ISAMBILILO 8
Mulandu Nshi Lesa Alekela Amacushi ne Fyabipa Ukulacitika?
1. Bushe ifyabipa fyatampile shani?
Lesa alileka abantu ukuteka pa myaka iingi pa kuti bashininkishe ukuti teti bapwishe amafya
Ifyabipa fyatampile ukucitika pano calo ilyo Satana abepele ubufi bwa kubalilapo. Pa kubala, Satana ali ni malaika umusuma, nomba “tatwalilile mu cine.” (Yohane 8:44) Atendeke ukufwaisha ukuti abantu balemupepa nga filya balepepa Lesa. Satana abepele umwanakashi wa kubalilapo, Efa, kabili alimusembeleke ukuti amumfwile ukucila ukumfwila Lesa. Adamu na o akene ukumfwila Lesa nga filya Efa acitile. Ifyo Adamu acitile e fyalenga abantu balecula no kufwa.—Belengeni Ukutendeka 3:1-6, 19.
Satana atunkile Efa ukukanaumfwila Lesa, kabili apa pene e patendekele ukupondokela Lesa, nelyo ukukaana ukuti Lesa e wakwata insambu sha kuteka. Abantu abengi balakonkelesha Satana pantu nabo balakaana ukuti Lesa alebateka. E fyo Satana asanguka “kateka wa ici calo.”—Belengeni Yohane 14:30; 1 Yohane 5:19.
2. Bushe Lesa tapangile bwino bamalaika na bantu?
Imilimo ya kwa Lesa yonse yalifikapo. Ilyo Lesa apangile abantu na bamalaika, bali fye abapwililika ica kutila bali no kulamumfwila fye lyonse. (Amalango 32:4, 5) Lesa alitupeela insambu sha kusala ifyo tulefwaya, ifisuma nelyo ifyabipa. Nga twasalapo ukucita ifisuma ninshi tulelanga ukuti twalitemwa Lesa.—Belengeni Yakobo 1:13-15; 1 Yohane 5:3.
3. Mulandu nshi Lesa alekela ifyabipa ukulacitika?
Ukufuma apo abantu bapondokela Lesa, Yehova alibaleka ukulaiteka. Mulandu nshi? Pa kuti beshibe ukuti teti bekale bwino nga tabaletekwa na Lesa. (Lukala Milandu 7:29; 8:9) Apo Lesa apangila abantu napapita imyaka ukucila pali 6,000, kabili bonse twali-imwena ukuti abantu balifilwa ukuiteka. Bakateka balifilwa ukupwisha inkondo, buntalamisoka, ulufyengo, nelyo amalwele.—Belengeni Yeremia 10:23; Abena Roma 9:17.
Imitekele ya kwa Lesa tayaba nga iya bantu, pantu abasalapo ukutekwa na Lesa imikalile yabo ilawama. (Esaya 48:17, 18) Nomba line, Yehova ali no kufumyapo imitekele ya bantu yonse. Bantu fye abasalapo ukulatekwa na Lesa e bakekala mu calo.—Esaya 11:9.—Belengeni Daniele 2:44.
Tambeni vidio ileti: Mulandu Nshi Lesa Asuminishisha Ukucula?
4. Busuma nshi bwaba mu kutekanya kwa kwa Lesa?
Satana aleti takwaba umuntu uwingaitemenwa ukulabombela Yehova. Bushe teti mutemwe ukulanga ukuti ubu bufi? Ukutekanya kwa kwa Lesa kwaliwama pantu kulalenga twasalapo uo tulefwaya ukulatuteka nampo nga ni Lesa nelyo umuntu. Ifyo tucita e filanga uo twasalapo ukulatuteka.—Belengeni Yobo 1:8-12; Amapinda 27:11.
5. Kuti twacita shani pa kuti tusalepo ukulatekwa na Lesa?
Ifyo tusalapo ukucita filalanga nga tulafwaya ukulatekwa na Lesa
Kuti twasalapo imitekele ya kwa Lesa nga twasanga ukupepa kwa cine e lyo no kulacita ifintu ukulingana ne Cebo ca kwa Lesa, Baibolo. (Yohane 4:23) Kuti twakaana Satana nga tatuleba mu mapolitiki, nga tatulelwa inkondo, nga filya Yesu acitile.—Belengeni Yohane 17:14.
Satana alalenga abantu ukulamona kwati ubupulumushi ne fintu ifyabipa fyaliba fye bwino. Nga twaleka ukucitako ifya musango yo, abanensu na balupwa nalimo kuti batampa ukutuseka nelyo ukutulesha ukucita ifisuma. (1 Petro 4:3, 4) E ico, tufwile ukusalapo. Bushe twakula-angala na bantu abatemwa Lesa? Bushe twakulakonka amafunde yakwe ayasuma? Nga tulecita ifi, tukalanga ukuti filya Satana aleti umuntu nga ali na mafya teti omfwile Lesa fya bufi.—Belengeni 1 Abena Korinti 6:9, 10; 15:33.
Ifyo Lesa atemwa abantu fyalenga tushininkishe ukuti akafumyapo ifyabipa na macushi. Abacetekela ukuti Lesa akacita ifi bakekala umuyayaya pano calo.—Belengeni Yohane 3:16.
