Mwifusha Ifya Kucita Mu Mikalile Yenu, Lelo Mulecita Fye Ifyalinga

UKUBA ne mikalile iishakosa kabili no kulalinga mu kucita ifintu kulalenga ifintu ukuwama nga nshi. Lelo bushe finshi mwingacita pa kuti imikalile iwame? Intanshi mulingile ukutontonkanya pa fyo mwacindikisha mu bumi bwenu. Kuti mwacita shani ifi?

Iipusheni mwe bene amuti: ‘Ukufika pano finshi nakwanisha ukucita mu bumi? Finshi fyashalako ukucita?’ Lembeni ifintu fikalamba ifyo mufwaisha ukucita pali uyu mutande uli pe samba:

1. ․․․․․

2. ․․․․․

3. ․․․․․

Abengi muno calo bakwata amano ya kufwaya ukukwata ifintu ifingi kabili batontonkanya fye pa fya kucita pali ino ine nshita epela. Na kuba batila: “Tulye no kunwa, pantu mailo tukafwa.” (1 Abena Korinti 15:32) Abengi ababomba incito pano calo basumina ukuti icacindama mu mikalile ya shino nshiku ca kuti tulebomba no kukwata indalama sha kubomfya mu mikalile epela. Lelo Baibolo yena ilalanda ifyapusanako.

Mu mulumbe umo uo Yesu ashimike, alandile pa muntu uwakwete sana ifyuma, lelo afwile ninshi talatendeka no kuipakisha ifyuma fyakwe. Yesu atile: “E fyo caba ku muntu uibikila ifyuma lelo uushaba uwacindama kuli Lesa.” (Luka 12:16-21) Bushe ulya mwaume alilufyenye ukubombesha no kuikwatila ifyuma? Awe talufyenye. Ubwafya akwete bwa kuti abikile sana amano ku kukwata icuma. Taletontonkanya na pali Lesa muli fyonse ifyo alecita. Ne cafuminemo ca kuti icuma cakwe conse, e kutila fyonse ifyo abombeele, tali no kufibomfya mu mikalile yakwe mu kuya kwa nshita. Ala mwandini ici cali no kumubipila icine cine!—Lukala Milandu 2:17-21; Mateo 16:26.

Ukupusanako no yu mwaume, Yesu ena alatukoselesha ukubombesha pa kuti tukanonke icilambu ca muyayaya. Atukoseleshe ati: “Mwibombela ifya kulya ifyonaika, lelo mubombele ifya kulya ifibelelela ifingamutwala ku mweo wa muyayaya.” (Yohane 6:27) Ilyo ashilalanda aya mashiwi, abalile atila: “Pantu Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Ala mwandini icilambu ca musango yu caliwama nga nshi!

Kuti Mwapwisha Shani Amasakamika Yenu?

Yesu alishibe ukuti fwe bantu tulasakamikwa pa kukwata ifintu mu mikalile yesu. E ico akoseleshe abasambi bakwe ukuti: “E ico, mwilasakamikwa ifyo mukalya ne fyo mukanwa. Mwilasakamikwa iyo; pantu fyonse ifi e fyo inko sha muli ici calo shifwaisha, lelo Shinwe alishiba ukuti mulakabila ifi fintu. Lelo,  mulefwaya ubufumu bwakwe, na fyonse ifi akamupeela.”—Luka 12:29-31.

Aya mashiwi ya kukoselesha yalilenga Abena Kristu abengi ukulaikala imikalile isuma no kucefyako ifya kucitacita. Ba Juliet, abekala ku calo ca Malaysia, balondolola abati: “Incito yandi yalenasha sana kabili nalefuupuka. E ico ine na bena mwandi twalipepele kuli Yehova ukuti atwafwe ukulaikala imikalile iyayanguka. Mukwai tapakokwele alyaswike ipepo lyesu. Mu mweshi fye umo, nasangile incito ya kubomba fye inshiku shimo shimo mu mulungu iya kulafunda abana abalemana.” Ba Steve, ababomba incito ya kupaalika imitenge abekala ku Australia, balyalwile inshita balebomba iyi ncito pa kuti balesangwa sana no lupwa lwabo ilyo balebomba imilimo ya kwa Lesa. Abena mwabo ba Maureen, balondolola ukuti: “Nomba baba fye ne nsansa, e lyo na ifwe bene bonse twaliba ne nsansa. Abana besu balomfwa bwino! Na ine wine ndomfwa bwino! Imikalile nga taili ya pa muulu sana lelo ili fye iyayanguka, ifintu fyonse filenda bwino mu lupwa.”

 Lelo nga ca kutila incito mwalebomba yalipwa, kabili bali no kumitamfya mu ng’anda, mukabila ukuba ne citetekelo sana pa kuti mulekonka ifyo Yesu asosele. Nomba nga ca kuti ifya kwa Lesa e fyo mwacindamika sana mu bumi bwenu, kabili mwacetekela na Lesa, na imwe bene imikalile yenu kuti yawama kabili kuti ya-anguka, ica kuti mwalasakamana no lupwa lwenu bwino. Nga mulecita ifi mukakwata “umweo wine wine,” e kutila umweo wa muyayaya mu calo ca kwa Lesa icipya kabili ica bulungami, umukaba imilimo iisuma iyo abantu bakulaipakisha kabili tabakulabombela apa fye.—1 Timote 6:17-19; Esaya 65:21-23.

Bushe kuti mwatemwa ukusambilila na fimbi pali uyu “mweo wine wine” uo Baibolo yatulaya? Nga ca kutila kuti mwatemwa, lembeleni Inte sha kwa Yehova uko kwine mwikalila, ukubomfya adresi iili pe bula 5 muli ino ine magazini.

[Amashiwi pe bula 25]

Mu calo ca kwa Lesa icipya, incito yonse ikawama ukubomba kabili tukalanonkelamo

[Akabokoshi pe bula 24]

Bushe Kuti Mwasanga Incito Sha Kubombela Kumbi?

Pe samba pali fimo ifingamwafwa mu ncende shimo shimo isha calo muli ino nshita ilyo incito shafishe nga nshi:

● Ukusunga ing’anda (abene nga baya ku fya ncito nangu bali pa cuti kabili balefwaya aba kubashalilako pa ng’anda)

● Ukuwamya: amatuuka; amaofeshi; amayanda ilyo fye bapwisha ukukuula, nangu pa numa ya mulilo, ilyo abantu bakuukamo; bukaboyi (mu mayanda ya bambi); ukuwamya amawindo (aya mu maofeshi na ya mu mayanda)

● Ifya kulungisha: amacinga; ifipe fya malaiti ifyalekanalekana (amalaibrare yalikwata ifitabo ifyayanguka ukukonka ifisambilisha ifya kulungishalungisha)

● Ifya kupangapanga: ukubika utumapulanga mu mbali ya cibumba ca ng’anda; ukupanga amakabineti, ifiibi, utumitenge twa pa mwinshi wa ng’anda; ukupenta; ukupanga ulupango; no kufimba amayanda

● Ubulimi: ukulima ifya kulya, ukusaba ifitwalo, ukufumya ifya kulya mu mabala

● Ukusakamana amaluba mu: maofeshi, mu ma banki, apafikila abeni, mu matuuka yakalamba, na mu ncende shimbi

● Ukusakamana ifipe: ifikuulwa, bukeyateka (limo limo balapeela na mayanda ya kwikalamo)

● Ukubika nangu ukuwamya amakapeti no kubika amatailoshi ya mapulanga

● Ukutwala amanyunshipepala (abakalamba na baice) e lyo ne fintu fimbi: ifya makwebo, ne fipepala fya bakaunselo ifya misonko

● Ukukuushisha abantu ifipe, nangu ukubasungilako

● Ukuyemfya ulubansa, ukusaila imiti, ukukumpa ulunkoto, ukulepula amapulanga

● Bunamutekenya bwa basi ya pa sukulu

● Ukukopa amapikica (ukukopa utumitwe twa bantu ne fintu fye fimbi)

● Ukushitisha abalondo ubulyo bwa kwipailako isabi

● Ukufwaila abantu bambi incito pa kuti na bo bamupeeleko iyo mwaishiba: mwabapeela iya kulungisha motoka na bo bamupeela iya malaiti, mwabapeela iya kubila na bo bamupeela iya kulungisha imipaipi ya menshi

Nga mulefwaya ifyebo na fimbi moneni Loleni! ya March 8, 1996, amabula 3-11.

[Akabokoshi ne Cikope pe bula 25]

INCITO SHA KUIBOMBELA PA NG’ANDA

Fwailisheni ifilekabila abena mupalamano benu. Bepusheni. Itendekeleniko.

● Ukusunga no kulelelako bambi abana

● Ukushitisha umusalu wa kuilimina pa ng’anda nelyo amaluba; ukushitisha utwa kunwa twatalala

● Ukubila, ukucefya no kukusha ifya kufwala, no kukambika ifikamba

● Ukubombelako abapanga ifipe

● Ukufumbika umukate no kwipika ifya kulya fimbi

● Ukupanga ifya kwanshika pa busanshi, ukupikula; ukuyemfya insenkebele sha nsalu, bunakabumba; ne fya kupangapanga fimbi

● Ukubika insalu ku fipuna

● Ukusunga ama-akaunti ya ndalama, ukutaipa, ukubombelako abantu pali kompyuta ya pa ng’anda

● Umulimo wa kwasuka amafoni

● Ukubeya, ukuwamya no kuluka umushishi

● Ukulasonkesha imiputule ya mu ng’anda

● Ukulembela abasabankanya amakwebo akayela pa maenifulupu no kulonga amakalata

● Ukusamfya imyotoka (abantu kuti baleleta imyotoka pa ng’anda pa mwenu)

● Ukusambilisha ifitekwa

● Ukulungisha amaloko no kupanga amakii (kuti mwafwaya umwa kubombela uyu mulimo pa ng’anda)

Icishibisho: Kuti mwalenga abantu ukwishiba ukuti mulabomba iyi milimo pa kusabankanya mu mapepala aba matuuka basabankanyamo ifyo baleshitisha nangu kuti mwakambatika pa fipampa fya fyebo mupepi na matuuka yakalamba.