10) Ukwaluka takupwa lyonse fye tulaya tulewamyako.

 Nomba inga nga ca kuti umuntu uulefwaya ukulakonka amafunde ya kwa Lesa acili alakumbwa abaume banankwe nangu abanakashi banankwe?

 Nga filya fine caba ku fintu fyonse ifyo abantu bakumbwa, umuntu umwine alingile ukusalapo ukukanacita nelyo ukuleka ukutontonkanya pa fintu alekumbwa. Finshi afwile ukucita pa kuti aleke ukutontonkanya pa fintu alekumbwa? Baibolo itila: “Muletungululwa no mupashi, nga mwacita ifyo ninshi tamwakalekonka ififwaya imitima yenu nakalya.”—Abena Galatia 5:16.

 Moneni ukuti Baibolo tailandile ukuti umuntu te kuti akonkelele ififwaya umutima. Lelo ilandile ukuti nga umuntu alecita ifya kwa Lesa pamo nga ukulaisambilisha Baibolo lyonse no kupepa, akaba na maka ya kukanakonkelela ififwaya umutima wakwe nelyo ukukumbwa.

 David uo tulandilepo pa ntendekelo alimwene ukuti ifi twalandapo fya cine, maka maka ilyo aebeleko abafyashi bakwe Abena Kristu pa bwafya akwete. Atile “Naumfwile kwati bantula icipe icafina. Nga nalyebele bwangu abafyashi bandi nga nshalecula ilyo nali umusepela lelo nga nali ne nsansa.”

 Nga tulekonka amafunde ya kwa Yehova tulaba sana ne nsansa. Twalishininkisha ukuti ifyo Yehova atweba “fyalyololoka, filenga umutima ukusekelela” no kuti “mu kukonka ubu bupingushi mwaba icilambu cikalamba.”—Amalumbo 19:8, 11.