Abapingushi 14:1-20
14 Lyena Samsone aile ku Timuna uko ailemona umwanakashi* umuPelishiti.
2 E ico aile-eba wishi na nyina ati: “Kuli umwanakashi umuPelishiti uo namwene mu Timuna uo ntemenwe, kabili ndefwaya muyendetela nkesemuupa.”
3 Lelo wishi na nyina bamwebele abati: “Bushe te kuti ufwaye umwanakashi wa kuupa pali balupwa lwesu na pa bantu besu?+ Bushe ulefwaya fye ukuupa umwanakashi mu baPelishiti abashasembululwa?” Lelo Samsone aebele wishi ati: “Kandeteleni fye uyu wine pantu e o ntemenwe.”*
4 Wishi na nyina tabaishibe ukuti Yehova e walengele ukuti cibe ifi pa kuti akwate apa kulwila na baPelishiti, pantu pali ilya nshita abaPelishiti e baleteka abena Israele.+
5 E ico Samsone aile ku Timuna pamo na wishi na nyina. Ilyo afikile mu mabala ya myangashi aya mu Timuna, moneni! inkalamo* yalishile kuli ena ninshi ilebuluma.
6 Lyena umupashi wa kwa Yehova walengele akwata amaka+ ica kuti alepwile umusepela wa nkalamo pa kati, nga filya fine umuntu alepula akana ka mbushi ku minwe. Lelo taebeleko wishi nelyo nyina ico acitile.
7 Lyena ilyo afikile ku Timuna alilanshishe umwanakashi umuPelishiti uo amwene, kabili Samsone alitwalilile ukumutemwa.+
8 Pa numa, ilyo aileko na kabili pa kuti ayemuupa,+ alipaaswike pa kuti amone icitumbi ca nkalamo iyo aipeye, kabili mu citumbi ca nkalamo mwali inshimu ishingi no buci.
9 E ico alibulile ubuci, aya alelya. Ilyo asangile wishi na nyina alibapeeleko, nabo balalya. Lelo tabebele ukuti ni mu citumbi ca nkalamo afumishe ubuci.
10 Ilyo bafumineko, Samsone na wishi baile kuli uyu mwanakashi, kabili Samsone apangile umutebeto kulya kwine, pantu e fyo abalumendo balecita.
11 Ilyo bamumwene, bamutwaliile inshindishi 30 pa kuti shibe nankwe.
12 Lyena Samsone ashebele ati: “Lekeni imupike ubwile. Nga mwailula mu nshiku 7 isha mutebeto no kunjeba umo ubwile bulolele, ninshi nkamupeela ifya kufwala fya mu kati 30 ne fya kufwala fimbi ifisuma 30.
13 Lelo nga mwafilwa ukunjilwila, nimwe mukampeela ifya kufwala fya mu kati 30 ne fya kufwala fimbi ifisuma 30.” Bamwebele abati: “Ale pika ubwile tumfwe.”
14 E ico abebele ati:
“Mu cintu icilya, mwafumine ifya kulya,Kabili mu cakosa, mwafumine icalowa.”+
Balifililwe ukwilula ubwile pa nshiku shitatu.
15 Pa bushiku bwalenga 4 baebele umukashi wa kwa Samsone abati: “Sembeleka umulume obe+ pa kuti atwilwile ubwile. Nga te ifyo tulekocela pamo na ba mu ng’anda ya kwa wiso. Bushe ico mwatwitile kuno ni co mwalefwaya ukusenda ifyuma fyesu?”
16 E ico umukashi wa kwa Samsone alelilila pa cifuba ca mulume wakwe no kumweba ati: “Ufwile walimpata; tawantemwa.+ Walipika abantu bandi ubwile, lelo ine tawanjilwilako.” E lyo amwebele ati: “Umfwa, tata na mayo nshabebako! Bushe iwe niwe ningeba?”
17 Lelo atwalilile fye ukumulilila pa nshiku 7 isha mutebeto. Apo alemupatikisha, asukile amwilwila pa bushiku bwalenga 7. Lyena umwanakashi aile-eba abantu bakwe umo ubwile bwalolele.+
18 E ico pa bushiku bwalenga 7 ilyo akasuba kashilawa,* abaume ba mu musumba bamwebele abati:
“Cinshi calowa ukucila ubuci,Kabili cinshi cakosa ukucila inkalamo?”+
E lyo abebele ati:
“Amukanalimina ku kaombe kandi akakota,+Nga tamwilwile ubwile bwandi.”
19 Lyena umupashi wa kwa Yehova walengele aba na maka,+ ica kuti aile ku Ashkelone+ ayaipaya na baume babo 30 kabili abafuulile ifya kufwala ayapeela na baume abailwile ubwile.+ Alifulilwe nga nshi ilyo alebwelela ku ng’anda kuli wishi.
20 Lyena umukashi wa kwa Samsone+ bamufishe kuli umo pa bali inshindishi shakwe.+
Amafutunoti
^ Mu ciHebere, “umwanakashi uwa mu bana banakashi abaPelishiti.”
^ Mu ciHebere, “euweme mu menso yandi.”
^ Nelyo “inkalamo iyana iya masense.”
^ Nelyo kuti yapilibula no kuti, “ilyo ashilaingila mu muputule wa mu kati.”
