Ifyo Baibolo Isambilisha

Bushe Ubushiku bwa Bupingushi E Cinshi?

Baibolo ilanda ukuti Lesa “alibika ubushiku umo akapingwila abantu ba pano isonde.” (Imilimo 17:31) Abantu abengi tabomfwa bwino nga ca kuti bali no kupingulwa. Bushe na imwe e fyo mumfwa?

NGA ca kuti na imwe e fyo mumfwa, ninshi kuti mwasansamuka nga mwaumfwa ukuti Ubushiku bwa Bupingushi bukaba ni nshita isuma iikalenga abantunse ukupaalwa nga nshi, ukubikapo fye na balya abafwa. (Mateo 20:28; Yohane 3:16) Ninshi cacindamina ukuti kukabe Ubushiku bwa Bupingushi? Bushe finshi fikacitika muli bulya “bushiku”?

Cinshi Tufwaila Ukuti Kukabe Ubushiku bwa Bupingushi?

Ilyo Lesa abikile abantunse pano calo, tababikilepo pa mulandu wa kuti ale-esha fye ukumona ifyo bengekala ilyo bashilaya kumbi. Apangile abantunse ukuti baleikala umuyayaya pe sonde. Nangu ca kutila imibili yabo na matontonkanyo fyali ifyapwililika, umwaume no mwanakashi wa ntanshi balipondokeele Lesa. Ne cafuminemo ca kuti, balipanishe ishuko lya kwikala umuyayaya, kabili baletele ulubembu ne mfwa ku bana bonse abo baishilekwata.—Ukutendeka 2:15-17; Abena Roma 5:12.

Ubushiku bwa Bupingushi bukaba imyaka 1,000, kabili muli iyi ine nshita, abantunse bakasuka bakakwate fyonse ifyo Adamu na Efa bapanishe. * Ishibeni ukutila ilembo lya Imilimo 17:31, ilili pa muulu, litile Ubushiku bwa Bupingushi, bukaba pa bantu “ba pano isonde.” Abakapingulwa bwino bakekala pa calo kabili bakaipakisha imikalile isuma umuyayaya. (Ukusokolola 21:3, 4) Kanshi Ubushiku bwa Bupingushi bulatwafwa ukufishapo ubufwayo bwa kwa Lesa ku bantunse e lyo na kwi sonde ukulingana ne fyo fyali pa kutendeka.

Kapingula uo Yehova asala ni Kristu Yesu. Baibolo ilanda ukuti Yesu e “ukapingula aba mweo na bafwa.” (2 Timote 4:1) Bushe “aba mweo” abakapingulwa ni bani? Bushe abafwa bakaba shani no mweo na kabili pano “calo”?

Yesu Akapingula “Aba Mweo”

Nomba tuli mupepi ne mpela ya buno bwikashi iyasobelwe kale, ilyo Lesa akonaula ifyabipa fyonse ifibomfya abantunse no kufumyapo ububifi  bonse. Abakapusuka impela ya buno bwikashi e “ba mweo” abakapingulwa.—Ukusokolola 7:9-14; 19:11-16.

Muli ilya nshita ya bupingushi, iikalepa imyaka 1,000, Kristu Yesu pamo na ba 144,000 abaume na banakashi abakabuuka no kuba no mweo mu muulu, bakateka isonde. Bakaba ishamfumu kabili bashimapepo, ukula-angalila ifintu fisuma ifyafuma mwi lambo lya cilubula ilya kwa Yesu kabili panono panono bakalenga abantunse aba cumfwila ukuba ne mibili yapwililika pamo pene na matontonkanyo.—Ukusokolola 5:10; 14:1-4; 20:4-6.

Muli iyi ine nshita ya Bushiku bwa Bupingushi, Satana ne fibanda fyakwe bakabalesha ukutunka abantunse. (Ukusokolola 20:1-3) Na lyo line, ilyo Ubushiku bwa Bupingushi bukapwa, Satana bakamuleka ukuti eshe abantunse bonse abakaba pa calo no kumona nga ca kuti baliba ne cishinka kuli Lesa. Abakaba ne cishinka kuli Lesa, bakacimfya ubwesho ubo Adamu na Efa bafililwe ukucimfya. Bakapingulwa ukuti nabalinga ukuba no mweo wa muyayaya mu calo icikaba Paradaise na kabili. Abakasalapo ukupondokela Lesa bakonaulwa umuyayaya, pamo pene na Satana ne fibanda.—Ukusokolola 20:7-9.

Ukupingula “Abafwa”

Baibolo ilanda ukuti mu nshita ya Bushiku bwa Bupingushi abafwa ‘bakabuuka.’ (Mateo 12:41) Yesu alandile ukuti “inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe no kufumamo, abalecita ifisuma bakabuukila ku mweo, abalecita ifibi bakabuukila ku bupingushi.” (Yohane 5:28, 29) Aya mashiwi tayalolele mu kuti ifilundwa fya bantu abafwa fikatendeka ukusuntinkana. Abafwa tabaishiba nangu fye cimo kabili tabakwata umweo uufuma mu mubili pa kufwa. (Lukala Milandu 9:5; Yohane 11:11-14, 23, 24) Yesu akabuusha bonse abafwa kabili bakaba pano pene pa calo.

Bushe abakabuuka bakabapingula ukulingana ne fyo balecita ilyo bashilafwa? Awe. Baibolo isambilisha ukuti “umuntu nga afwa, ninshi umulandu wakwe uwa lubembu wapwa.” (Abena Roma 6:7) Kanshi abakapusuka impela ya calo, pamo na balya abakabuuka pano pene pa calo, bakapingulwa “ukulingana ne fyo balecita” muli bulya bwine Ubushiku bwa Bupingushi. (Ukusokolola 20:12, 13) Cikaba fye ukulingana ne fyo imibele yabo ikaba ku mpela, nga bakaba ne cumfwila ninshi kubuukila ku mweo wa muyayaya nga bakapondoka ninshi bakabuukila ku konaulwa. Abengi abakabuuka, uyu ukaba e muku wa kubalilapo ukwishiba Yehova Lesa no kwishiba ifyo afwaya ubumi ukuba. Bakakwata ishuko lya kulacita ifyo Lesa afwaya no kukwata umweo wa muyayaya pano calo.

Tatulingile Ukutiina

Ubushiku bwa Bupingushi tabwakabe fye bwa kupokelela amafunde ne fya kucita ukufuma kuli Lesa lelo ikaba ni nshita ya kuti na balya abakaba no mweo bakatendeke ukukonka ifyo bakulasambilila no kulaipakisha imikalile isuma iyo bakakwata. Elenganyeni ifyo mukaba ne nsansa ilyo mukamonana na bantu mwatemwa abakabuuka ica kuti bonse capamo mukasuke mukabe abapwililika!

Ku mpela ya Bushiku bwa Bupingushi, Lesa akaleka Satana ukwesha abantunse ukumona nga ca kutila baliba ne cishinka kuli Lesa. Nomba tatulingile ukusakamana nangu ukutiina. Ku mpela ya Bushiku bwa Bupingushi, bonse abakaba no mweo bakaipangasha ku bwesho bwa kupelekeshako. Kanshi Ubushiku bwa Bupingushi bukaba ni nshila ya kufikilishamo ubufwayo bwa kwa Lesa ubwa kupwisha ifyabipa fyonse ifyatendeke lintu abantu bapondokele Lesa mwi bala lya Edeni.

[Futunoti]

BUSHE MWALITALA AMUIPUSHAPO UKUTI . . .

● Bushe Ubushiku bwa Bupingushi e cinshi?—Imilimo 17:31.

● Ni bani bakapingulwa?—2 Timote 4:1.

● Bushe Ubushiku bwa Bupingushi bukalepa shani?—Ukusokolola 20:4-6.

[Amashiwi pe bula 11]

Elenganyeni ifyo mukasansamuka pa kumonana na bantu mwatemwa abakabuuka

[Ifikope pe bula 10]

Ilyo Kristu akalateka, abafwa bakabuuka kabili bakaba mu paradaise pe sonde