Ukulingana ne fyo basangile pa numa ya kufwailisha, basangile ukuti abacaice abengi mu America balapepa nomba banono fye pali aba, abapepa cila bushiku. Ukwabula no kutwishika, bamo balaipusha abati: ‘Bushe ico abantu bapepela kufwaya ukumfwako fye bwino nangu kwaliba umulandu uukalamba tulingile ukupepela?’

•  Bushe ipepo cinshi?

•  Bushe Lesa alomfwa kabili alasuka amapepo?

•  Finshi ningapepelapo?

•  Ifyo abacaice banobe balanda

 Ipepo kulanda na Kabumba wa fintu fyonse. Bushe nawishiba umo ici cilolele? Yehova alicila abantu muli fyonse fye, lelo “taba kutali kuli ifwe umo umo.” (Imilimo 17:27) Na kuba, Baibolo yalitweba ukucita icintu icacindama sana, yatila: “Palameni kuli Lesa, na o akapalama kuli imwe.”—Yakobo 4:8.

 Finshi wingacita pa kuti mupalame kuli Lesa?

•   Cimo ico wingacita, kupepa e kutila ukulanda na Lesa.

•   Cimbi ico wingacita, kulasambilila Baibolo, iyi e nshila Lesa alandilamo na iwe.

 Nga ulepepa kabili ulesambilila na Baibolo ninshi ulelanshanya na Lesa. Nga ulecita ifi, bucibusa bobe na Lesa bukalakoselako.

 “Ukulanda na Yehova, ukulanshanya no Wapulamo lishuko nga nshi ilyo fwe bantu twakwata.”—E fyalandile Jeremy.

 “Ukweba Yehova ifyo ndeumfwa kulalenga napalama kuli ena.”—E fyalandile Miranda.

 Nangu walisumina muli Lesa kabili ulapepa na kuli ena, limo kuti cakukosela ukusumina ukuti alasuka amapepo upepa. Baibolo ilanda pali Yehova ukuti ‘alomfwa ipepo.’ (Amalumbo 65:2) Na kabili itweba no kuti “mulepoosa amasakamika yenu yonse pali ena.” Mulandu nshi? “Pantu asakamana imwe.”—1 Petro 5:7.

 Icishinka ca kuti: Bushe ulalanshanya ne fibusa fyobe lyonse? Ifi fine e fyo ufwile ukulacita na kuli Lesa, ulelanshanya nankwe lyonse mwi pepo kabili ulelumbula ne shina lyakwe ilya kuti Yehova. (Amalumbo 86:5-7; 88:9) Baibolo ilekweba ukuti, “mulepepa ukwabula ukuleka.”—1 Abena Tesalonika 5:17.

 “Nga napepa ninshi ndelanshanya na Tata wa ku muulu, uo njeba fyonse ifili ku mutima.”—E fyalandile Moises.

 “Ndalondolwela Yehova fyonse ifyo ndeumfwa, filya fine ningeba bamayo nelyo cibusa wandi uo natemwa sana.”—E fyalandile Karen.

 Baibolo itila: “Muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.”—Abena Filipi 4:6.

 Bushe ici cilolele mu kuti CALIBA FYE BWINO ukupepa kuli Lesa no kumweba amafya yonse tukwete? Ee! Baibolo itila: “Poosa icisendo cobe pali Yehova, na o akakukosha.”—Amalumbo 55:22.

 Na lyo line ilyo ulepepa kuli Lesa taulingile fye ukulalanda pa mafya ukwete. Umukashana uwe shina lya kuti Chantelle atile: “Te kuti imbe cibusa umusuma nga ca kuti lyonse fye ndelomba Yehova ukuti alengafwa. Mona ukuti ningile ukubalilapo ukumutasha, kabili ifyo ndemutashishapo fifwile ukuba ifingi.”

 Icishinka ca kuti: Finshi wingatashishapo Lesa? Bushe kuti watontonkanyapo pali fitatu ifyo wingamutashipo buno bushiku?

 “Kuti twapepa kuli Yehova no kumutasha nangu fye ni mutuntu utunono pamo nga amaluba.”—E fyalandile Anita.

 “Nga mwatontonkanya pa fyo Lesa abumba ifyo mwatemwa sana nelyo pe lembo lya mu Baibolo ilyo mwatemwa kuti mwatashishapo Yehova.”—E fyalandile Brian.