Umuku umo mu mwaka Inte sha kwa Yehova balalongana ku kwibukisha ifwa ya kwa Yesu pamo na bantu abo betako mwi sonde lyonse, nga fintu Yesu alandile. (Luka 22:19) Uku kulongana kulatwafwa ukwishiba ico filya Yesu acitile ilyo apeele ubumi bwakwe pa mulandu wa bantunse fyacindamina. Na kabili kulelanga twaishiba ifyo ilambo lyakwe lyatukuma pali ino nshita e lyo na ku ntanshi.—Yohane 3:16.

 Kuti mwanonkelamo shani mwi lambo lya kwa Yesu, nampo nga mukasangwa ku Cibukisho uno mwaka nelyo iyo? Yesu alandile ukuti tufwile ukucita ifintu fibili ifyacindama:

1.  1. Mulesambilila pali Lesa na Yesu. Mwi pepo Yesu apepele kuli Wishi wa ku muulu atile: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.

2.  2. Mulecita ifyo mulesambilila. Yesu alandile ukuti tulingile ukulacita ifyo alesambilisha. Ku ca kumwenako, ilyo alesondwelela Ilyashi lyakwe ilya pa Lupili alitashishe onse ‘uumfwa amashiwi yakwe no kulayakonka.’ (Luka 6:46-48) Na kabili pa nshita imbi alandile ukuti: “Apo mwaishiba ifi fintu, mukaba ne nsansa nga muleficita.”—Yohane 13:17.

 Bushe kuti mwatemwa ukwishibilapo na fimbi pali Lesa na Yesu? Bushe kuti mwatemwa ukusambilila ifingamwafwa ukwishiba ifyo mwingacita pa kuti mulecita ifyo mulesambilila? Fimo ifingamwafwa ni fi.

 Tulasambilisha abantu Baibo ukwabula ukubalipilisha, kabili abengi balisanga ukuti ifyo basambilila filabafwa ukwishiba ifingi pali Baibo no kulacita ifyo ilanda.

•   Kabiyeni apatila Tendekeni Ukusambilila Baibolo ne Nte sha kwa Yehova pa kuti mwishibe ifingi pa fyo isambililo lya Baibolo liba.

•   Tambeni vidio itila Mwaiseni kwi Sambililo Lyenu Ilya Baibolo pa kuti mumone ifyo ukusambilila ne Inte sha kwa Yehova kuba.

 Inte sha kwa Yehova balakumana imiku ibili mu mulungu pa fikuulwa fyabo ifya kupepelapo ifyo beta ukuti Ing’anda ya Bufumu. Pali uku kulongana tulasambilila Baibo, e lyo ne fyo twingabomfya ifyo isambilisha.

 Uuli onse kuti asangwako kuli uku kulongana, tamulingile ukuba Inte ya kwa Yehova pa kuti musangwako. Ukulingana ne fyo ifintu fili ku ncende mwikala kuti mwasalapo ukusangwa kuli uku kulongana ukubomfya Intaneti nelyo kuti mwaya ku Ng’anda ya Bufumu.

•   Tambeni vidio itila Finshi Ficitika pa Ng’anda ya Bufumu? pa kuti mwishibe ifyo ukulongana kuba.

•   Fwayeni apa kulonganina mupepi no ko mwikala pa cipande citila Ukulongana kwa Nte sha kwa Yehova.

 Ifipande ifingi na mavidio ifiba pali ino webusaiti kuti fyamwafwa ukwishiba ifingi pa fyo Yesu alesambilisha, na pa fyo ilambo lyakwe lyacindama.

 Ku ca kumwenako, pa kuti mwishibe ifyo imfwa ya muntu umo ingalenga abantu abengi ukunonkelamo, belengeni icipande icitila “Bushe Yesu Apususha Shani?” ne citila “Cinshi Yesu Aculiile no Kufwa?” nelyo tambeni vidio itila Mulandu Nshi Yesu Afwilile?